THILSIEMBUL 9
9
Noah Kawma Pathien Thugawlh
1Chun, Pathien in Noah leh a chapate chuh a vangsak a, a kawm u ah, “Chi tamtak suona hung pung in, lei hi luoh dim un.#Tsb 1.28 2Lei chunga sa tin cheng leh, chung leng vacha tincheng leh leichung a bawkvak tincheng leh tuisuohgiet a nga tincheng chun nanguh lauhna leh kihchakna nei un au, na khut u a piek ahih tâk ziekun. 3Thilhing tawithei taphawt chuh nang uh dingin an hi’n au; ancheh-lohing ka hun piek bang khan bangkim ka hun pie vek hi. 4Amahvang chuh, sa a hinna thisan um zing puma na nek loh dinguh ahi, a ziek chuh, thisan chuh hinna ahi ngâla.#Tpd 7.26, 27; 17.10-14; 19.26; Dann 12.16, 23; 15.23 5Chun, na hinna thisan phuba chuh la ngêi ngêi ding ka hi; gamsa tin cheng chungah phuba lang ka ting, mihiem chung ale, mitin a suohpih chung ale mihing hinna phuba chuh la ding ka hi. 6Kuole mihiem thisan suoh ta chuh mihiem mah in amah thisan le a suoh ding ahi; mihiem hi Pathien batna nei a siem ahi ngâla.#Pdn 20.13; Tsb 1.26
7“Nang u chuh chi tamtak sep in hung pung unla, tichun na suonteu chun lei hi a hun luoh dim theihna dingun,” a ti a.#Tsb 1.28
8Chun, Pathien in Noah leh a kawma um a chapate kawm achun thu a gena, 9“Keimah ngêi in na kawm u leh na nung u a na suonteu kawm ale ka thugawlh chuh ka sudet hi; 10Na kawm u a um thilhing tincheng vachate, ganchate, gamsa tin chengte kawma le; lawng apat a hung pawt, leia gamsa tin cheng haw chanin. 11Chun, na kawm a ka thugawlh chuh sudet ing ka ting; thilhing chengcheng tuilet a sukmang in um kit ta puo’n tin; lei susie dingin le tuisang let kit ta puo’n a,” ti’n a gen a. 12Chun, Pathien mah in, “Ziehi kei leh nang u leh na kawm u a thilhing tincheng te leh khang um zel ding chana ka thugawlh tawp lo ding tiemtehna chuh ahi. 13Mei ah ka sakhizozum ka um sak a, zie chuh kei leh lei kal a ka thugawlh melchikna ding chuh hi’n a. 14Chun, hiti hi hung hi’n tin, lei chunga meipi ka zam sak chung achun sakhizozum chuh kilang intin, 15kei leh nang u leh thilhingte kal a ka thuthun chuh hezing ing ka ting, tichun, phehlevo nei cheng sumang dingin tuisanglet kit ta puo’n a. 16Sakhizozum chuh mei laka ahung zâm tieng zie chuh mu’ng ka ting; kei leh leichung a thilhing um chengcheng tawh kal a kumkhuo a dinga ka thugawlh chuh hezing ing ka. 17Chun, Pathien mah chun Noah kieng ah, zie chuh keimah leh lei chunga thilhing um chengcheng kal a ka thugawlh sukdet melchikna ahi,” a ti a.
Noah leh a Chapate
18Chun, Noah chapate lawng a pawt haw chuh Shem, Ham leh Japheth ahiu a, Ham chuh Kanaan pa ahi. 19Zie mi thum te chuh Noah chapate ahiu a, zie mite apat chun leichung pumpi ah mihiem a hung kithehzâk tau hi.
20Chun, Noah chuh loneimi a hung hi a, grep hun chîng masapen chuh ahi. 21Tichun, uain chuh a dawna, a kham ta a, tichun puon-In achun a kuolsie ta a. 22Chun, Ham, Kanaan pa chun a pa sangawn a kuol chuh a muh phetin pawlama a suohpihte nih chuh a va hilh a. 23Tichun, Shem leh Japheth chun puon a lau a, a liengko u a zawn in kinungchawn in a chieh u a, a pau kuolsie chuh a khuh tau a; a mai un lehlam a ngau, a pau kuolsie chuh a mu puou hi. 24Chun, Noah chuh a uain kham a hung pil phetin, a chapa naupang zaw’n a chunga a thilhih zie chuh a he ta a. 25Khutichun, “Kanaan chuh hansie dawl in um hen la;
A suohpihte suokte suok in um hen,” a ti a.
26“Lalpa, Shem Pathien chuh pahchak in um hen la;
Kanaan chuh a suok in um hen.
27Pathien in Japheth chuh sulien henla,
Shem puon-In haw achun cheng henla;
Kanaan chuh a suok in um hen,” a ti a.
28Chun, Noah chuh tuilet nung chun kum zathum leh kum sawmnga a dam a, 29Tichun, Noah damsung chuh kum zakuo leh kum sawmnga ahi a: chun, a thi ta a.
Zvasarudzwa nguva ino
THILSIEMBUL 9: GANGBSI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.