LUK 22
22
Ee-nú mɛ ba Jesu
(Zɔk Mt 26.1-5; Mk 14.1-2; Jn 11.45-53)
1Gbaŋa brɛt nɛ̀ hao bo sɛnɛ na, nɛ̀‘i sa'e Paska, hɛɗa kaɗi, 2ɓɛɛ o gasa wan-ɗafi-sɔ̧ in o wi-usi-heembea kii war mɛ gbɛ Jesu; ɓɛɛ yuwar-a bo na, wen wa yu so nɛ́ o bíí. 3Nɛ́ mɔ'ɔ nɛ̀ Satan yee kɔ̧́ see Judas, nɛ̀ wa sa'e Iskariot; a̧ nɛ́ ŋma bíí mgbara o ŋgaiwi ko Jesu ɓu-zua-yiitoo mbɛt. 4A̧ nɛɛ mɛ e nú in o gasa wan-ɗafi-sɔ̧ in o gasawi ko o wi-pɛm Tua ko Sɔ̧, kii nɛ̀ war mɛ e Jesu er-wa. 5Wa kpaa desee, ɓɛɛ wa ha̧ nú mɛ ha̧ sede ha̧ Judas. 6Nɛ́ mɔ'ɔ nɛ̀ Judas kpɛka, ɓɛɛ kii war mɛ ba Jesu ha̧ wa nɛ̀ ti fui.
Nyɔŋmɔ Paska
(Zɔk Mt 26.17-25; Mk 14.12-21; Jn 13.21-30)
7Ŋgimbi nyɔŋa brɛt nɛ̀ hao bo sɛnɛ na hɔa; wese'i nɛ́ wese gɔna be-sami Paska. 8Nɛ́ mɔ'ɔ nɛ̀ Jesu toma Pierre in Jean, ɓɛɛ tɔ̧: «Ɛ̀nɛ̀ nɛ́, ɛ̀nɛ̀ ɗáfí nyɔŋmɔ Paska h’ɛ́ɛ́ nyɔŋ.» 9Ɓɛɛ wa ak a̧: «Ɛnɛ kɔ̧ɔ̧ h’ɛ́ɛ́ mɛ ɗafi nyɔŋmɔ‘i déè?» 10Ɓɛɛ a̧ kifi nú ha̧ wa: «Hɔa-a k’ɛ́nɛ́ saaye hegɔ, ɛnɛ tɛ kpa ŋma wiwii nɛ̀ tui yì nɛ̀ kpánà; ɛ̀nɛ̀ nɛ́ ɗoŋ-aa hɔ tɛ tua n'aa tɛ ye sɛnɛ, 11ɓɛɛ ɛ̀nɛ̀ tɔ̧́ ha̧ wan-tua'i: ‹Wan-usi-mɔ toma yɛ mɛ ak'nɛ́‘e ndé, fara nɛ̀‘i tɛ nyɔŋ mɔ sɛnɛ tɛ gbaŋa Paska in o ŋgaiwi kɔ‘i a̧a̧ déè nde?› 12Ɓɛɛ a̧ tɛ usi ŋma bɛr-tua mɛ ŋgɔn nɛ̀‘i ɗafa nɛ̀ de-a h’ɛ́nɛ́; bɛr-tua'i ɔ gasa, ɓɛɛ nɛ́ hi̧i̧ ɛ̀nɛ̀ tɛ ɗafi mɔ sɛnɛ.» 13Nɛ́ mɔ'ɔ nɛ̀ o ŋgaiwi nɔ‘i yaka, ɓɛɛ wa kpa mɔ lɛŋ nyɛm ɗoŋ mɔ nɛ̀ Jesu tɔ̧ɔ̧ ha̧ wa; ɓɛɛ wa ɗafi nyɔŋmɔ Paska.
Nyɔŋmɔ-kɛndao
(Zɔk Mt 26.26-30; Mk 14.22-26; 1 Kɔr 11.23-25)
14Ŋgimbi hɔa, ɓɛɛ Jesu duk nù ká̧ nyɔŋmɔ in o betom kɔ‘i, 15ɓɛɛ tɔ̧ ha̧ wa: «Mi kɔ̧ɔ̧ so nyɛmna ha̧‘m mɛ nyɔŋ mɔ Paska'ɛ in'nɛ̀ɛ́ nɛti sɛka'm zɔka bɔnɛ. 16Ɓɛɛ mi tɔ̧ h’ɛ́nɛ́, mi beka nyɔŋ mɔ Paska ɓɔna hɔ wese nɛ̀ kpasa Paska tɛ de zaŋ Wan ko Sɔ̧.» 17Wa ha̧a̧ ŋma be-ɗele ha̧ Jesu, ɓɛɛ a̧ de osoko ha̧ Sɔ̧, tɔ̧ nɛnɛ‘e: «Ɛ̀nɛ̀ bá, ɛ̀nɛ̀ nɔ́ dam'nɛ́ lɛŋ, 18wen mi tɔ̧ h’ɛ́nɛ́, mi beka nɔ yì waya-nyak-dɔ̧ɔ̧ ɓɔna hɔ wese nɛ̀ Wan ko Sɔ̧ tɛ hɔ.» 19Hɔ-ɗoŋ-aa, a̧ baa brɛt, de osoko ha̧ Sɔ̧, ɓɛɛ gbin ha̧ ha̧ wa, tɔ̧ nɛnɛ‘e: «Mɔ'ɔ nɛ́ kiitɛ‘m [a̧‘m há̧ wen ɛ́nɛ́; ɛ̀nɛ̀ dé mɔ‘i ha̧ tɛ‘nɛ́ mɛ mbaŋ ɗoŋ am.» 20Ɗoŋ nyɔŋmɔ, a̧ dee kale mɔ‘i nɛ̀ be-ɗele mbɛt; a̧ tɔ̧a̧: «Be-ɗele’ɛ nɛ́ mbe nɔɔ-tɔk nɛ̀ ɗoŋ tɔk-tɛ‘m nɛ̀ aa nù wen zu'nɛ́.»]
Jesu'e Judas tɛ e ɗɔra tɛ-wi
21«Zɔ́k, wi nɛ tɛ e ɗɔra tɛ‘m'i nyɔŋ nɛ́ mɔ kpɔk in am. 22Wen Bem ko bíí tɛ fe nyɛm nɛ̀ ɗoŋ mɔ nɛ̀ gɔna so, ɓɛɛ bɔnɛ a̧a̧ zu wi nɛ̀ ee ɗɔra tɛ Bem ko bíí‘i!» 23Ɓɛɛ wa ku̧ naŋ aka o ŋmaa: «Nɛ́ o mgbara yɛ a̧ tɛ de mɔ hegɔ o?»
Gasawi nɛ́ o?
24Wa ku̧u̧ naŋ zaŋa wen ha̧ wa mɛ iŋ gasawi mgbara wa.#Mt 18.1; Mk 9.34; Lk 9.46 25Ɓɛɛ Jesu tɔ̧ ha̧ wa: «O wannu ɔ wan zu o bíí kɔ‘i de nɛ̀ mɔɔ-wan zu wa, ɓɛɛ wa dee ha̧ o bíí nɛ̀ wa ɔ wan zu wa'i mɛ sa wa'e, o wi-de-mɔ nɛ̀ de-a.#Mt 20.25-27; Mk 10.42-44 26K’ɛ́nɛ́, bo hegɔ na; gasawi mgbara'nɛ́ a̧ é tɛ hee geɗek wi ga, ɓɛɛ o wi nɛ̀ ɔ wan zu'nɛ́ a̧ é tɛ hee o wi-de-tom ga mbɛt.#Mt 23.11; Mk 9.35 27Gasawi nɛ́ o? Nɛ́ wi nɛ̀ duk nù sɛn ká̧ nyɔŋmɔ náà, kóó nɛ́ wi nɛ̀ ha̧ nyɔŋmɔ nde? Kɔ‘m, mi duk mgbara'nɛ́ hee wi-de-tom ga!»#Jn 13.12-15
Mɔɔ-oi-tom ko betom ko Jesu
28«K’ɛ́nɛ́, ɛ́nɛ́ duka nɛ̀ nɔɔ-ŋgiɗi in am ɓɔnsɛnɛ tɛ o bɔnɛ nɛ̀ kpaa so'm. 29Ɓɛɛ mi tɛ de wan h’ɛ́nɛ́ hee mɔ'ɔ nɛ̀ Dáà kɔ‘m dee ha̧‘m ga. 30Hegɔ, ɛ́nɛ́ tɛ nyɔŋ mɔ in ɛ́nɛ́ tɛ nɔ mɔ kpɔk in am tɛ Wan kɔ‘m, ɓɛɛ ɛ́nɛ́ tɛ ya nù zu o damti h’ɛ́nɛ́ mɛ gɔn kita zu o zuduk be Israɛl ɓu-zua-yiitoo!»#Mt 19.28
Jesu tɔ̧a̧‘e Pierre tɛ kafi wi
(Zɔk Mt 26.31-35; Mk 14.27-31; Jn 13.36-38)
31Ɓɛɛ Jesu tɔ̧: «Simɔŋ, Simɔŋ wa, Satan kpaa war mɛ́ zɛk'nɛ́ hee mɔ'ɔ nɛ̀‘i zɛk nɛ̀ alkamaari’ɛ ga. 32Ɓɛɛ kɔ‘m, mi kɔfa Sɔ̧ wen ká kɔ̧ɔ̧ɗɔɔwen kɔ-mɛ tɛɛ kaɗi. Ɓɛɛ ŋgimbi nɛ̀ mɛ tɛ pii ɗoŋ tɛ‘m kaɗi, mɛ̀ há̧ nɔɔ-ŋgiɗi ha̧ o nya-mɛ.» 33Ɓɛɛ Pierre tɔ̧: «Gasa Wan, kóó nɛ́ zɔɓɔ, mi tɛ ye in'nɛ̀ɛ́, kóó nɛ́ fio, mi tɛ fe in'nɛ̀ɛ́ mbɛt.» 34Jesu kifa nú: «Pierre, mi tɔ̧ ha̧ mɛ, nɛti ha̧ gata-kɔra mɛ he mɔ sɔsɔɔ, mɛ tɛ kaf'am war taar'e, wi iŋ am na.»
35Ɓɛɛ a̧ ak wa: «Ŋgimbi n'am toma so nɛ̀ ɛ́nɛ́ nɛ̀ géé er, ŋgoɓo-sede bo na, ŋgoɓo-a-mɔ sɛnɛ bo na, ndárà bo na, ŋma mɔ ɓana'nɛ́ nde?» Ɓɛɛ wa kifi nú: «Weyaa, ŋma mɔ ɓan yɛ na.»#Mt 10.9-10; Mk 6.8-9; Lk 9.3; 10.4 36Ɓɛɛ a̧ tɔ̧ ha̧ wa woyo: «Ɓɛɛ kinii, wi nɛ̀ a̧a̧ nɛ̀ ŋgoɓo-sede a̧ bá, wi nɛ̀ a̧a̧ nɛ̀ ŋgoɓo-a-mɔ, a̧ bá mbɛt, ɓɛɛ wi nɛ̀ bo nɛ̀ gba-paa na, a̧ bá gba-laa kɔ̧-a̧ ɗɔ́r hi̧fi̧ nɛ̀ gba-paa, 37wen mi tɔ̧ h’ɛ́nɛ́, mɔ tɛ hɔ kànà zu'm nyɛm ɗoŋ mɔ nɛ̀ tɔ̧ɔ̧ zaŋ Yɔramɔ‘e: ‹Wa tɔra a̧ in o wi-de-ɗaŋmɔ kpɔk!› Hegɔ mɔ nɛ̀ wa tɔ̧ɔ̧ so zu'm'i tɛ hɔ gba̧a̧.»#Es 53.12 38Ɓɛɛ wa tɔ̧: «Gasa Wan, gba-paa yiitoo a̧a̧ hɛ̧ɛ̧.» Ɓɛɛ a̧ kifi nú ha̧ wa: «Nyɛma hegɔ.»
Kɔfa-sɔ̧ zu Kaya Te-nɔ̧́
(Zɔk Mt 26.36-46; Mk 14.32-42)
39Jesu gboa, ɓɛɛ yak si sɛn zu Kaya Te-nɔ̧́ hee mɔ'ɔ n'aa de ɓɔnsɛnɛ ga. Ɓɛɛ o ŋgaiwi kɔ̧-a̧ ndak ɗoŋ-aa si mɛ. 40Ɗoŋ nɛ̀ Jesu hɔɔ sɛn mɛ kaɗi, a̧ tɔ̧ɔ̧ ha̧ wa: «Ɛ̀nɛ̀ kɔ́fí Sɔ̧ wen ká weamɔ tɛɛ gan'nɛ.» 41A̧ yaka nyɛi̧ nɛ̀ wa tikiɗi, hee nyɛi̧a kii-ta nɛ̀‘i pi̧'ɛ ga, gbɛ zugur nù, ɓɛɛ kɔfi Sɔ̧ hee mɔ'ɔ ga: 42«Dáà, k’ɛ̀nɛ̀ nɛ́ kɔ̧a̧, ɛ̀nɛ̀ bá be-ɗele-bɔnɛ'ɛ yinɛ zu'm! Ɓɛɛ bó nɛ́ hee mɔ'ɔ n'am kɔ̧ɔ̧ ga na, nɛ́ hee mɔ'ɔ n’ɛnɛ kɔ̧ɔ̧ ga!» [ 43Nɛ́ mɔ'ɔ nɛ̀ ŋma betom ko Sɔ̧ zira nɛ̀ yiwese mɛ tɛnɛ, ɓɛɛ ha̧ nɔɔ-ŋgiɗi ha̧ a̧. 44A̧ kpaa dita-see nyɛmna, a̧ kɔfa Sɔ̧ batɛ, ɓɛɛ sɔbɛɛ hui nɛ̀ tɛ-a a nù hee bɔra-tɔk ga.]
45Ɗoŋ kɔfa-sɔ̧‘i, a̧ kura pii ɗoŋ pii tɛ o ŋgaiwi kɔ̧-a̧ ɓɛɛ kpa wa fara ɔɔ yá nɛ̀ ɗaŋsee. 46Ɓɛɛ a̧ tɔ̧ ha̧ wa: «Nɛ́ ge! Ɛ́nɛ́ ɔ nɛ́ yá? Ɛ̀nɛ̀ kúr, ɛ̀nɛ̀ kɔ́fí Sɔ̧, wen ká weamɔ tɛɛ gan'nɛ.»
Wa baa Jesu
(Zɔk Mt 26.47-56; Mk 14.43-50; Jn 18.3-11)
47Jesu ɓɔna fara tɔ̧ɔ̧ wen ɓɛɛ o wi-ba-a hɔ. Duka nɛ́ ŋma ŋgaiwi nɛ̀ wa sa'e Judas mgbara o ŋgaiwi ko Jesu ɓu-zua-yiitoo a̧ duka so ti. Nɛ́ mɔ'ɔ n'aa ɗɔŋa si katɛ Jesu mɛ dui nú-a. 48Ɓɛɛ Jesu ak a̧: «Nɛ́ tɛ̀ duia nú-wi a̧ mɛ e nɛ̀ ɗɔra tɛ Bem ko bíí nde?» 49O ŋgaiwi ko Jesu nɛ̀ yaa katɛ a̧ zɔka mɔ nɛ̀ tɛ hɔ, ɓɛɛ wa ak a̧: «Gasa Wan, ɛ̀ɛ̀ gɔ́m wa nɛ̀ gba-paa nde?» 50Ɓɛɛ ŋma ŋgaiwi gɔm wi-de-tom ko gasa wan-ɗafi-sɔ̧, ɓir zer-aa mɛ wiiko pi̧ nù. 51Ɓɛɛ Jesu tɔ̧: «Ɛ̀nɛ̀ é duk, nyɛma hegɔ.» Nɛ́ mɔ'ɔ nɛ̀ Jesu foo zer wi-de-tom'i, ɓɛɛ zer wi’ɛi si ɗoŋ duk oi-aa woyo.
52Ɓɛɛ Jesu tɔ̧ ha̧ o wi nɛ̀ tɛɛ mɛ ba a̧, o gasa wan-ɗafi-sɔ̧, o gasawi ko o wi-pɛm Tua ko Sɔ̧ in o gasawi: «Mi nɛ́ kpɔ̧i̧-gba̧a̧-nin s’ɛnɛ tɛ mɛ ba'm nɛ̀ gba-paa in o ɓira-te nde? 53Mi duka kɔ̧́ Tua ko Sɔ̧ in'nɛ̀ɛ́ wese lɛŋ, ɓɛɛ ɛnɛ ba'm na. Ɓɛɛ kinii nɛ́ ŋgimbi k’ɛ́nɛ́ in ko Wan-ɗaŋmɔ.»#22.53 Wàn-ɗáŋmɔ̀: texte tɔ̧̀ɔ̧́ nɛ́ ‹ŋgai kó tum›.#Lk 19.47; 21.37
Pierre kafa Jesu
(Zɔk Mt 26.57-58,69-75; Mk 14.53-54,66-72; Jn 18.12-18,25-27)
54Wa baa Jesu, mgbɔ a̧ yaknɛ, ye nɛ̀ tua ko gasa wan-ɗafi-sɔ̧, ɓɛɛ Pierre yor nɛ̀ nyɛi̧a-a ndak nɛ̀ ɗoŋ wa. 55O bíí yee so wee-gara ɔ nɛnɛ, ɓɛɛ Pierre hɔ duk mgbara wa. 56Ŋma kó-de-tom zɔka Pierre nɛ̀ duk nù ká̧ wee, mbaɗ‘a, ɓɛɛ tɔ̧: «Wi’ɛ bàá duk in a̧ mbɛt!» 57Ɓɛɛ Pierre kafi'e: «Kóò'ɛ, mi iŋ kɔ‘m wi’ɛi na.» 58Nɛ̀ ɗoŋ tikiɗi, ŋma bíí zɔka Pierre, ɓɛɛ tɔ̧: «Mɛ́ nɛ́ ŋma bíí mgbara wa mbɛt!» Ɓɛɛ Pierre tɔ̧: «Weyaa, bó nɛ́ mí na!» 59Dekpaa, ŋma bíí tɔ̧ɔ̧ woyo: «Kafɛ bo na, wi’ɛ bàá duk so in a̧; a̧ nɛ́ be Galilee mbɛt!» 60Ɓɛɛ Pierre tɔ̧: «Wi’ɛ, mi zii mgbara mɔ nɛ̀ mɛ kɔ̧ɔ̧ mɛ tɔ̧‘i na.» Tɛ́ kale ŋgimbi'i, hee mɔ'ɔ nɛ̀ Pierre ɓɔna fara tɔ̧ɔ̧ wen ga, gata-kɔra hèé mɔ. 61Nɛ́ mɔ'ɔ nɛ̀ Gasa Wan zika tɛ mbaɗi Pierre, ɓɛɛ tɛ Pierre mbaŋ ɗoŋ wen nɛ̀ Gasa Wan bàá tɔ̧ so ha̧ a̧‘e: «Nɛti ha̧ gata-kɔra mɛ he mɔ sɔsɔɔ, mɛ tɛ kaf'am war taar.» 62Nɛ́ mɔ'ɔ nɛ̀ Pierre gboa, ɓɛɛ hi̧i̧ kɔ̧a̧ nɛ̀ dita-see.
Wa gusa Jesu in wa da̧a̧ a̧
(Zɔk Mt 26.67-68; Mk 14.65)
63O bíí nɛ̀ pɛma Jesu zɛkɛɗa a̧, ɓɛɛ wa gusi a̧. 64Wa hɛra yí-a nɛ̀ laa, ɓɛɛ wa tɔ̧ ha̧ a̧: «Mɛ yàá-tɔ̧-wen oi nú Sɔ̧'ɛ, mɛ̀ sá nin-wi nɛ̀ mbɛra yí-mɛ́!» 65Ɓɛɛ wa da̧ a̧ nɛ̀ o dara nɛtɛ nɛtɛ nɛ̀ dɔka-a.
Jesu a̧a̧ sɛn fara-ɓa-wen
(Zɔk Mt 26.59-66; Mk 14.55-64; Jn 18.19-24)
66Mɔ sa̧a̧ kaɗi, ɓɛɛ o gasawi mɔi̧ ŋmaa in o gasa wan-ɗafi-sɔ̧ in o wi-usi-heembea. Wa mgbɔɔ Jesu nɛnɛ ti gasa-gɔna-kita kɔ-wa, 67ɓɛɛ wa tɔ̧ ha̧ a̧: «Kà mɛ̀ nɛ́ bòò nɛ́ Mɛsii, nɛ̀ mɛ̀ tɔ̧́ h’ɛ́ɛ́.» A̧ kifa nú ha̧ wa: «Kà‘m tɔ̧́ h’ɛ́nɛ́, ɛ́nɛ́ beka kpɛk wen kɔ‘m na. 68Ɓɛɛ kà‘m ak'nɛ́, ɛ́nɛ́ beka kifi nú ha̧‘m na mbɛt. 69Kinii hegɔ yak nɛnɛ, Bem ko bíí tɛ́ duk nɛ̀ war wii-er Sɔ̧ Wan ŋgayamɔ.» 70Ɓɛɛ wa lɛŋ ak mɔ: «Hegɔ, mɛ́ nɛ́ Bem ko Sɔ̧ gɔ?» Ɓɛɛ a̧ tɔ̧́ há̧ wa: «Ɛ́nɛ́ nɛ̀ nú‘nɛ́ a̧ tɔ̧a̧‘e, mi nɛ́ Bem ko Sɔ̧ kaɗi.» 71Wa tɔ̧a̧: «Ɛ̀ɛ̀ kíí bɔɔ mbe wi-sedaako si déè ɓɔ ge? Ɛɛ nɛ tɛ yɛ zia wen n'aa tɔ̧ɔ̧ nɛ̀ nú-a kaɗi.»
Currently Selected:
LUK 22: GB11DC
Označeno
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.