Matiu 3
3
Yohana Mǝbatisǝma gilǝki njar ace Yesu
(Markus 1:1-8; Luka 3:1-18; Yohana 1:19-28)
1Arǝ abaku mǝno ka, Yohana Mǝbatisǝma yiu kǝ hamnǝ cau a ɓabondo a bu-nzali Yahudi 2kǝ na ama, “Wu pwanzali wu pǝlǝ nzǝm wun arǝ acauɓikea ma'wun, ace mǝnana Domurǝm mala kuli gbashina.” 3Yohana Mǝbatisǝma ka nda ɓwa mǝnana Ishaya mǝɓangna mala Ɓakuli bang ce ama:
“Ɓe ɓwa kǝ hama
nǝ giu mǝcande
a ɓabondo kǝ na ama,
‘Wu gilǝki tanjar
mala Mǝtalabangŋo.
Wu tamsǝ anjarkusǝu ace
pǝrapǝra.’ ”#3:3 Ɓalli gbal aɓa: Isha 40:3.
4Agir-nggurǝu mala Yohana mana oasǝ ka à tea nǝ nyang kalakadambi. Nggur-ɓunu male ka nggú na. Girlina male ka doshi na andǝ nyi-pu.#3:4 Ɓalli gbal aɓa: 2Amur 1:8. 5Ɓwapǝndǝa pur aɓa nggeala Urǝshalima, andǝ aɓea la a bu-nzali Yahudi kat, andǝ bareban mala Nggeasala Jodan kat, à o abani. 6À bang acauɓikea malea, sǝ pakkia wia batisǝma a Nggeasala Jodan.
7Sǝ lang Yohana sǝn amǝ Farisi andǝ amǝ Saduki à nǝ̀ nggǝ yiu pas abani ace mǝnana ɓǝa pakkia wia batisǝma ka, nea wia ama, “Wun amuna an'yau barya! Yan nun kir wun ama ɓǝ̀ wu ɓanggi ɓashi mala Ɓakuli mǝnana kǝ yiu ka?#3:7 Ɓalli gbal aɓa: Mat 12:34; 23:33. 8Wu pak agir mǝnana à nǝ̀ lǝmndǝ ama wu pwana'nzali, wu ɗekina acauɓikea ma'wun ngga. 9Sǝ wu kǝa sǝni kǝla ɗenyicau ma'wun mǝnana ama Ibǝrayim ngga kà wun na ka, nǝ̀ amsǝ wun ɗang. Ən nggǝ bangga wun, Ɓakuli nǝ̀ gandǝ loasǝ atali mǝnia à nǝ̀ pǝlǝì Ibǝrayim amǝkau. 10Ko ado ka Ɓakuli kwakina kun bero a tǝr anggun. Nggun mǝnana kat pusǝ ɓǝle mǝɓoarne raka, à nǝ̀ kwari à nǝ̀ turri a bǝsa.
11“Ən nggǝ pakka wun batisǝma nǝ mur mǝnana nǝ̀ lǝmndǝ ama wu nyingŋǝna acauɓikea ma'wun. Nǝ nzǝmo ka, ɓeɓwa na nǝ̀ ngga yiu mǝnana kutiam nǝ bangŋo ka, mǝnana yale nkura kusǝì ka ǝn kārǝa mǝ bwali a buam ɗang. Yì ka, nǝ̀ yia pakka wun batisǝma nǝ Bangŋo Mǝfele andǝ bǝsa. 12Kwar sarǝgir male na a bui, nǝ̀ yia pusǝ kwá arǝ mǝsǝsa a katǝra, nǝ̀ so mǝsǝsa a ba, sǝ kwá ka nǝ̀ pisǝì a bǝsa mǝnana panǝ linggi raka.”
Yohana pakki Yesu batisǝma
(Markus 1:9-11; Luka 3:21-22)
13Aɓalǝ anonggeo mǝno ka, Yesu pur a Galili sǝ yiu a Nggeasala Jodan ace mǝnana Yohana ɓǝ̀ yi pakki wi batisǝma ka. 14Sǝ Yohana ka ɓariki ama nǝ̀ ɓinǝi wi. Ne wi ama, “Mim ɓwan mǝ nǝ ká abano ace batisǝma ka a nyare a yiu a banam mǝ pakko batisǝma!”
15Sǝ Yesu pa eare ka ne wi ama, “Ɗeki ɓǝ̀ pa ana adyan. Anggo ka sǝ sǝm nǝ̀ lumsǝ agir kat mǝnana Ɓakuli earkicea ka.” Pǝlǝa Yohana eare pakki wi batisǝma.
16Lang Yohana malǝna pakki Yesu batisǝma, sǝ Yesu eapi mur ani ka, kara kuli mǝnna sǝ sǝn Bangŋo mala Ɓakuli aban sulǝo kǝla kutu, yi do amuri. 17Aɓwana ok gi Ɓakuli nacau a kuli ama, “Mǝnia ka nda Munem, mǝnana ǝn earkiyice, mǝnana bumam kǝ pwasǝa rǝì kǝrkǝr ka.”
Zvasarudzwa nguva ino
Matiu 3: mbu
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc. and © The Nigeria Bible Translation Trust 2016