ሉቃሳ ምሽራቹዋ 4
4
የሱሳዉ ሺቄዳ ጻላህያ ፓጭያ
(4:1-13፤ ማቶሳ 4:1-11፤ ማር. 1:12፣ 13)
1የሱስ ጌሻ አያናን ኩሚደ ዮርዳኖሳ ሻፋፐ ስሜዳ፤ አያናን መላ ሳኣ ካለሰቲደ ቤዳ። 2ሄዋን ኦይታሙ ጋላሳ ዳብሎሳን ፓጨቴዳ። ሄ ጋላሳቱዋን አያነ ምቤና ድራዉ ዉርሰ ፖሉዋ ሄራን እ ኮሻቴዳ።
3ዳብሎስካ፥ “ኔን ጾሳ ናኣ ግዶፐ ሀ ሹቻ፥ ‘ኡክ ግዳ’ ጋደ አዛዛ” ያጌዳ።
4የሱስካ፥ “ ‘አሳይ ጾሳ ቃላ ኡባፐ አትን ኡክ ጻላላን ደኤና’ ጌተት ጾሳ ቃላን ጻፈቴዳ” ያግ ዛሬዳ።#ዛረ. 8:3
5ዳብሎስካ ቃ ግዴዳ ደርያ የሱሳ ከሲደ አላምያ ካዉተ ኡባ ልጶ አይፊ ስማናዉ በሴዳ። 6ዳብሎስካ፥ “ሀ ካዉተ ማታይነ ቦንቹ ኡባይ ታዉ እመቴዳ። ታን ታ ዶስያ ኦስነ እማና፤ ነዉካ እማና። 7ሄዋ ግድያ ድራዉ፥ ነ ታ ስንን ታዉ ጎይኖፐ ሀ ኡባይ ኔሳ ግዳናዋ” ያጌዳ።
8የሱስካ ዛሪደ፥ “ ‘ጎዳ ጾሳዉ ጎይና፥ አ ጻላላ ጎዳያ’ ጌተት ጾሳ ቃላን ጻፈቴዳ” ያጌዳ።
9-11ዳብሎስካ የሱሳ የሩሳላመ አፊደ ጌሻ ጎልያ ሁጲያ ከሲደ፥
“ ‘ጾሳይ ኔና ናጋና ማላ፥
ኪታንቻቱዋ ኪታናዋ፥
ኡንቱንቱካ ነ ገዲ ሹቻን በተና ማላ፥
ባረንቱ ኩሽያን ኔና ደንናዋንታ’ ያገቲደ፥
ጌሻ ማጻፋን ጻፈቴዳ፤
አነ ኔን ጾሳ ናኣ ግዶፐ፥
ሀዋፐ ዱገ ኔና ኦላ”#ማዝ. 91:11-12
ያጌዳ።
12የሱስካ ዛሪደ፥ “ ‘ነ ጎዳ ጾሳ ፓጮፓ’ ጌተቴዳ” ያጌዳ።
13ዳብሎስካ ፓጭያ ኡባ ዉርሶዋፐ ጉየ ጉ ዎደዉ የሱሳፐ ሻከቴዳ።
የሱስ ጋሊላን ኦሱዋ ዶሜዳ
(ማቶሳ 4:12-17፤ ማር. 1:14፣ 15)
14የሱስካ አያና ዎልቃን ጋሊላ ጋድያ ስሜዳ። አ ዋሪካ ዩሹዋን ደእያ ኡባ ጋኬዳ። 15የሱስካ አይሁዳቱዋ ዎሳ ጎልያን ታማርሲደ አሳን ኡባን ጋላተቴዳ።
ናዝሬተን የሱሳ እጼድኖ
(ማቶሳ 13:53-58፤ ማር. 6:1-6)
16እ ባረ ድጮ ካታማ ናዝሬተ ዬዳ፤ ካሰ ኦያዋዳንካ ሳምባታ ጋላስ አይሁዳቱዋ ዎሳ ጎለ ገሊደ ናባባናዉ ደንዲደ ኤቄዳ። 17-19ናብያ ኢስያሳ ን ጻፈቲደ ጻጸቴዳ ማጻፋ አዉ እሜድኖ። ሄ ማጻፋ ብሊደ:
“ታን ህየሳቶ ምሽራቹዋ ኦዳናዉ
ኦከቴዳ ድራዉ ጎዳ አያናይ ታ ቦላን ደኤ።
ቃሸቴዳዋንቶ ብለ፥
ቆቃቶ ጼላና ማላ ኦዳናዉ፥
ቃይካ ናቀቴዳዋንታ ናቁዋፐ
ከሳና ማላ ዶሰቴዳ ጎዳ ላይ
ኦዳና ማላ፥ ታና ኪቴዳ”
ጌተት ጻፈቴዳሳ ደሜዳ።#ኢሳ. 61:1-2
20ማጻፋካ ጻጺደ አይሁዳቱዋ ዎሳ ጎልያን ኦያዎ እሚደ ኡቴዳ። አይሁዳቱዋ ዎሳ ጎልያን ደእያ አሳይ ኡባይ አ ጫድ ጼሌዳ። 21የሱስካ፥ “ሀቼ ህንተዉ ናባበትና ህንተንቱ ስሴዳ ቃላይ ፖለቴዳ” ያጌዳ።
22ኡባይ አዉ ማርካቴድኖ። አ ዶናፐ ከስያ አ ኬካተ ቃላፐ ደንዴዳዋን ማላለቲደ፥ “ሀዌ ዮሴፎ ናኣ ግደኔ?” ጌድኖ።
23የሱስካ ስ ባንታን ሀ ሌምሱዋን፥ “ህንተንቱ ታዉ ‘ልያ ጎዳዉ፥ ነ ሁጲያ ፓ፥ ኔን ቅፍርናሆማን ኦና ኑ ስሶዋ ኡባ ሀ ነ ካታማንካ ቃይ ኦ’ ያጊደ ኦዲታ” ያጌዳ። 24ቃይካ፥ “ቱሙዋ ያጋይ፥ ናቢ ባረ የለቶ ጋድያን ጋማካ ቦንቼተና።#ዮሃ. 4:44
25“የዉዋን ቃይ ቱሙዋ ኦዳይ: ኤላሳ ዎድያን ሄዙ ላይነ ኡሱፑን አገና እራይ ቡከናን እጽና ሳኣ ኡባን ዎልቃማ ኮሻይ ገሌዳ ዎደ፥ እስራኤለን ጮራ አምአቱ ደኢኖ።#1 ካታ. 17:1 26ኤላስካ ሲዶና ጋድያን ደእያ ሰራፍታ ሄራ እት አምአትኮ ኪተቴዳፐ አትን ኦኮነ ኪተትቤና።#1 ካታ. 17:8-16 27ናብያ ኤልሳአ ዎድያንካ እስራኤልያን ጮራ ኦሉዋ ሀርግያን#4:27 ኦሉዋ ሀርግያ፦ ጾሳ ቃላይ ታማርሰትያ ዎድያ ኡባን፥ “ኦሉዋ” ግያ ቃላይ ጋልባ ቦላን ሳክያ ሳኩዋ ኡባዉ አከትያዋ። ኦይቀቴዳዋንቱ ደኢኖ፤ ሶርያ ቢታን ደእያ ንእማነፐ አትን ኡንቱንቱፐ ኦንነ ፓጽ ቤና” ያጌዳ።#2 ካታ. 5:1-14
28አይሁዳቱዋ ዎሳ ጎልያን ደእያዋንቱ ኡባቱ ሀዋ ስሲደ ዳርሲደ ሀንቀቴድኖ። 29ኡንቱንቱ ደንዲደ የሱሳ ካታማፐ ጋጻ ከሲደ ዱገ ኦላናዉ ካታማይ ኬጸቴዳ ደርያ ሁጲያ አፌድኖ። 30ሽን የሱስ ኡንቱንቱ ግዱዋና አደ ቤዳ።
ኢታ አያናይ ኦይቄዳ ብታንያ
(4:31-37፤ ማር. 1:21-28)
31ሄዋፐ ጉይያን የሱስ ጋሊላ ጋድያን ደእያ ቅፍርናሆማ ካታማ ቤዳ። ሳምባታ ጋላሳንካ አሳ ታማርሴዳ። 32እ ታማርስያ ትምርቲ ማታን ግድያ ድራዉ ስሴዳ አሳይ ኡባይ ማላለቴድኖ።#ማቶሳ 7:28፣ 29
33አይሁዳቱዋ ዎሳ ጎልያን ኢታ አያናይ ኦይቄዳ ብታኒ ደኤ፤ ባረ ኮሻ ቁ ኦ ዋሲደ፥ 34“ሀያ ጎዶ አጋርኪ ናዝሬትያ የሱሳ፤ ኑዉ ኔናና አይ እትፐተይ ደኢ? ኑና ባይዛናዉ ያድ? ኔን ኦነንቶ ኤራድ፤ ኔን ጾሳ አዉ ኪቴዳ ጌሻ ግድኪ!” ያጌዳ።
35የሱስካ፥ “ጮኡ ጋ፥ አፐካ ከሳ” ያግ ሴሬዳ። ኢታ አያናይ ብታንያ ኡንቱንቱ ግዱዋን ኩንድሲደ አይነ ቆሄናን አፐ ከሴዳ።
36አሳይ ኡባይ ማላለቲደ እቱ እቶ፥ “ሀዌ አያ ቃሌ? ባረዉ ደእያ ማታንነ ዎልቃን ኢታ አያናቱዋ ሴሬ፤ ቃይ ኢታ አያናይካ ከሴ” ያጊደ ሃሳዬድኖ። 37አ ዋሪካ ሄ ዩሹዋን ደእያ ጋድያ ኡባ ጋኬዳ።
የሱስ ጮራ ሀርጋንቻ አሳ ፓዳ
(ማቶሳ 8:14-17፤ ማር. 1:29-34)
38የሱስ አይሁዳቱዋ ዎሳ ጎልያፐ ደንዲደ ስሞና ጎልያ ገሌዳ፥ ስሞና ቦሎታታ ዎልቃማ ቆጹዋ ሀርግያን ሀርገታደ ግሴዳዉንዉ የሱስ እዞ ፓናዳን አሳይ አ ዎሴዳ። 39እ ማታን ኤቂደ ቆጹዋ ሀርግያ ሴርና፥ ሀርጊ የዲሼዳ፤ ሄ ዎድያንካ ደንዳደ ኡንቱንቶ ኪተታዱ።
40አዋይ ዉሎ ዎድያን ዱማ ዱማ ሀርግያን ኦይቀቴዳ ሀርጋንቻቱዋ ኡባ አኮ አሄድኖ፤ እካ እቱዋ እቱዋ ቦላ ባረ ኩሽያ ዎደ ፓዳ። 41ኢታ አያናቱካ፥ “ኔን ክርስቶሳ ጾሳ ናኣ” ያግ ዋሲደ ጮራ አሳፐ ከሴድኖ። እ ክርስቶሳ ግዶዋ ኡንቱንቱ ኤሬዳ ድራዉ ሃሳየና ማላ ድጌዳ።
የሱስ ጋሊላን ታማርሴዳ
(ማቶሳ 4:23-25፤ ማር. 1:35-39)
42ሳአይ ዎንቶ ዎደ አሳይ ባይናሳ ቤዳ፤ አሳይ ኡባይ አ ኮዪደ እ ደኢያሳ ዬድኖ። ባረንቱፐ ሻከት ቤናዳን ድጋናዉ ኮዬድኖ። 43እ ቃይ፥ “ህን ሀራ ካታማቶ ባደ ጾሳ ካዉተ ምሽራቹዋ ቃላ ኦዳናዉ ኮሼ፤ ታን ኪተቴዳዌ ሀዋ ድራሳ” ያጌዳ።
44ጋሊላን ደእያ አይሁዳቱዋ ዎሳ ጎለን ቃላ ታማርሲደ ጋምኤዳ።
Currently Selected:
ሉቃሳ ምሽራቹዋ 4: DFBE
Označeno
Share
Copy
Want to have your highlights saved across all your devices? Sign up or sign in
The Word for the World Ethiopia