Jobo 16:1-21

Ipapo Jobo wakapindura, akati: Ndatonzwa haŋgu mashoko mazhinji akaɗai; Imi mose muri ʋanyaradzi pasina. Ko mashoko asinamaturo acapera here? Cinyiko cinokugombedzera kupindura? Neni ʋo ndaigona kutaura semi; Kana mŋeya yenyu yaiʋa panɀimbo yomŋeya waŋgu, Ndaigona ʋo kuɓatanidza mashoko pamsoro penyu, Ndaikudzuŋgudzirai musoro waŋgu. Asi ndiŋgaɗai ndaikusimbisai nomuromo waŋgu, Nokuʋaraidza kwemiromo yaŋgu kwaikuremudzai. Kunyaŋge ndicitaura haŋgu, kucema kwaŋgu hakuremudzwi; Kunyaŋge ndikarega haŋgu, ndinotapudzirwa neiko? Asi ɀino iye wandinetsa; Imi maparadza imba yaŋgu yose. Imi makandiɓata nesimba, ndiɀo ɀinondipupurira; Kuwonda kwaŋgu kunondimukira, Kunondipupurira ɀakaipa pacena. Iye wakandibvarura pakutsamŋa kwake, akandiʋeŋga; Wakarumanya meno ake pamsoro paŋgu; Mudziʋisi waŋgu unondiwetsera meso ake. Ʋakandishamisira miromo yaʋo; Ʋakandiroʋa paɗama, ʋacindituka; Ʋanoʋuŋgana kuzorwa neni. Mŋari unondiisa kunaʋasakarurama; Unondikanda pamaʋoko aʋakaipa. Ndakaŋga ndicizorora haŋgu, iye akandivuna; Ɀirokwaɀo wakandiɓata nomumutsipa, akandiputsanya; Wakandiita ciposherwa cake. Miseʋe yake inondikomba kumatiʋi ose; Unopamura itȿo dzaŋgu, asiŋganzwiri nyasha; Unoɗururira nduru yaŋgu pasi. Unondikoromora nokukoromorakoromora; Unomhanyira kwandiri semhare. Ndakasonera magumbu paganda raŋgu, Ndakaradzika runyaŋga rwaŋgu muguruʋa. Ciso caŋgu catȿuka nokucema. Mumvuri worufu uri pamafuŋgiro ameso aŋgu. Kunyaŋge maʋoko aŋgu asiŋgaɗi hawo kuparadza, Nokunyeŋgetera kwaŋgu kwakanaka hako. Iwe nyika, rega hako kufukidza ropa raŋgu; Kucema kwaŋgu ŋgakushaiwe nɀimbo yokuzorora. Naɀino, tarirai, capupu caŋgu ciri kuɗeŋga, Iye, unondipupurira ɀakanaka, uri kumsoro. Shamŋari dzaŋgu dzinondishoʋora, Asi ziso raŋgu rinoɗurura misodzi yaŋgu pamberi paMŋari. Kuti aruramisire munhu pamberi paMŋari, Nomŋanakomana womunhu pamberi powokwake.