Juan 13
13
Inugasan ni Jesus i mga aꞌay it mga alagad ya
1Naꞌbut nay papuꞌun na it Pistaꞌ ngaytit Tiyaꞌliban.#13:1 Seledat sang lingguꞌ i kaꞌlay it Pistaꞌ it Tinapay nga Egay Ipagpaꞌalsa. Uꞌnang bagiꞌ ya i pagkaraꞌnen ngayting pagpangaranat Tiyaꞌliban. Basaen i duꞌut Exodo kapitulu 12. Huwebes, imatayen niray uꞌuybun it tupa baw kaꞌnen in pangiyapun. Temed mga Saduceo, Biyernes i ipagkaꞌen nirat kanira. Aypaꞌ iyan inukumanan baw inimatay na si Jesus, nakakaꞌen nat Tiyaꞌliban ngayti i kadakel it mga Judio temed iyan beken, ega paꞌ (kapitulu 18:28). Mga magbebtang situt kapitulu 13 seked it kapitulu 17, biyaraꞌan it Huwebes paꞌ. Kapitulu 18:1-27, ararem nay delem it Huwebes ngayti seked it minyag siꞌ. Kapitulu 18:28 seked it 19:42, aldaw it Biyernes. Si Jesus ngayti, magkaꞌrutan ya nang lagi nga naꞌbut nay timpu nga ilꞌid ya situt banwa ngaytu, ka muliꞌ na duꞌun it Amaꞌ ya. Talagang pagmaꞌalen yay mga alagad ya nga situt banwa ngaytu. Ta kayti, ipiyalteg ya na in sang unuy kadakulat pagmaꞌal ya ngayti it kanira. 2Itiyarakan nay pangiyapun na Jesus. Si Judas Iscariote ngayti nga anak ni Simon, piyanakman kanya nga lagi ni Satanas nga idagang ya si Jesus. 3Urut talaga ni Jesus nga ibinggay nat kanya it Amaꞌ i muꞌsang pudir. Baw urut ya nga kanya, egay beken nga giyaringan ya, duꞌun it Ampuꞌang Diyus, baw duꞌun nagat Ampuꞌang Diyus i uliꞌan ya. 4Aypaꞌ binwat ni Jesus it magꞌaꞌdung na sira ka kumaꞌen na, timnindeg kanya baw limbas yay panliꞌwan nga pakayan ya, bawnga miyanu kanyat tuwalya ka tiyapis ya. 5Bawnga timinggis kanya it danum duꞌun it palangganaꞌ. Pagkatgis ya, kiyayaꞌmatan yat mugas i mga aꞌay it mga alagad ya ngayti, baw pagtarapuwan ya nat tuwalya ngayti nga tiyapis ya.
6Iyan naꞌbut ya na si Simon Pedro, maat ni Simon Pedro ngayti, “Ampuꞌan, unuka atkayan nga ikaw i mugas it mga aꞌay ku?”
7Katubag si Jesus, maat ya, “Ega magkasepsepan mu kayti i pagbuwaten ku ngaytu, temed in asan nat malangbu-langbusan masepsepan mu naga yan.”
8Maat siꞌ ni Pedro ngayti, “Talagang subung bat ega bagay nga paꞌugasan ku it imu i aꞌay ku.”
Maat siꞌ ni Jesus, “Temed in ega malimpiyuꞌ ku ikaw, siguradung daꞌka na alagad ku. Egay kabagiꞌan mu nga gumaring situt aken.”
9Pagkagneg ni Pedro kayti, miyampang siꞌ kanya nga magꞌaat, “In atkayan palan, Ampuꞌan, magayen ku ega lamang desang aꞌay kuy ugasan mu. Pati alima baw ulu ku, ugasan mu naga gasiꞌ.”
10Tubagen siꞌ kanya ni Jesus, maat ya, “Ega na kaꞌilangan nga ugasan pat muꞌsa i iyan nga naꞌugasan na, ka limpiyuꞌ na kanya. Aꞌay ya manay kaꞌilangan nga ugasan. Kamu, limpiyuꞌ na, temed ega limpiyuꞌ nga muꞌsa.” 11Sabap magkaꞌrutan ni Jesus in siyu i bayaꞌen it mga kuꞌimatay ngaytit kanya, aypaꞌ ka inaat yay atkayti, nga “limpiyuꞌ kamu na temed ega limpiyuꞌ nga muꞌsa.”
12Iyan naꞌugasan na ni Jesus i mga aꞌay it mga alagad ya ngayti, nagpakay na kanya it limbas ya ngayting pakayan ya, bawnga miyadung siꞌ duꞌut kanya ngayting pagꞌadungan. Bawnga miyampang kanya nga magꞌaat, “Ta unu, nasepsepan mi i binwat ku ngaytut imyu? 13Pagtaꞌwagen mi aku nga Manigtulduꞌ baw Ampuꞌan. Tamaꞌ yan i panaꞌwag mi ngayat aken, ka talagang matuud. 14Kayti it aku nga Ampuꞌan baw Manigtulduꞌ mi, miyugas it mga aꞌay mi, kaꞌilangan nga kamu, atkayan naga nga mugas it aꞌay it esa may esat imyu. 15Sabap binggayan ku na kamu it alimbawa, isaꞌun atkaytu nagay imyu nga buwaten, binwat ku ngaytu. 16Kamatuudan tu nga kamatuudan i pagꞌaaten ku ngaytu, nga iyan manigsirbi, ega mataꞌas paꞌ kanya it agalen ya. Baw iyan nga tiyaꞌeg lamang, ega mataꞌas paꞌ it nagtaꞌeg it kanya. 17In magkasepsepan mi i itung mga bagay, basta buwaten mi lamang makasagya kamu yan.”
Ipiyaꞌrut ni Jesus nga idagang kanya it esa it mga alagad ya
[Mateo 26:20-25; Marcos 14:17-21; Lucas 22:21-23]
18Inaat paꞌ ni Jesus, “Egaytu kamu nga muꞌsa i pagpaꞌiguꞌan ku it pagꞌaaten ku ngaytu nga makasagya kamu, sabap magkakilalaan ku in unu nga mga taw i mga piniliꞌ ku. Temed atkaytuytu i piniliꞌ ku ka isaꞌun matuman i magbebtang duꞌun it kasuratang ampang it Ampuꞌang Diyus nga magꞌaat,
‘Karaꞌe-raꞌetan i itiyumbas it aken it taw nga siyakep kut pangaꞌen ku.’#13:18 Awit 41:9.
19Ipagꞌaat ku naytung lagi it imyu it ega paꞌ nagꞌabut, isaꞌun in magꞌabut na, pakimatuud kamu nga in siyu aku talaga. 20Kamatuudan talagay ipagꞌaat ku ngaytut imyu. Iyan magtanggap it pagtaꞌgen ku, aku i pagtanggapen ya. Baw iyan nga magtanggap it aken, pagtanggapen ya gasiꞌ i nagtaꞌeg it aken.”
21Pagkaꞌampang ni Jesus kayti, subung it may ega magkabaraꞌan ya. Aypaꞌ iriyapar ya na, nga magꞌaat, “Kamatuudan tuy ipagꞌaat ku ngaytu, nga may esat imyu situ nga kanyay bayaꞌen it mga kuꞌimatay it aken.”
22Nagseye-seyeken i mga alagad ya ngayti, ka egay uru-urut nira in siyu manggid it kanira i pagpaꞌiguꞌan yat iti nga inampang ya. 23Iyan esa nga alagad nga talagang pagmaꞌa-maꞌalen ni Jesus, magꞌaꞌdung duꞌun it tepad ya. 24Sininyasan kanya ni Simon Pedro nga ingkutun ya in siyu manggid i pagpaꞌiguꞌan ni Jesus it iti nga inampang ya.
25Ta egay beken, simnandir kanya duꞌun it ki Jesus ka miningkut, nga maat ya, “Ampuꞌan, siyu bay paꞌaaten mu ngayan?”
26Maat i tubag ni Jesus, “Iyan begayan kut idiꞌtil ku nga tinapay, yanayan yan.” Pagkadiꞌtil yat tinapay duꞌut sabaw nga duꞌut didiꞌtilan, ipiyakawaꞌ ya na duꞌut ki Judas ngayting anak ni Simon Iscariote. 27Pagkakawaꞌ ni Judas it tinapay ngayti, nagpasarum na duꞌut kanya si Satanas.
Maat ni Jesus, “Ta, ereg-eregen mu nay kubwaten mu ngayan.”
28Mga beken ngayting kaꞌibaan nirat mamagkaꞌen, ega magkaꞌrutan nira in unuka inaat ni Jesus i atkayti. 29Sabap si Judas ngayti i magseskel it pirak nira, tanud niraytu, pagtaꞌgen si Judas it mangalang it kaꞌilangan nirat pistaꞌ, u pagtaꞌgen kanyat mamgay duꞌun it mga makukuriꞌ. 30Pagkakaꞌen ni Judas it ipiyakawaꞌ ngaytit kanya nga tinapay, napanaw na kanya. Delem na it iting uras.
Ipiyaꞌrut ni Jesus nga payluwan kanya ni Pedro
31Pagkagaring ni Judas ngayti, miyampang siꞌ si Jesus. Maat ya, “Naꞌbut na nga matanyag nay kabantugan ku, aku nga Taga Langit nga Ipiyanganak it Taw, baw sabap it aken, matanyag gasiꞌ i kabantugan it Ampuꞌang Diyus. 32Baw in sabap it aken, matanyag nay kabantugan it Ampuꞌang Diyus, kanya siꞌ i tumanyag it kabantugan ku nga Anak ya. Baw buwaten ya it kayti ngaytung lagi.
33Mga pagmaꞌalen nga bilang mga anak ku, dekeyeꞌ mana nga timpu nga iba mi paꞌ aku. Tegelen mi akut tulus temed, subung it ipiyagꞌaat kut mga kabilug mi nagang mga Judio i iꞌaat kut imyu kayti, nga daꞌkamu makaꞌaduꞌun it aduꞌunan ku.
34Itu nay baꞌgung urdin nga ibgay kut imyu. Kaꞌilangan nga magsigraras kamu it esa may esa. In magꞌuꞌunu i raras kut imyu, atkayan nagang pirmi i raras mit esa may esa. 35In magsigraras kamu, makilalaan it kadakel nga mga alagad ku kamu.”
36“Ay ari aduꞌunan mu, Ampuꞌan?” ingkut ni Simon Pedro.
Tubagen ni Jesus, maat ya, “Duꞌun it aduꞌunan ku daꞌka kabayaꞌ it aken kayti, temed tumundug ka naga yan it aken asat malangbusan.”
37“Ampuꞌan, unuka daꞌku kabayaꞌ it imu kayti?” ingkut siꞌ ni Pedro. “Yay matuud, ibgay kuy ginawa ku sabap it imu!”
38Pagtubag siꞌ ni Jesus, maat ya, “Unu, ibgay mu talagay ginawa mu sabap it aken? Kamatuudan tuy iꞌaat kut imu, parabir tumaraꞌuk i manuk, tulu na nga paylu mu sabap it aken.”
Zvasarudzwa nguva ino
Juan 13: TBWONT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1992, Wycliffe Bible Translators, Inc. All rights reserved.