Lukas 17
17
Sind un Vejäwunk
(Mat 18,6-7.15.21-22; Mrk 9,42)
1Dan säd hee to siene Jinja: Daut es nich aundasch mäajlich aus daut Beleidjungen komen woaren, oba wee däm, derch dän dee komen. #(1 un 2) Mat 18,6-7 2Fa däm wudd daut bäta sennen, wan däm een Molsteen omem Hauls jehongen wort, un dan em Mäa jeschmäten, aus daut hee eent von dise kjliene beleidjen wudd. 3Paust opp! Wan dien Brooda sikj aun die vesindicht, dan hool am daut väa; un wan am daut leet deit, dan vejeff am. #Mat 18,15 4Un wan hee sikj säwen mol dän Dach aun die vesindicht un säwen mol dän Dach trigjkjemt un sajcht am deit daut leet, dan saust du am vejäwen. #Mat 18,21-22
Jratra Gloowen
5Dan säden de Apostel toom Harn: Stoakj ons dän Gloowen! 6De Har oba säd: Wan jie een Gloowen aus een Sampkuarn hauden, un to disen Mulbäaboom sajen wudden, dee sull sikj utrieten un em Mäa saten, dee wudd junt jehorchen. #Mat 17,20; 21,21
Een Kjnajcht siene Oppgow
7Oba wäa von junt, dee een Kjnajcht haft, wudd dan, wan dee von plieejen ooda Schop heeden kjeem, to am sajen: Komm fuaz un sat die dol un at? 8Oba wudd dee nich ea sajen: Moak mie een Owentkost reed, binj die een Schalduak om un bedeen mie, bat ekj jejäten un jedrunken hab. Nohäa woascht du uk äten un drinkjen. 9Dankt hee dän Kjnajcht doafäa, wiels dee deed, waut hee am befool? Ekj jleew nich! 10Soo es daut uk met junt. Wan jie ieescht aules jedonen haben, waut junt befolen es, dan sajcht: Wie sent jeweenelje Oabeida, un haben bloos jedonen waut wie schuldich wieren to doonen. #1Kor 9,16
Jesus heelt 10 leprakranke Mana
11Aus Jesus no Jerusalem jinkj, neem sikj daut soo rom, daut hee velenjd de Scheedungs Jrens tweschen Samaria un Galiläa jinkj. #Luk 9,51; 13,22 12Un aus hee en een jewesset Darp nenn jinkj, bejäajenden am tieen leprakranke Mana. Dee bleewen wieda auf stonen #3Mo 13,45-46 13un schrieejen lud: Jesus, Meista, hab Metleet met ons! 14Aus hee an sach, säd hee: Got stalt junt de Priestasch väa. Un wäarent see jinjen, worden see rein. #Luk 5,14 15Eena von dee, aus hee sach daut hee jeheelt wia, kjeem trigj un lowd Gott met lude Stemm. 16Hee schmeet sikj ver Jesus dol un dankt am. Un daut wia een Samarita. 17Dan säd Jesus to am: Wieren daut nich tieen, dee doa rein worden? Wua sent de aundre näajen? 18Wia sest kjeena aus dis framda to finjen, dee doa trigjkjeem Gott to danken? 19Un hee säd to am: Sto opp un go dienen Wajch. Du best derch dienen Gloowen jeheelt. #Luk 7,50
Daut komende Gottesrikj
(Mat 24,1-51; Mrk 13,1-37)
20Aus hee emol von de Farisäa jefroacht wort, wanea daut Gottesrikj komen wudd, säd Jesus: Daut Gottesrikj kjemt nich to seenes; #Joh 18,36 21Menschen woaren uk nich sajen: Kjikj, hia es daut! ooda: Doa es daut! Wiels daut Gottesrikj en junt es.
Daut Komen vom Menschensän
(Mat 24,26-27.37-41; 10,39; 24,28)
22Dan säd hee to siene Jinja: Doa woat eene Tiet komen, daut jie junt woaren wenschen eenen von dän Menschensän siene Doag to seenen, oba woaren dän nich seenen. 23Un see woaren to junt sajen: Kjikjt hia! Kjikjt doa! Oba got nich met doano to kjikjen. #Luk 21,8 24Wiels de Menschensän woat en sienen Dach #17,24 Eenje oole Schreften haben nich en sienen Dach. soo sennen aus de Blitz, dee äwa aules dacht, waut unja däm Himmel es. 25Oba hee mott ieescht noch väl lieden un von dise Jennerazion veschmäten woaren. #Luk 9,22 26Un soo aus daut en Noah siene Tiet wia, soo woat daut uk en dän Menschensän siene Doag sennen: #1Mo 6,9—7,23 27De Menschen eeten un drunken, frieden un befrieden sikj, bat aun dän Dach aus Noah en daut Schepp nenn jinkj un daut Wota kjeem un aulem ombrocht. 28En Lot siene Doag wia daut krakjt soo: de Menschen eeten un drunken, koften un vekoften un plaunten un buden. #1Mo 19,15.24-25 29Oba aun dän Dach aus Lot Sodom veleet, räajend daut Fia un Schwäwelblitt vom Himmel un brocht aulem om. 30Jrod soo woat daut uk aun dän Dach sennen, wan de Menschensän woat verendach komen.
31Wäa aun dän Dach oppem Husendak es un siene Sachen bennen haft, sull nich rauf gonen, dee to holen. Un wäa opp de Stap es, sull nich no irjentwaut trigjgonen. 32Denkjt aun Lot siene Fru! #1Mo 19,26 33Wäa sien Läwen prooft to hoolen, woat daut velieren. Un wäa sien Läwen velist, woat daut hoolen. #Luk 9,24 34Ekj saj junt, en dee Nacht woaren twee en een Bad sennen; eena woat jenomen woaren un eena woat trigjbliewen. 35Twee Frues woaren toop Jeträajd molen; eene woat jenomen woaren, un eene woat trigjbliewen. 36(Twee Mana woaren opp de Stap sennen; eena woat jenomen woaren, un eena woat trigjbliewen.) #17,36 Eenje oole Schreften haben disen Varsch nich. 37See fruagen am: Har, wua? Hee säd to an: Wua een doodja Kjarpa es, saumlen sikj de Odla.
Currently Selected:
Lukas 17: PB
Označeno
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.