Aswamisio 28
28
1Nakidaunia aiku, kajenut ebe apujan ŋin kenyaritai Melita. 2#Asw 27:3; 2 Kor 11:27. Kiswamakis sio ikulepek akwap asianut namam etapit, naarai apotu kinokokis akim, kisukunyikis sio, kanuka edou loketepi, ido kanuka aterot da. 3Nakeraraa Paul ekesit loka akito, kibwaik akim, kolom emusaga kanuka amwanis, kidolakin akanike. 4Nakeanyuniata ikulepek akwap emun edelideli kakanike, kotemanaros ebe, “Abeit erai etuŋanan lo ekaaran, Karaida kekuit kaŋolol, mam Etube isiikit ŋes aijar.” 5#Mk 16:18. Konye ŋes kilakilakak emun akim komam edumunit amusuŋut, 6#Asw 14:11. Kidarito, komunosi ŋes abuun arai aibiror atwanare eŋeso; konye kedaut aidar apak naepol koanyut ebe amamei adiomusuŋut kere, kibelokinos kotemasi ebe erai edeke.
7Aapu kaibois kaŋin kejaas amanat nuka ekapolon loka apujan, ekekiror Publio, kisukunyik ŋol sio ketau loka eipaperone apaarasia auni. 8Kosodi kanen kedeka papa loka Publio ekamidi ka aleporit aokot, koloma Paul mamakeŋ, kilip, kidokok ŋes akekanin, kitaŋaleu, 9Akaulo kaŋun, kopotu ice lukedekas kapujan kaŋin kitaŋaleunoi. 10Kosodete kitubusikis sio kainakineta nuipu; ido nakikwaŋaror kibwaikis iboro kere lukipuda ataker,
11Akaulo naka ilapio iuni, kediata kataker naka Alegesanderia, nakesalakinit apujan apakio nuka aterot, aanyuneteke kerai Iinacan Imwatok, 12Kadolo Surakusa, kasalakis nen apaarasia auni. 13Anyoun kanen kerimosi kadolo Regium; ketubor apaaran adiopet kokut ekwam lokeŋalakimak, kadolo Puteoli apaaran nakiareit. 14Kanen kadumut iinacan, kiŋaiŋaata sio asalakin mamakec apaarasia akanykaarei. Kwaŋin kadolo do Rome. 15Kiirasi iinacan lukaŋina nukosi, kopotu kiton Agwelanaret naka Apius ka Iswamin Iuni aisiriam sio. Nakeanyunia Paul kes, kimal Edeke, kotitiŋior. 16#Asw 27:3. Nakilomaria Rome, kocamakinai Paul aiboi bon nepepe ka eserikalet loidari ŋes.
17 #
Asw 23:1. Akaulo kapaarasia auni konyarau lukeraas ikapolok koYudayan; kedaut atukokin, kotema kes atiar, “Iinacan, karaida mam eswamat aronis kotuŋa karaida koponesio luka lukapapaawok, aponi kejaikin ko Yerusalem toma akanin nuka Iromayon aenio. 18Kaadaut aiŋitanar, kakotosi alacakin, naarai kemamei adiokirot kamakaŋ naaret, 19#Asw 25:11. Konye nakepegatar Iyudayan, ketiŋaikin aiyatakin mama ejai Kaisar-kwabo amamei nakiwosaet ituŋa luka atekereka. 20#Asw 26:6,7. Aso kanuka ŋun kanyarautu yes aponare aanyun eoŋ keiner keoŋ, naarai kanuka amun naka Isirael ŋes kaenitere korikot kalo.” 21Kotemasi kesi ŋes atiar, “Mam sio kidumunit ebalua anyoun koYerusalem kakirokon, ido emamei onace edio da loebunit ne loelimorit ka ainerit akirot naerono kanukon. 22#Asw 24:14; Luk 2:34. Konye kikoto apupun kamakon nuiwomit; naarai kanuka akiro nuka erioŋet kalo ejenikina kamakosi ebe ereitai noi kaŋinikibois.”
23Kedaut aseikin ŋes apaaran kopotu luipu noi mamakeŋ togo lokiboio.
Kitetemik kes ka aitejenun ameun tupuruc kiton eboŋ nuka ajakanut naka Edeke, ikujokini akiro nuka Yesu kanuka ikisila luka Musa ka inabin da. 24Apotu ice kiyuut nuenerai, kwabo ice mam iyuuna. 25Namam kecamanarotor, koloto do, kedau Paul einer akirot adiopet na ebe: “Abu Emoyo Lokalaunan kinera kotenan kama ka enabi Isaia mama ka lukapapaakus ebe:
26 #
Isa 6:9-10. ‘Kolot mama ejaas ituŋa lu, kolimok kes ebe:
Kiiranarete konye mam ijenunete, Koanyununete da konye mam imisiikinete, #Mat 13:14; Mk 4:12; Yok 12:40.
27Abaŋaakata itauon luka ituŋa kalu, Ijikititas akiikec,
Itumudakito akecekonyen,
Kinyeis aanyun kakonyenekec,
Ka aiirar kakeceki,
Kojenut kotauonokec,
Kibelokinos ketaŋaleu kes.’
28 #
Sab 67:2; 98:3; Luk 3:6; Asw 13:46. Aso kojenutu ebe ejukakin aitaiario na naka Edeke Omo: iirarete kesi da.” [ 29Kedau einer ŋun koloto Iyudayan, epeganakinos noi.]
30Kodau Paul ikar iarei kotogoke loketacanakini, kisukunyanakinenei kere lukeponenenete mamakeŋ, 31#Asw 1:3; 28:23. elimonokini ajakanut naka Edeke, ido ka aisisianakin katitiŋ akiro nuka Ejakait Yesu Kristo, komam itikokinio.
Currently Selected:
Aswamisio 28: AOV1961
Označeno
Deli
Kopiraj
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.