Aswamisio 23
23
1 #
Asw 22:1; 24:16. Kikesite Paul akonye kaurianet, kobala ebe, “Ikiliok iinacan, abu kajar kakonyen nuka Edeke ketau kaloejok kiton lolo.” 2#Yok 18:22,23. Kicorak Anania losasedoti lopeti lukebwoete aapu kaŋes aibap ŋes akeituk. 3#Mat 23:27-28; Esk 13:10-15; Leb 19:15. Kosodi Paul atemar ŋes atiar, “Kibapi jo Edeke, ijo arwatat naiworiworitai kakwanis! Iboikin kereka ijo atubokin eoŋ kwape ejaatar ikisila, kwabo icorak eoŋ aibapio aitegelikin ikisila?” 4Kobalas lukebwoete aapu kaŋes ebe, “Ijo ba, imoromoroi kereka esasedoti lopeti loka Edeke?” 5#Any 22:28. Kotema Paul atiar, “Iinacan, mam ajeni ebe erai esasedoti lopeti; naarai iwadikatai ebe, ‘Sirikiner erono mama ejai ekayaiton loka ikonituŋa.’”
6 #
Asw 4:2; 22:3; 26:5; Pil 3:5. Konye nakejenunia Paul ebe atutubet adiopet kerai naka Isadukayon, ka nace da naka Iparisayon, kiworo kaurianet ebe, “Ikiliok iinacan, arai eoŋ Eparisayot, okoku loka Iparisayon; katubokinitai eoŋ kanuka amun naka ajarun naka ikatwak.” 7Nakedaunia einer ŋun, kojau epeget kidiŋ Iparisayon ka Isadukayon; kotiaka atukot, 8#Mat 22:23; Mk 12:18; Luk 20:27. Naarai ebalas Isadukayon ebe emamei ajarun, karaida emalaika, karaida emoyo; konye ecamunito Iparisayon ŋun kere. 9#Asw 25:25; 5:39. Kojau ecelet loepol; kobwaata ikewadikak ice owai loka Iparisayon, koutasi kobalas ebe, “Mam sio kidumuni adiokirot naerono kotuŋanan kalo. Arai bo emoyo inera kaŋes, arai bo emalaika?” 10Kiyatakin ecelet apoloor, kokurianar ekapolon ebe enyilinyiliete kesi Paul, kicorak iserikalei adokun ka alemun ŋes kagogoŋ kakaninikec, ainyakar da ore loka iserikalei.
11 #
Asw 18:9; 19:21; 28:16,23. Kakuare kaŋin kobwo Ejakait aapu kaŋes, kobala ebe, “Kotitiŋior, naarai kwape itejenunia nukaŋ koYerusalem, kwape kwaŋin ibusakinit ijo aitejenun ko Rome da.”
12Nakiwala akwap, kitutuko Iyudayan, koenikinos kaiyaposit ebe mam enyamete karaida aimat kiton neaariata Paul. 13Lukiyapoikinete kwaŋin emwaasi ituŋa akaisaoŋon ka adepar da. 14#Yok 16:2,3. Koloto kesi mama ejaas isasedotin lupeti ka imakio, kotemasi atiar, “Kienikin noi kaiyaposit ebe mam kiiri ibore kiton nekiaria Paul. 15Aso do kwana, kikwenyasi yesi ka aurianet ekapolon ayaŋaun Paul mama ijaas, bala ikotosi ajenun kotenan akekiro, Kikapakina isio da aiar ŋes eriŋa eekuna die.”
16Kiira ecen loka Paul nuka aperunikec; kolot koloma ore loka iserikalei, kolimok Paul. 17Konyarau Paul ekapolokiton ediopet kotemaatiar, “Koyaŋa etelepat lo mama ejai ekapolon; naarai ejai akirot naelimokini ŋes.” 18Kanuka ŋun koyaŋa ŋes, kitoloma neejai ekapolon, kobala ebe, “Abu Paul ŋol eenat kanyara eoŋ, kelip aitolomun etelepat lo mamakon, naarai ejai akirot naineras kajo.” 19Kitiŋ ekapolon akekan kogitaros kaŋes, kiŋit kaiyeiyea ebe, “Anyoin akirot naikoto ijo alimokin eoŋ?” 20Kobala ebe, “Enerut Iyudayan aiŋitun jo aitodokar Paul moi toma aurianet, bala ekotos aiŋitiŋit kotenan akekiro. 21Aso siri jo kicam; naarai eperunito ŋes ituŋa luedeparito akaisaoŋon kakesi, luaenikinos kaiyaposit ebe mam enyamete karaida aimat kiton neaariata ŋes; aso kwana ekapakina kesi, idaretos akoniisumunet.” 22Kosodi kotwar ekapolon etelepat, kicoro ebe, “Sirikilimok idiotuŋanan ebe kikwenyarit eoŋ.”
23Kosodi konyarau ikapolokitok iarei, kobala ebe, “Kitemokis iserikalei akwat aarei, ka ikebwanenok akaisakanykaarei, ka lukakwaras da akwat aarei, alosit kiton Kaisarea, osawa lokiwuniet loka akuar. 24Kitemokis itiaŋ lukisibwaneno Paul da, koyaŋaasi ŋes mama ejai Pelikis ekayaiton eiyara.” 25Kiwadik ebalua kepone kalota:
26 #
Luk 1:3. “Kulaudio Lusia mama ejai ekayaiton lokaibuses Pelikis, ayogan. 27#Asw 21:33; 22:25. Ikamunito Iyudayan etuŋanan lo, aapikinito aiar ŋes, kabunok kes nepepe ka iserikalei, kayu, kajenu ebe erai Eromayot. 28#Asw 22:30. Kakoto ajenun akirot naeosatotor, ketodoka aurianetekec. 29#Asw 6:9; 18:14,15. Kadum ebe kiwosatai kanuka aiŋiseta nuka ikisilakec, kwabo mam kiwosatai adiokirot kere naibusakinitor aaria karaida aenia. 30#Asw 24:8. Kosodi nakapukokinere ebe ejaun ebotet loebilakinete ekiliokit lo, atipet kejuku mamakon, kecoraki da lukewosatok einer akecekiro kakonyenekon.”
31Kosodete koyaŋaasi iserikalei Paul kwape kicorakinitere kinyamasi kuare kiton Antipaturi. 32Tupuruc do koboŋosi kesi ore loka iserikalei kinyeis ikebwanenok aiyatakin alosit kaŋes, 33Kedolo ŋul Kaisarea, ka ainakin ekayairon ebalua, kisibwaata da Paul kakonyeneke, 34#Asw 22:3. Ŋes da nakedaunia asoman, kiŋit ebe, “Erai ŋesi loko buku ali?” Nakejenunia ebe erai loko Kilikia, 35kotema atiar, “Keirari jo naeponiata lukiwosato.” Kicorak aidario kotogo lokapolou loka Kerode.
Currently Selected:
Aswamisio 23: AOV1961
Označeno
Deli
Kopiraj
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.