Ta Kəla gír yá̰a̰ gə̄ 9
9
Nə́ɓā əhɔ madə̄ naā kə Noe
1Nə́ɓā rāā majə kə Noe ō, ngánən gə̄ ō, ɓáý, ədadə́ na:
Ɔ́jiī naā ī-bəlaī, ī-rosiī dɔ nang. 2Dā̰ gə̄ malang kə́ dɔ nang tə́ ō, yel̄ gə̄ malang ō, ngán dā̰ gə̄ malang ō, kānjə̄ kə́ kum bā bo gə̄ tə́ ō, a ɓōlə́n̄sí ngá̰ý. Ásiī rāā yá̰á̰ ń kemsí ndigə ní sedə́. 3Yá̰a̰ malang ń a njə̄rā ō, ndi kə kumuú ō ní, a téĺ yá̰a̰ kəsa yāsí. M-ādə̄sí yá̰a̰ gə̄ ń noō malang tītə̄ ń m-ādəńsí mbī kámbə kadə̄ ə́saī ní. 4Ɓá tā ba ā ə́saī dā̰ naā tə́ kə mósən ń rāā adə̄ a ndiń kə́ kə kumuú ní alé. 5Mósə́sí ń rāā adə̄ ā ī-ndiī kə kumsí ní, m-ā m̄-dəje kə̄rān. M-ā m̄-dəje kə̄rān jī dā̰ ń a tɔ̄l̄ deē tə́ ní ō, jī deē ń a tɔ̄l̄ deē madə̄n tə́ ní ō.
6Deē ń ɓōkə́ mósə deē nang tə́ ní,
gáŕ kadə̄ i deē n a ɓōkə́ mósə deē ń noō nang tə́ ō ní,
tɔdɔ̄ Nə́ɓā əndā deē adə̄ teēn.
7Ba sḭḭ̄, ójiī ngán gə̄ ādī kutəsí i ngá̰ý, ba ī-taāī gō dɔ nang malang.
8Nə́ɓā əda Noe nin̄ kə ngánən gēé ɓáý to̰ na:
9Yāḿ mā tā anī, m-ə́hɔ *madə̄ naā sesí sḭḭ̄ ō, kə ngáńsí gə̄ ń a utə̄n̄ gōsí ní ō, 10kə yá̰a̰ malang ń ndi kə kumuú sesí ní: Yel̄ gə̄ ō, dā̰ kə́ ɓēé gə̄ ō, dā̰ kə́ bembeé gə̄ ō, yá̰a̰ malang ń teē kem to boó ní ō, ngé gə̄ ń ndɔ̄ń tə́ a ndin̄ kə kumuú dɔ nang tə́ ní ō. 11Yá̰á̰ ń m-ā m̄-rāā ní n toó: Man̄ kaw̄ a tɔ̄l̄ yá̰á̰ kə́ ndi kə kumuú dɔ nang tə́ to̰ aĺ ō, man̄ kaw̄ kə́ yā nujə dɔ nang to̰ a gətóo ō. 12Nə́ɓā əda ɓáý to̰ na:
Yá̰á̰ ń ɔjə kadə̄ m-ā m̄-rāā yá̰á̰ ń toō tām̄ yāsí tə́ ō, tām̄ yā yá̰a̰ malang kə́ ndi kə kumuú tə́ ō, kə dɔ ɓāl̄ gə̄ malang ń de gə̄ a ndinə̄ń dɔ nang tə́ ní n toó: 13M-ə̄ndā kə́ dēsə́ bā ń i ga̰ gərā yāḿ ní tū kil̄ man̄ tə́. Ni i yá̰á̰ kə́ ɔjə kadə̄ m-ə́hɔ *madə̄ naā kə dɔ nangaá. 14Loo ń ré m-ɔ́sə dɔ kil̄ man̄ gə̄ kə̄ naā tə́ ba kə́ dēsə́ bā teē anī, 15a əga kemḿ dɔ yá̰á̰ ń m̄-ndigə rāā tə́ tām̄ yāsí tə́ ō, tām̄ yā gír dā̰ gə̄ malang tə́ ō ní. Man̄ kaw̄ kə́ a tɔ̄l̄ yá̰a̰ malang kə́ ndi kə kumuú to̰ a gətóo i kə́ bátə́ gə̄ tə́. 16Ré m-á̰á̰ kə́ dēsə́ bā ní anī, a əga kemḿ dɔ *madə̄ naā yāḿ kə́ a to ngándáńg ń m-ə́hɔ kə yá̰a̰ malang ń ndi kə kumuú dɔ nang tə́ ní tə́. 17Ba Nə́ɓā tél əda Noe to̰ na:
Kə́ dēsə́ bā i yá̰á̰ ń ɔjə kadə̄ m-ə́hɔ *madə̄ naā kə yá̰a̰ malang ń ndi kə kumuú dɔ nang tə́ ní.
Ngán Noe kə́ mətá gə̄
18Ngán Noe kə́ dəngam gə̄ ń teēn̄ kem to boó ní i Sem ō, Kam ō, Japet ō. Kam i bɔbə̄ Kanaan. 19I ngán Noe kə́ mətá gə̄ ń toō n ojən̄ naā á taān̄ loo dɔ nang tə́ malang ní.
20Nge ndɔr̄ kə́ ta kəga dɔ i Noe. Ni əhɔ *kāgə̄ nduú ō, 21a̰ȳ kasən ō, adə̄ rāān bátə́ ró̰ȳ kūbə̄ kə́ rɔ̄n tə́ kɔ̄ɔ́ malang ō, to kem kújə tandā yān tə́ gírən karī ō. 22Kam, bɔbə̄ Kanaan, a̰a̰ bɔbə̄n kə́ to gírən karī anī, tél aw̄ ndágá ndang ngákó̰o̰n kə́ jōó gə̄. 23Anī Sem nin̄ kə Japet unən̄ kūbə̄, ənīn̄ dɔ bɔ̄gə̄də́ tə́, ba télnə̄ń kə gidədə́ aw̄ ənīn̄ dɔ bɔbə̄də́ ń to gírən karī tə́ ní. Nin̄ tūrə̄n̄ kumdə́ kə̄ loo kə́ rang tə́ kɔ̄ɔ́, adə̄ a̰a̰n̄ bɔbə̄də́ kə́ to gírən karī alé. 24Dan ń kasə gán̄g kum Noe tə́ ní, oō yá̰á̰ ń ngōnən kə́ dūú rāā seneé ní anī, 25əda na:
Ndɔ̄ĺ i dɔ Kanaan tə́!
Ādə̄ ni i ɓəlo yā ɓəlo yā ngákó̰o̰n gə̄!
26Gō tə́ anī əda na:
Ādə̄ de gə̄ tɔ̄ȳn̄ Kɔ́ɔ̄ɓē Nə́ɓā yā Sem!
Ādə̄ Kanaan i ɓəlo yā Sem!
27Ādə̄ Nə́ɓā ɔr̄ gír loo yā Japet kə̄ gogə́!
Ādə̄ Japet ndi kem kújə tandā gə̄ yā Sem tə́,
ba ādə̄ Kanaan i ɓəlo yān!
28Noe rāā ɓāl̄ ɓú mətá kə kutə mí gō man̄ kaw̄ tə́. 29Noe rāā ɓāl̄ ɓú ndōhó kə kutə mí tá oy ɓáý.
Currently Selected:
Ta Kəla gír yá̰a̰ gə̄ 9: BS
Označeno
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad