Mwaluko 12
12
Nguluwi kangumchema Abulamu yaileche isi ya heye
1Lelo Mkulu Nguluwi nakamlonjela Abulamu, “Uche kuli isi ya hegwe, uwaleche wang'holozo na ng'handa ya mhaza wa hegwe, ulute kuli isi yondikulajila.
2“Ndokudita hegwe uwe nhanzi iwele na ukulu,
ndokutambichiza na kulikwiniza itagwa lyako,
leka nagwe uwe utambichizo kwa wanji.
3Yokutambichiza, ndomtambichiza, yokupanjila, ndompanjila.
Kwa kukolela hegwe, ndozitambichiza nhanzi za isi zeng'ha.”
4Lelo Abulamu nakoka kota Mkulu Nguluwi vyonayamlajize, na Loti nakaluta hamwe na heye. Abulamu nayali na miyaka makumi saba na jihano loyalawile Halani. 5Abulamu nakamhola mdala wa heye Salai, na Loti mwana wa mng'holoze, hamwe na lufufu lwao lweng'ha na wanhu weng'ha nawawaholile ako Halani, nawoka kuluta isi ya Kanaani. Nalowenjile isi ya Kanaani, 6Abulamu nakakola hagati ha isi mbaka Shekemu, honhu Helile hawele na igodi likulu lya Mole. Mhela awo, Wakanaani nawali ndo wenyeng'haye wa isi ayo. 7Ndo Mkulu Nguluwi nakamlawila Abulamu, nakamlonjela, “Lulelo lwako ndowapa isi ayi.” Lelo Abulamu nakazenga honhu ha kulavila nhambiko kwa mbuli ya Mkulu Nguluwi yamlawile. 8Hamba Abulamu nakoka, nakalutila kuli isi ya vidunda kolilawilaga isanya mwa Beteli, nakazenga chibumuli hagati mwa muji wa Beteli nzingo ya kolizinjilaga isanya, na muji wa Ayi nzingo ya kolilawilaga isanya. Aho kahi nakamzenjela Mkulu Nguluwi honhu ha kulavila nhambiko na kumlanda kwa itagwa lyake. 9Hamba Abulamu nakalutilila na majendo ubanzi wa Negebu.
Abulamu kuli isi ya Misili
10Mhela awo, nzala nailawila muisi. Nayali nzala ya maduga, ahyo Abulamu naimgana kuluta Misili na kikala ako kwa mhela uchefu. 11Loyawele behi na Misili, Abulamu nakamlonjela Salai mchewake, “Ndivizela kota hegwe kwa mdala ulinguwakwega wanhu kwa vila kunoga lukami. 12Wamisili lowokona wolonga, ‘Ayu ndo mchewake,’ hamba wong'hopola ila hegwe wokuleka mkomu. 13Lelo walonjele kota hegwe kwa lumbu wa heni leka mbuli zindutile goya, wandeche ndiwe mkomu kwa mbuli ya hegwe.” 14Lelo Abulamu loyafichile muisi ya Misili, wenyeng'haye wa ako nawamona Salai kota ndo mdala yanojile lukami. 15Wakulu wa chitala wa Falao lowamuwene Salai, nawamtogola kwa Falao. Lelo Salai nakahilikwa haluga ha Falao. 16Lelo, kwa mbuli ya heye, Falao nakamuwika Abulamu, nakabochela ming'holo na misenga na idogowi ilume na vitumagwa walume na wadala na idogowi idala na ngamiya.
17Ila Mkulu Nguluwi nakamgaza Falao na wanhu weng'ha wawele mng'handa ya heye kwa kuwadita wawe na matamwa makulu kwa mbuli ya Salai, mchewake Abulamu. 18Falao nakamchema Abulamu, nakamuuza, “Ndo chinhu chachi achi chounditile? Lekachoni nahundonjele kota Salai ka mchewako? 19Lekachoni nakulonga ka lumbu wa hegwe mbaka nandimhola yawe mchewangu? Lelo mchewako ndo ayo, umhole ulute.” 20Hamba Falao nakawalajiza wanhu wa heye, na hewo wamleche Abulamu yalute mnzila yawele na mchewake na lufufu lwake lweng'ha.
Zvasarudzwa nguva ino
Mwaluko 12: Chividunda
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators