Markus 15
15
Jesus ver Pilatus
(Mat 27,1-2.11-14; Luk 23,1-5; Joh 18,28-38)
1Tiedich näakjsten Morjen hauden de Huagepriestasch eene Berodunk met de Eltestasch un Schreftjelieede, un met däm gaunzen Rot. Un see bungen Jesus, leiden am wajch un jeewen am äwa aun Pilatus. 2Dan fruach Pilatus am: Best du de Juden äa Kjennich? Un hee säd to am: Daut es soo aus du sajchst. 3De Huagepriestasch hauden väl, wuamet see am beschuljden, oba hee jeef an kjeene Auntwuat. 4Dan fruach Pilatus am nochmol: Jefst du kjeene Auntwuat? Kjikj doch emol, met waut see die aules beschuljen! 5Oba Jesus säd noch emma nuscht, soo daut Pilatus sikj wundad. #Jes 53,7; Mrk 14,61
Jesus toom Doot veuadeelt
(Mat 27,15-26; Luk 23,13-25; Joh 18,19—19,16)
6Pilatus haud daut soo daut hee an opp däm Fast een faustjenomnen loosjeef; un see kunnen sikj dän wälen. 7See hauden dan jrod eenen Maun, Barabas, faust, dee met aundre toop en eenen Opprua eenen Mort begonen haud. 8Dan kjeem eene maussen Menschen no Pilatus un fruagen doano, daut hee wada soo doonen sull aus hee emma deed. 9Dan fruach Pilatus an, auf hee an sull dän Judenkjennich loosjäwen, 10wiels hee wist daut de Huagepriestasch am Jesus ut Aufgonst en de Henj jejäft hauden. #Joh 11,48 11Oba de Huagepriestasch hizten daut Volkj en, daut hee an väl leewa sull Barabas loosjäwen. 12Pilatus fruach an: Waut saul ekj dan met dän doonen, dän jie dän Judenkjennich nanen? 13See schrieejen: Doo am kjriezjen! 14Pilatus fruach: Wuarom? Waut haft hee fa een vebräakjen begonen? Oba see schrieejen bloos soo väl dolla: Doo am kjriezjen! 15Wiels Pilatus daut Volkj tofräd stalen wull, jeef hee an Barabas loos un leet Jesus vepitschen un jeef am han, jekjriezicht to woaren.
De Soldoten spotten äwa Jesus
(Mat 27,27-31; Joh 19,2-3)
16De Soldoten neemen Jesus dan em Rechthus nenn, un roopten de gaunze Baund Soldoten toop. 17See neemen am eenen bleiwrooden Rock om un flochten eene Stachelkroon un saden am dee opp dän Kopp 18un fungen aun, am to bejreessen aus dän Judenkjennich. 19Un see schluagen am emma wada met eenem Ruastock opp däm Kopp un spieejen no am un kjneeden sikj ver am un bäden am aun. 20Un aus see am vespott hauden, neemen see am dän bleiwrooden Rock auf un trocken am wada siene Kjleeda aun. Dan leiden see am rut, am to kjriezjen.
Jesus woat jekjriezicht
(Mat 27,32-44; Luk 23,26-43; Joh 19,17-27)
21Simon von Kiereen, Alexanda un Rufus äa Voda, kjeem jrod vom Launt un kjeem doa vebie; däm bedwungen see Jesus sien Kjriez to droagen. #Reema 16,13 22Un see brochten am no eenem Plauz, Golgata jenant, daut meent: een Schädelplauz. 23Doa wullen see am Wien met betret Beteibungsstoff to drinkjen jäwen; oba hee neem daut nich.
24Un aus see am jekjriezicht hauden, vedeelden see siene Kjleeda un trocken Lessa, om to seenen, waut een jiedra kjrieen wudd. #Psa 22,19 25Daut wia Klock näajen zemorjes, aus see am kjriezijden. 26Un bowen aum Kjriez schreewen see: De Judenkjennich; daut wia waut see jäajen am hauden un wuawäajen see am kjriezijden. 27See kjriezijden met am toop noch twee Merdasch, eenen aun de rajchte un eenen aun de linkje Sied. 28(Soo kjeem daut rom, aus daut jeschräwen steit: “Hee wort mank de Vebräakja jetalt.”) #15,28 Eenje oole Schreften haben nich disen Varsch. 29Un dee doa vebie jinjen, scheddaden met de Kjap un lastaden un säden: Aha! Du, dee du dän Tempel dolbrakjst un en dree Doag oppbust, #Mrk 14,58 30rad die selfst un komm vom Kjriez rauf! 31Jrod soo deeden uk de Huagepriestasch un Schreftjelieede unjaenaunda äwa am spotten un säden: Hee haft aundre jeholpen, oba kaun sikj selfst nich halpen. 32Lot dän Christus, dän Kjennich äwa Israel, nu vom Kjriez rauf komen, daut wie seenen un jleewen kjennen. Un dee waut met am toop jekjriezicht wieren, schullen uk äwa am. #Mat 16,1.4
Jesus stoaft
(Mat 27,45-56; Luk 23,44-49; Joh 19,28-30)
33Dan opp Meddach wort daut dree Stund äwa daut gaunze Launt diesta. 34Un Klock dree no Meddach schrieech Jesus lud: Eli, Eli, sabachtani? Daut meent: Mien Gott, mien Gott, wuarom hast du mie veloten? #Psa 22,2 35Aus eenje von dee, dee doabiestunden, daut hieeden, säden see: Kjikjt emol, dee roopt dän Elia. 36Dan rand eena un leet een Schwom voll Wienädikj trakjen, stuak dän opp eenen Ruastock un hilt am dän han to drinkjen un säd: Wacht, well wie mol seenen, auf Elia am woat komen raufnämen. 37Un Jesus schrieech lud un jeef dän Jeist opp.
38Dan reet de Gardien em Tempel von bowen bat unjen entwei. #2Mo 26,31-33; 2Chr 3,14 39Aus de Offizia, dee jäajenäwa von Jesus stunt, sach woo hee schrieech #15,39 Eenje oole Schreften haben nich daut hee schrieech. un sienen Jeist oppjeef, säd hee: Dis Maun wia werkjlich Gott sien Sän!
40Doa wieren uk Frues, dee von wiet auf tookjikjten; mank dee wieren Maria von Magdala, un Maria, waut dän jinjren Jakobus un Joses äare Mutta wia, un Salome. 41Dise Frues wieren en Galiläa met am jewast un hauden fa am jesorcht. Doa wieren uk noch väle aundre Frues, dee met am wieren metjekomen no Jerusalem. #Luk 8,2-3
Jesus woat begroft
(Mat 27,57-61; Luk 23,50-56; Joh 19,38-42)
42Aus daut Owent wort, un wiels daut de Dach wia, aun dän see reedmuaken toom Sabat, 43neem Josef von Arimatäa dän Moot, bie Pilatus nenn to gonen un no Jesus sienen Kjarpa to froagen. Josef wia een ierlicha Rotjäwa un eena, dee uk no daut Gottesrikj luad. 44Pilatus wundad sikj, daut dee aul #15,44 Eenje oole Schreften sajen aul een Stoot. doot wia, un foddad dän Offizia un fruach däm, auf Jesus aul doot wia. 45Un aus hee daut derch dän Offizia utfunk, leet hee Josef dän Kjarpa. 46Dan koft hee feinet Lienzeich un neem Jesus rauf un wekjeld am en daut Zeich en, un läd am en een Grauf, daut en eenen Steen utjehakt wia, un rold eenen Steen ver daut opne Loch. 47Un Maria von Magdala un Joses siene Mutta Maria pausten opp, wua see am hanläden.
Currently Selected:
Markus 15: PB
Označeno
Deli
Kopiraj
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.