II Samueri 9:1-11

Ɀino Davidi wakati: Kucinomumŋe wakasara weimba yaSauro, wandiŋgaitira ɀakanaka nokuɗa kwaJonatani here? Ɀino kwakaŋga kucinomuranda weimba yaSauro wainzi Ziba, ʋakamuɗanira kunaDavidi; mambo akati kwaari: Ndiwe Ziba here? Iye akati: Muranda wenyu ndiye. Mambo akati kwaari: Hakucinomumŋe weimba yaSauro, wandiŋgaitira kunaka kwaMŋari here? Ziba akati kunamambo: Jonatani ucinomŋanakomana wakaremara tsoka. Mambo akati kwaari: Uripi? Ziba akati kunamambo: Tarirai, uri kumba kwaMakiri mŋanakomana waAmieri paRo‐debari. Ipapo mambo Davidi akatuma nhume kundomutora kumba kwaMakiri mŋanakomana waAmieri paRo‐debari. Naiɀoɀo Mefibosheti mŋanakomana waJonatani, mŋanakomana waSauro, akaȿika kunaDavidi, akawira pasi neciso cake, akamufugamira. Davidi akati: Mefibosheti! Iye akapindura, akati: Tarirai muranda wenyu. Davidi akati kwaari: Usatya, nokuti ɀirokwaɀo ndicakuitira ɀakanaka nokuɗa kwaJonatani ɓaɓa ʋako, ʋuye ndicakudzosera nyika yose yaɓaɓa ʋako Sauro; iwe ucagara ucidya ɀokudya patafura yaŋgu. Iye akamufugamira, akati: Muranda wenyu cinyiko, ɀamakatarira imbga yakafa seni? Ipapo mambo akaɗana Ziba muranda waSauro, akati kwaari: Ɀose ɀakaŋga ɀiri ɀaSauro neimba yake yose, ndakaɀipa mŋanakomana watenzi wako. Iwe unofanira kumurimira minda, iwe naʋanakomana ʋako, naʋaranda ʋako, nokukohwa micero, kuti mŋanakomana watenzi wako aʋe neɀokudya ɀaaŋgadya; asi Mefibosheti mŋanakomana watenzi wako, ucagara acidya ɀokudya patafura yaŋgu. Ɀino Ziba waiʋa naʋanakomana ʋanegumi naʋashanu naʋaranda ʋanamakumi maʋiri. Ipapo Ziba akati kunamambo: Muranda wenyu ucaita ɀose ɀinorairwa muranda wenyu nashe waŋgu mambo. Mambo akati: Kana ari Mefibosheti, iye ucaramba acidya patafura yaŋgu, somumŋe waʋanakomana ʋamambo.