Awˬ hkuiˉ puiˍ ve li‸ 2
2
1Hkʼe te leh Gʼuiˬsha lehˬ, miˬguiˬ mvuhˇ naw ma hkʼa peu-eˬ hta‸ te hpanˍ taˍ peuˬ ve yoˬ. 2Suhˍ nyi teˇ nyi gaˬ htaˇ, Gʼuiˬsha lehˬ Yawˇ hkʼa te tuˬ cawˬ ve awˬ ceuˬ hkʼa peu-eˬ hta‸ te hpanˍ peuˬ ve yoˬ. 3Gʼuiˬsha lehˬ, suhˍ nyi teˇ nyi hta‸ awˬ bon na‸ piˇ leh awˬ nyi oˇ ve hta‸ da‸ kehˬ piˇ lawˬ ve yoˬ. Awˬ lawn kʼo, awˬ nyi oˇ ve teˇ nyi awˬ hkʼaw lo Yawˇ hkʼa peu-eˬ ve hta‸ te hpanˍ peuˬ leh gʼaˇ jehˇ taˍ ve pa taw yoˬ. 4Chi ve lehˬ, Gʼuiˬsha miˬguiˬ leh mvuhˇ naw ma hta‸ hkʼaˬ hkʼe te hpanˍ taˍ ve awˬ lawn hpeh‸ ve yoˬ.
Eˍdenˍ hko
5Jawˇmawˇ Gʼuiˬsha lehˬ, miˬguiˬ leh mvuhˇ naw ma hta‸ te hpanˍ gehˇ sheˬ ve teˇ yanˇ, miˬguiˬ chi ve awˬ hkʼoˆ lo zuhˇ, mvuh‸, hkʼe ve teˇ ceuˬ ka‸ maˇ cawˬ. Awˬ lawn kʼo, Gʼuiˬsha lehˬ miˬguiˬ hkʼoˆ lo mvuhˇ yeˬ maˇ laˬ piˇ sheˬ ve pa taw yoˬ. Chi hkʼoˆ, miˬguiˬ hta‸ mehˇ leh te caˇ tuˬ chaw yaˇ teˇ gʼaˇ ka‸ maˇ cawˬ sheˬ. 6Teˇ pawˆ pawˆ iˉ kaˆ uiˍ taˆ la leh miˬguiˬ hta‸ iˉ kaˆ nehˆ la piˇ chehˇ ve yoˬ.
7Oˇ htaˇ, Jawˇmawˇ Gʼuiˬsha lehˬ je‸ hta‸ yuˬ leh chaw yaˇ #2:7 Chi lehˬ, Heˍbrehˇ hkawˇ Aˍdanˍ teh‸ kʼoˆ ve yoˬ. ve awˬ ho‸ awˬ han hkʼa shuˍ te peuˬ hkʼaw‸ nawˉ, yawˇ ve naˍ hkʼawˇ awˬ hkʼaw lo a sha‸ te‸ ve awˬ shaˉ meuˆ keu piˇ ve yoˬ. Hkʼe te leh chaw yaˇ a sha‸ te‸ la ve yoˬ.
8Peuˬ hkʼaw‸ nawˉ, Gʼuiˬsha lehˬ mvuhˇ nyi tawˆ hpawˇ lo Eˍdenˍ teh‸ kʼoˆ ve hko lonˉ teˇ maˬ te hpanˍ leh, Yawˇ te hpanˍ taˍ ve chaw yaˇ hta‸ oˇ kaˬ lo chehˇ tcuh ve yoˬ. 9Yawˇ lehˬ oˇ kaˬ lo nyi sha jaˇ leh mehˬ jaˇ ve iˉ shiˍ cehˬ laiˉ ceuˬ cawˬ la piˇ ve yoˬ. Hko oˇ ve awˬ kʼaw ji lo, a sha‸ te‸ piˇ lawˬ ve suhˆ cehˬ leh da‸ ve leh maˇ da‸ ve hta‸ shiˍ puiˉ ve suhˆ cehˬ hta‸ cawˬ la piˇ ve yoˬ.
10Eˍdenˍ awˬ hkʼaw lo iˉ kaˆ lawˬ lonˉ teˇ maˬ cawˬ leh, hko hkʼaw hkʼa cawˬ taˍ ve iˉ shiˍ cehˬ teˇ hpaˍ hta‸ iˉ kaˆ piˇ chehˇ ve yoˬ. Iˉ kaˆ lawˬ chi ve hko awˬ baˬ lo gaˬ ve teˇ yanˇ, iˉ kaˆ lawˬ kʼaˉ awˇ maˬ pehˬ kʼai ve yoˬ. 11Awˉ lawˉ peuˇ ve iˉ kaˆ lawˬ kʼaˉ lehˬ Hpiˇshanˍ teh‸ meh leh shi tawˆ ve Haˍviˇlaˍ mvuhˇmiˬ hta‸ hpanˍ ya‸-e ve yoˬ. 12(Da‸ jaˇ ve shi, da‸ jaˇ ve naˍ manˇ hawnˉ leh da‸ jaˇ ve shehnˉ shiˍ teˇ hpaˍ htawˇ oˇ kaˬ lo tawˆ ve yoˬ.) 13Iˉ kaˆ lawˬ kʼaˉ nyiˇ maˬ teˇ maˬ lehˬ, Giˇhonˍ teh‸ meh leh Kuˇshaˆ mvuhˇmiˬ hta‸ hpanˍ ya‸-e ve yoˬ. 14Iˉ kaˆ lawˬ kʼaˉ shehˆ maˬ teˇ maˬ lehˬ, Tiˇgeˍriˆ teh‸ meh leh Aˍsuˇriˆ mvuhˇmiˬ mvuhˇ nyi tawˆ hpawˇ lo ya‸-e taˍ ve yoˬ. Iˉ kaˆ lawˬ awˇ maˬ teˇ maˬ lehˬ Uˉhpaˍraˆ teh‸ meh ve yoˬ.
15Jawˇmawˇ Gʼuiˬsha lehˬ, Eˍdenˍ hko hta‸ ha‸ shaˉ leh muiˬ caˇ tuˬ, chaw yaˇ hta‸ hko oˇ ve awˬ hkʼaw lo chehˇ tcuh taˍ ve yoˬ. 16Yawˇ chaw yaˇ hta‸ kʼoˆ piˇ ve, Hko chi hkʼaw cawˬ taˍ ve iˉ shiˍ hkʼa peu-eˬ hta‸ nawˬ caˇ hpeh‸ ve yoˬ. 17Ya‸ hkʼaˇ, da‸ ve leh maˇ da‸ ve hta‸ shiˍ puiˉ ve suhˆ cehˬ oˇ ve teˇ cehˬ ve awˬ shiˍ hta‸ nawˬ taˇ caˇ. Nawˬ lehˬ suhˆ cehˬ oˇ ve teˇ cehˬ ve awˬ shiˍ hta‸ caˇ ve kʼo, awˬ tehˬ awˬ na gʼa suh tuˬ yoˬ, teh‸ kʼoˆ piˇ ve yoˬ.
18Oˇ ve hkʼaw‸ nawˉ Jawˇmawˇ Gʼuiˬsha kʼoˆ ve, Chaw yaˇ lehˬ yawˇ teˇ gʼaˇ tiˉ chehˇ ve maˇ da‸. Ngaˬ yawˇ hta‸ keunˍ da‸ ve awˬ chawˇ teˇ gʼaˇ ca piˇ shaˍ, teh‸ kʼoˆ ve yoˬ. 19Hkʼe te leh, Gʼuiˬsha lehˬ je‸ hta‸ yuˬ leh to nuˇ to shaˆ leh ngaˆ hkʼa peu-eˬ ve awˬ ho‸ awˬ han hta‸ te ve yoˬ. Oˇ ve hkʼa peu-eˬ Yawˇ chaw yaˇ geh yuˬ veu laˇ leh awˬ meh meh piˇ tcuh ve yoˬ. 20Hkʼe te leh, chaw yaˇ lehˬ ngaˆ leh to nuˇ to shaˆ oˇ ve hkʼa peu-eˬ hta‸ awˬ meh meh piˇ ve yoˬ. Oˇ ve teˇ nyi hta‸ tanˬ leh to nuˇ to shaˆ oˇ ve teˇ hpaˍ awˬ meh cawˬ la ve yoˬ. Ya‸ hkʼaˇ, chaw yaˇ lehˬ yawˇ hta‸ shuˍ da‸ ve awˬ chawˇ teˇ gʼaˇ ka‸ maˇ cawˬ sheˬ.
21Chi hta‸ pa taw, Jawˇmawˇ Gʼuiˬsha lehˬ chaw yaˇ hta‸ zuh‸ muiˉ kʼa piˇ lawˬ leh yawˇ zuh‸ muiˉ kʼa chehˇ htaˇ, yawˇ ve nyi kuˇ teˇ maˬ hta‸ awˉ yuˬ ve yoˬ. Oˇ kaˬ lo awˬ shaˍ kʼaw‸ biˇ la piˇ ve yoˬ. 22Yawˇ lehˬ nyi kuˇ oˇ ve hta‸ yuˬ leh yaˇ miˇ teˇ gʼaˇ hta‸ te hpanˍ ve yoˬ. Peuˬ leh yaˇ miˇ oˇ ve hta‸ hawˉ hkʼaˆ geh lo shiˍ laˬ ve yoˬ. 23Oˇ htaˇ hawˉ hkʼaˆ kʼoˆ ve,
Chi lehˬ ngaˬ ve awˬ mu‸ ku hkʼaw ve awˬ mu‸ ku,
ngaˬ ve awˬ shaˍ hkʼaw ve awˬ shaˍ,
chi ve hta‸ yaˇ miˇ teh‸ gʼa kʼoˆ tuˬ yoˬ. Awˬ lawn kʼo, yawˇ hta‸ hawˉ hkʼaˆ awˬ hkʼaw lo yuˬ tawˆ taˍ ve pa taw yo, teh‸ kʼoˆ ve yoˬ.
24Chi hta‸ pa taw, hawˉ hkʼaˆ lehˬ yawˇ ve awˬ pa awˬ e hta‸ hpaˆ da‸ taˉ leh, yawˇ ve awˬ miˇ ma hta‸ caˉ da‸ ve awˬ hkʼaw lo yawˇ huiˉ maˬ teˇ suhˍ teˇ shaˍ tiˉ hpeh‸ la tuˬ yoˬ.
25Yawˇ huiˉ maˬ lehˬ, awˬ kʼu nyi hpeh‸ ve yoˬ. Ya‸ hkʼaˇ, yawˇ huiˉ maˬ teˇ gʼaˇ hta‸ teˇ gʼaˇ nyi leh ya‸ taw ve teˇ ceuˬ maˇ cawˬ.
Currently Selected:
Awˬ hkuiˉ puiˍ ve li‸ 2: LHBE
Označeno
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.