Simuluho 11
11
Tawa ya Babele
1Kwa simuluho, batu mwa lifasi kaufela ne ba bulela puo i liñwi, ni ku itusisa manzwi a swana. 2Ha ne ba nze ba ya kwa upa, ba t'o fita mwa libala le li mwa naha ya Shinari, mo ba til'o yaha. 3Kiha ba bulelisana, ba li, “A mu tahe! Lu lube litina, lu li cise hande.” Cwale ba eza litina, ze ba ka yaha ka zona, ni mufuta wa samende wa ku li kopanya hamoho. 4Mi ba li, “A lu ikaheleñi munzi o ta ba ni tawa ye telele, mane i y'o fita kwa lihalimu. Lu ikezeze libizo kuli lu si ke lwa hasanela mwa naha kamukana.”
5Cwale Muñ'a Bupilo kih'a taha fafasi ku t'o bona munzi ni tawa ye ba yahile batu. 6A li, “Batu ba, ki batu ba li bañwi. Ba bulela puo i liñwi. A, ki ona makalelo feela a ze ba ta eza. Mwamulahonyana ba ka kona ku ikezeza sifi ni sifi se ba bata ku si eza. 7A lu ye kwateñi, lu y'o fapanya puo ya bona kuli ba si ke ba utwana.” 8Cwale Muñ'a Bupilo a ba hasanyeza mwa lifasi kaufela, mi ba tuhela ku yaha munzi. 9Munzi wo n'o bizwa Babele, kakuli ki fona f'a n'a fapahanyelize Muñ'a Bupilo lipuo za batu, mi a ba hasanyeza mwa lifasi kamukana.
Lusika lwa Sema
(1 Lita 1.24-27)
10Ba, ki bona ba lusika lwa Sema. Lilimo ze peli mwamulaho a muunda, Sema ha s'a na ni lilimo ze mwanda, a pepa mwana ya bizwa Aripakasadi. 11Mwamulaho a foo, a pila hape lilimo ze mianda i ketalizoho, mi a pepa bana ba bañwi ba bashimani ni basizana.
12Aripakasadi ha s'a na ni lilimo ze mashumi a malalu ni ze ketalizoho, a pepa mwana ya bizwa Shela. 13Mwamulaho a foo, a pila hape lilimo ze mianda ye mine ni ze talu, mi a pepa ba bañwi bana ba bashimani ni basizana.
14Shela ha s'a na ni lilimo ze mashumi a malalu, a pepa Hebere. 15Mwamulaho a foo, a pila lilimo ze mianda ye mine ni ze talu, mi a pepa bana ba bañwi ba bashimani ni basizana hape.
16Hebere ha s'a na ni lilimo ze mashumi a malalu ni ze ne, a pepa Pelegi. 17Mwamulaho a foo, a pila hape lilimo ze mianda ye mine ni mashumi a malalu, mi a ba ni bana ba bañwi ba basizana ni bashimani.
18Pelegi ha s'a na ni lilimo ze mashumi a malalu, a pepa Reu. 19Mwamulaho a foo, a pila hape lilimo ze mianda ye mibeli ni ze supile ka ze peli, mi a ba ni ba bañwi bana ba bashimani ni basizana.
20Reu ha s'a na ni lilimo ze mashumi a malalu ka ze peli, a pepa Serugi. 21Mwamulaho a foo, a pila hape lilimo ze mianda ye mibeli ka ze supile, mi a ba ni bana ba bañwi ba bashimani ni basizana.
22Serugi ha s'a na ni lilimo ze mashumi a malalu, a pepa Nakori. 23Mwamulaho a foo, a pila hape lilimo ze mianda ye mibeli, mi a ba ni bana ba bañwi ba bashimani ni basizana.
24Nakori ha s'a na ni lilimo ze mashumi a mabeli ni ze supile ka ze peli, a pepa Tera. 25Mwamulaho a foo, a pila hape lilimo ze mwanda ni lishumi ka ze supile ni ze peli, mi a ba ni bana ba bañwi ba bashimani ni basizana.
26Tera ha s'a na ni lilimo ze mashumi a supile, a pepa Abrame, Nakori ni Harani.
27Lo, ki lona lusika lwa Tera. Tera ki yena ya n'a pepile Abrame, Nakori ni Harani. Harani yena a pepa Lota. 28A shwela mwa munzi wa habo, ili Ure wa mwa naha ya Kaladeya, ndat'ahe a nz'a sa pila. 29Abrame a nyala Sarai, mi Nakori a nyala Milika mwan'a Harani ya n'a li ndat'ahe Jisika. 30Sarai n'a si ka ba ni bana. N'e li muumba.
31Tera a nga mwan'a hae Abrame, ni Lota muikulyae, ya n'a li mwan'a Harani, ni mukwenyan'a hae Sarai, musal'a Abrame. A zwa ni bona mwa Ure wa mwa Kaladeya, ku ya mwa naha ya Kanana. Ba ya, mane ba y'o fita mwa Harani, mi ba yaha mwateñi. 32Tera a shwela hona moo, a nz'a na ni lilimo ze mianda ye mibeli ni ze ketalizoho.
Currently Selected:
Simuluho 11: Lozi09
Označeno
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.