II Samueri 12:24-31

Davidi akanyaradza mukadzi wake Bati‐sheba, akapinda kwaari, akaʋata naye, iye akaɓereka mŋanakomana, akamutumidza zita rinonzi Soromoni. Iye akaɗikanwa naJehova. Jehova akatuma shoko nomuromo waNatani muprofita, akamutumidza zita rinonzi Jedidia, nokuɗa kwaJehova. Ɀino Joabi akandorwa neRaba, guta raʋana ʋaAmoni, akakunda muzinda. Joabi akatuma nhume kunaDavidi, akati: Ndandorwa neRaba, ndikakunda guta remvura. Naiɀoɀo ɀino, ʋuŋganidzai ʋanhu ʋakasara, mudzike matente enyu paguta, murikunde, ini ndirege kuzokunda guta, rikatumidzwa zita raŋgu. Davidi akaʋuŋganidza ʋanhu ʋose, ʋakaenda Raba, ʋakarwa naro, ʋakarikunda. Akabvisa korona yamambo waʋo pamusoro wake; iyo yakaȿika tarenta rimŋe rendarama pakurema kwayo, ʋuye yakaŋga inamabge anokosha, ikaiswa pamusoro waDavidi. Akapamba ɀizhinji kwaɀo paguta iro. Akaɓuɗisa ʋo ʋanhu ʋakaŋga ʋari’mo, akaʋaɓatisa namajeko, nembambo dzamatare, namasanhu amatare, akaʋaseʋenzesa pakuita ɀitina; akaita saiɀoɀo namaguta ose aʋana ʋaAmoni. Davidi naʋanhu ʋose ʋakadzokera Jerusarema.

Zvemahara. Hurongwa neZviverengwa zveKuzvipira maringe neII Samueri 12:24-31