Enzũko 4
4
Abana ba Adamu. Kaĩna akĩta Abele
1Neryo omundu oyo mwĩmya mũkalĩwe Eva, naye mwaheka obukule, mwabuta Kaĩna. Neryo mwabũga ati, Nabiributa omwana wʼobulume busana nʼOmwami Mukulu. 2Kandi mwabuta mugala wabo ye Abele. Neryo Abele abya mũlĩsya wʼesyombũlĩ, nĩkwa Kaĩna abya mũlĩmĩ wʼamalima. 3Neryo ebindi biro byabere byabilaba Kaĩna mwaletera Omwami Mukulu yʼebĩgũma byʼekitaka eribya buhere. 4Nĩkwa Abele, mwaleta ebyana byʼerĩmbere byʼesyombũlĩ syʼekĩhyo kiwe nʼebĩsabũ byasyo. Neryo Omwami Mukulu mwasĩma Abele nʼobuhere buwe. 5Nĩkwa mwatasĩma Kaĩna nʼobuhere buwe. Neryo Kaĩna mwahitana kutsibu, nʼobũsũ buwe mobwahĩna. 6Neryo Omwami Mukulu mwabũga na Kaĩna ati, Busana nakĩ ukahitana nʼobũsũ bwawe bwamahĩna? 7Wamakola ndeke, sĩwendĩsyalĩgwa kwehĩ? neryo wamatindakola ndeke, ebibi bĩnasũnamĩre oko lũkyo, iwakola ekyo wanzĩre, nĩkwa utabale kubyo. 8Neryo Kaĩna mwabũga na mugala wabo ye Abele, ati, Tugende eyĩhya omolĩ. Neryo omugulu babya omolĩ, Kaĩna mwagulukira uku mugala wabo ye Abele, mwamwĩta.
Eritswerwa lya Kaĩna
9Neryo Omwami Mukulu mwabũga na Kaĩna ati, Ko mugala wenyũ Abele ali hahi kwehĩ? Neryo mwamũsũbĩrya ati, Sĩnyasĩ, ĩngye indi mũteya wa mugala wetu kwehĩ? 10Neryo Nyamuhanga mwabũga ati, Wabirikolakĩ kwehĩ? Omulenge wʼomusasi wa mugala wenyũ akanyiririra erĩlũa oko kitaka. 11Na lino uli mutakirwa busana nʼekitaka, ekyabiriangirira omusasi wa mugala wenyũ oko byala byawe. 12Omugulu ukalima ekitaka, sikyendisyakuha amaka wakyo. Wasyabya mũsayĩ nʼomũgendĩ-gendĩ omo kihugo. 13Neryo Kaĩna mwabũga nʼOmwami Mukulu ati, Erisuyira lyage lĩlabĩre nʼobũlĩto okwʼihekwa. 14Lebaya, mũnabwĩre wabirimbiga oko kitaka, nasyabĩswa nʼoko bũsũ bwawe, kandi nasyabya mũsayĩ nʼomũgendĩ-gendĩ omo kihugo, neryo omundu akasyabya amanyeya ĩnĩanyĩta. 15Neryo Omwami Mukulu mwabũga naye ati, Omundundi oyo wasyĩta Kaĩna, asyakĩsĩrĩbwako ngendo sirinda. Neryo Omwami Mukulu mwahĩra uku Kaĩna kwʼekiminyikalo, omundu amamweya ĩsyamwĩta.
16Neryo Kaĩna mwalũa omo meso wʼOmwami Mukulu, mwĩkala omo kihugo kyʼeNodĩ, oko luhande lwʼendata wʼeEdenĩ. 17Neryo Kaĩna mwĩmya omũkalĩ wuwe, naye mwaheka obukule, mwabuta Enoka. Naye mwahĩmba omũyĩ, mwahula erĩna lyʼomũyĩ oyo omo lĩna lya mugala wuwe Enoka. 18Neryo Enoka mwabuta Ĩradĩ, na Ĩradĩ mwabuta Mehũyalĩ, na Mehũyalĩ mwabuta Metũsela, na Metũsela mwabuta Lameke. 19Neryo Lameke mwahĩkya abakalĩ babiri. Erĩna lyʼomuguma lyabya Ada, nʼerĩna lyʼowʼakabiri ni Sila. 20Neryo Ada mwahuta Yabalĩ. Neryo Yabalĩ abya Ĩse wʼabandu abĩkere omo mahema, ibawite esyonde. 21Nʼerĩna lyʼomugala wabo lyabya Yũbalĩ, Yũbalĩ abya ĩse wʼabawatĩ bʼebinanga nʼesyonyamulera. 22Neryo Sila naye mwabuta Tũbalĩ-Kaĩna, omũhesĩ wʼebyuma byʼemiringa nʼebyuma, na mwali wabo Tũbalĩ-Kaĩna abya Nama. 23Neryo Lameke mwabũga nʼabakalĩ buwe babiri ati: Ada na Sila, myowe omulenge wage:
Ĩnywe bakalĩ ba Lameke, muhulikirire ekyo ngabũga:
Kusangwa nabĩrĩta omundu busana nʼerĩnyagalya,
Nʼomũlwana busana nʼerinyibanda:
24Kumbe Kaĩna asyakĩsĩbwa ngendo sirinda
Kwenene Lameke asyakĩsĩbwa ngendo makũmĩ alinda nʼesirinda.
25Neryo Adamu mwĩmya mũkalĩ wuwe kandi, naye mwabuta mugala, mwahula erĩna liwe mo Setĩ, kusangwa ati, Nyamuhanga abirinyibanira ogundi mwana omo mwanya wa Abele, kusangwa Kaĩna mwamwĩta. 26Setĩ naye mwabuta mugala, neryo mwahula erĩna liwe mo Enosĩ. Neryo oko mugulu oyo abandu mobatsũka eribirikira oko lĩna lyʼOmwami Mukulu.
Zvasarudzwa nguva ino
Enzũko 4: KB80
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Bible in Kinandi © Bible Society of the Democratic Republic of Congo, and Bible Society of Uganda, 1980.