ሉቃሳ ምሽራቹዋ 12
12
ሎአ ማላትያ ኢታተፐ ናገታና ማላ ሴራ
(ማቶሳ 10:26፣ 27)
1ሄ ዎድያን ጮራ ሻኣን ፓይደትያ አሳይ እቱ እቱዋ የና ጋካናዉ ሺቅ ደእሽን፥ የሱስ ባረና ካልያዋንቶ ኮይሮ ኦዳናዉ ዶሚደ፥ “ፓርሳዋቱዋ እርሹዋፐ ናገትተ፤ ሀዌካ ሎአ ማላትያ ኡንቱንቱ እምያ ኢታ ትምርትያ።#ማቶሳ 16:6፤ ማር. 8:15 2ሽን አያንነ ካመቴዳ የዉ ቆንጭያ ከሰናን አተና፤ ቃይካ ጌሜዳ የዉ ኤረተናን አተና። 3ሄዋ ድራዉ ህንተ ማን ሃሳዮዌ ኡባይ፥ ጋላስ ፖኡዋን ስሰታናዋ፤ ህንተንቱ አሳይ ባይናሳን ህን ግሶ ጎልያን ሀይን ሳሱኮዌ ኡባይ ቁ ጌዳ ስሰትያ ቆንጨሳን አዋየታናዋ።
እት ጾሳ ጻላላዉ ያያና በሴ
(ማቶሳ 10:28-31)
4“ታናዳን አማንያዋንቶ፥ ታን ህንተዉ ያጋይ፤ ሀእ አሹዋ ዎያዋንታ፥ ሄዋፐ ካላ ቃይ አያነ ኦናዉ ዳንዳየናዋንታ ያዮፕተ። 5የዉዋን ቃይ ህንተንቱ ኦስ ያያናዉ በስንቶ ታን ህንተንታ ኤርሳና፤ ሄዌካ ዎዋፐ ጉይያን ጋናምያን ኦላናዉ ማታይ ደእያ ጾሳ ጻላላዉ ያይተ፤ ኤ፥ አዉ ያይተ ያጋይ።
6“እቼሹ ሱንያ ካፋቱ ሳንትምያን ሻመትክኖየ? ሄዋንቱፐ እትኖነ ኡሳ ጾሳይ ዶገና። 7ሽን ሀራይ አቶ ህንተንቱ ሁጲያን ደእያ ብናናይ ኡባይካ ፓይደቴዳዋ፤ ሀዋ ድራዉ ያዮፕተ፤ ህንተንቱ ጮራ ሱንያ ካፋቱዋፐ ዳሪታ።
የሱሳን አማንያዋንታነ አ እጽያዋንታ
(ማቶሳ 10:32፣ 33፤ 12:32፤ 10:19፣ 20)
8“ታን ህንተዉ ኦዳይ፤ ታባ አሳ ስንን ማርካትያዎ ኦስነ ታንካ አሳ ናአይ፥ ቃይ ጾሳ ኪታንቻቱዋ ስንን ማርካታና፤ 9ሽን አሳ ስንን ታና ካድያዋንታ ታንካ አሳ ናአይ፥ ቃይ ጾሳ ኪታንቻቱዋ ስንን ካዳና።
10“ታ ቦላ፥ አሳ ናኣ ቦላ፥ ቦርያ ቃላ ሃሳይያዌ ደኦፐ አ ናቁ አቶ ጌተታና፤ ሽን ጌሻ አያና ቦላ ቦርያ ቃላ ሃሳይያዌ ደኦፐ ቃይ አ ናቁ አቶ ጌተተና።#ማቶሳ 12:32፤ ማር. 3:29
11“አሳይ ህንተንታ አይሁደ ዎስያ ጎልያኮ፥ ጋድያ አይስያዋንቱኮነ ማታይ ደእያዋንቱ ስን ፕርዳዉ ሺሽያ ዎደ፥ ‘ዋግ ዛራኔሻ? ዎይ አያ ጊደ ሃሳያኔሻ?’ ያጊደ ህርጎፕተ፤ 12አያዉ ጎፐ፥ ህንተና አያና ጌሻይ ህንተንቱ ሄ ሳትያን ሃሳያናዉ በስያባ ታማርሳናዋ” ያጌዳ።#ማቶሳ 10:19-20፤ ማር. 13:11፤ ሉቃሳ 21:14-15
ዱረ ብታንያ ቦዛተ ኦድያ ሌምሱዋ
13አሳ ጋርሳፐ እት ብታኒ የሱሳ፥ “ታማርስያዎ፥ ኑ አቡ ሀይቂና ኑን ላታና ማላ አቴዳባ፥ ታዉ ግሻና ማላ ሀያ ጎዶ ታ እሻዉ ኦዳ” ያጌዳ።
14የሱስ ቃይ፥ “ሀ ብታነዉ፥ ህንተንቱ ቦላን ፕርድያዋ ግዳናዳነ ሄዋ ህንተዉ ግሻናዳን ታና ኦኔ ሱንዳዌ?” ያጌዳ።
15ጉጂደካ ኡባቱዋ፥ “አሳ ሸምፖ ሻሉዋ ዱረተይ ደኡዋ እመና ድራዉ፥ ያረትያዋፐነ ዮራትያዋፐ ናገትተ፤ ዱረተ አሙዋ ኡባፐካ ህንተና ናግተ” ያጌዳ።
16ካሊደካ ሀዋዳን ያግ ሌምሱዋ ኡንቱንቶ ኦዴዳ: “አዉ ደእያ ቢታይ ዳርሲደ ካ ሞኬዳ እት ዱረ ብታኒ ደኤ። 17ሀ ብታኒ፥ ‘ታዉ ታ ካ ዎናዉ ግድያ ሳአይ ባንታዋ ድራዉ አያ ኦሻ?’ ያጊደ፥ ባረ ዎዛናን ቆፔዳ፤ 18ሀዋዳን ያግ ማሌዳ፤ ‘ታን ዎታነ ጎፐ፥ ታዉ ደእያ ዬስያ ኮላደ፥ ሀራ አክያ ዬስያ መና ያጊደ ማሌዳ፤ ሄዋን ታ ካነ ታዉ ደእያ ሚሻ ኡባ ዎና። 19ያታደ ታና፥ “ነ ካጫይ ዳሮ ሎአ፤ ነዉ ዳሮ ዎድያዉ ግድያ ማጹዋ ሺሻዳ፤ ስም ሸምፓደ ማ፥ ኡሻ፥ ናሸታ” ጋና’ ያጌዳ።
20“ሽን ጾሳይ አ፥ ‘ሀ ቦዛዉ፥ ሀቼ ቃማ ኔን ሀይቃ። ያትና ሀ ኔን ሺሼዳ ማጹ ኡባይ ኦስ ግዳናዌ?’ ያጌዳ።
21“ባረዉ ቢታ ቦላን ሻሉዋ ሺሽያዌ፥ ጾሳ ስንን ቃይ ማንቆ ግዴዳ አሳይ ሀ ብታንያ ማላ” ያጌዳ።
ኡባ ዎደ ጾሳን አማነቱሳ ኮሼ
(ማቶሳ 6:25-34)
22ሀዋፐ ካላ የሱስ ባረና ካልያዋንታ፥ “ሀዋ ድራዉ፥ ታ ህንተዉ ኦዳይ: ህንተንቱ ፓጻ ደአናዉ አያ ማኔ? ህንተንቱ ቦላዉ አያ ማያኔ? ያጊደ ህርጎፕተ።
23“ጋሱካ፥ ሸምፑ ቁማፐ፥ ቃይ አሳተይ ማዩዋፐ አኔ? 24አነ ቁራቱዋ ጼልተ፤ ኡንቱንቱ ዘርክኖ፤ ጫክክኖ፤ ኡንቱንቶ ካ ሺሽያ ሳአይ ዎይ ዬሲ ባዋ፤ ሀኖፐ አትን፥ ኡንቱንታ ጾሳይ ምዜ፤ ህንተንቱ ካፋቱዋፐ ዳሮፐ ዳርክቴ? 25ህንተንቱፐ ዳሪ ቆፒደ ዳሮ ዎድያ ደአናዉ ዳንዳይያዌ ኦኔ?
26“ስም ህንተንቱ ሀ ላፋባ ኦናዉ ዳንዳየናዋንታ ግዶፐ አያዉ ሀራባዉ ህርገቲቴ? 27ጪሻቱ ዎት ድጪኖንቶ አነ ጼልተ፤ ኡንቱንቱ ኪታን ዳቡርክኖ፤ ፑቱዋ ሱቂክኖ፤ ግዶ ሽን ታን ህንተዉ ኦድያዌ፥ ሶሎሞነ ሄዋ ኬና ቦንቼቴዳዋ#12:27 ሶሎሞነ ሄዋ ኬና ቦንቼቴዳዋ፦ አይሁዳ አሳይ ሶሎሞነ ባረ ደኤዳ ላይ ኡባን ዳሮ ዱረተን ደኤዳ ጊደ ቆፒኖ። ግዲደ፥ ሄ ጪሻቱዋፐ እቱዋ ማላነ ማይቤና።#1 ካታ. 10:4-7፤ 2 ኦዱዋ 9:3-6 28ህንተንቶ ላፋ አማኑ ደእያዋንቶ፥ ያቶፐ ጾሳይ ሀቼ ቤቲደ፥ ዎንት ታማን ኤጻናዉ ኦለትያ፥ ደንባን ዶልያ ማታ ሀዋዳን ማይዝያዋ ግዶፐ፥ ህንተንታ ዎቲደ ኡንቱንቱፐ አደ ማይዘኔ?
29“ሀዋ ድራዉ፥ ‘አያ ማኔ? አያ ኡሻኔ?’ ያጊደ ኡባ ዎደ ኮዮፕተነ ህርጎፕተ። 30አያዉ ጎፐ፥ ሀዋ ደማናዉ ሀ አላምያን ደእያ ጾሳን አማነተና አሳይ ህርገቲኖ። ህንተንቶ ሀዌ ኡባይ ኮሽያዋ ሳሉዋን ደእያ ህንተንቱ አዉ ኤሬ። 31ሄዋ ሀንያዋ አጊደ፥ ጾሳ ካዉተ ኮይተ፤ እ ህንተንታ ኮሽያዋ ኡባ እማናዋ።
ሳኣን ባረ ዱረተን አማነቶዌ ሳሉዋን ዋኒ?
(ማቶሳ 6:19-21)
32“ህንተንቱ ጉ ግድንቶነ፥ ሳሉዋ ህንተንቱ አዉ ባረ ካዉተ ህንተንቶ እማናዉ ናሸቴዳ ድራዉ ያዮፕተ።
33“ህንተዉ ደእያዋ ዛልኢደ ማንቆ እምተ፤ ካይሱ ሺቀናሳን፥ ብልአይካ ሜናሳን፥ ሳሉዋን ዉረና ሚሻ ዳጋዪደ፥ ኤጨና ቃርጭታቱዋ ህንተንቱ ሁጰዉ ዎተ። 34አያዉ ጎፐ፥ ህንተንቱ ዎዛናይ ህንተ ሚሻይ ደእያ ሳን ደአናዋ።
ምኖ ኦሳንቻ
35“ህንተ ጼሳይ ዳንጨቶዋ፥ ህንተ ጾምፒካ ፖኤዳዋ ግዶ።#ማቶሳ 25:1-13 36ህንተንቱካ፥ ባረንቱ ጎዳይ ዪደ ፐንግያ ቆጽያ ዎደ፥ ኤለካ ዶያናዉ ቡላቻፐ ስማና ጋካናዉ ናግያ ኦሳንቻቱዋ ማላትተ።#ማር. 13:34-36 37ባረንቱ ጎዳይ ሶይ ዬዳ ዎደ ቤጎት ደእሽን ደምያ ሄ ኦሳንቻቱ አንጀቴዳዋንታ። ታን ቱሙዋ ጋይ፤ እ ኡንቱንታ፥ ‘ኡትተ’ ጊደ፥ ባረ ዳንጩዋ ምንሲደ ኡንቱንቶ ቁማ አደ ሾባናዋ። 38ጎዳይ ሄካ ብላህያን ዎይ ሄካ ብላህያፐ ካላ ዬዳ ዎደ፥ ቤጎቲደ ገንጭ ናጊደ ቤትያ ቆማቱ አንጀቴዳዋንታ። 39ሀዋ ቃይ ኤርተ፤ ካይሱ አይ ሳትያን ይንቶ ጎልያዉ ኤርንቶ፥ ጎሊ ቦከትያ ዎደ ጮኡ ጊደ ጼለናሽን።#ማቶሳ 24:43፣ 44 40አሳ ናአይ ቆፐና ሳትያን ያናዋ፤ ህንተንቱ ጊገት ናግተ” ያጌዳ።
41ጰጽሮስካ “ጎዳዉ፥ ሀ ሌምሱዋ ኔን ኦድያዌ ኑ ጻላላሴ ሀራ ኡባዉካ እትፐ ኦዳይ?” ያጌዳ።
42ጎዳይካ፥ “ስም ኡንቱንቱ ባረ ሶይ አሳዉ ቁማ እማናዉ በስያ ሳትያን እማና ማላ፥ አ ጎዳይ ሱንያ አማነቴዳነ ኤራንቻ ምዝያ ቆማይ ኦኔ?” ያጌዳ። 43ጎዳይ ስምያ ዎደ ሀዋዳን ኪተቲና ደምያ ቆማይ እ አንጀቴዳዋ። 44ታን ህንተዉ ቱሙዋ ኦዳይ፤ ደእያ ማጹዋ ኡባ ቦላን አ ሱንናዋ። 45የዉዋን ቃይ ሄ ቆማይ፥ “ታ ጎዳይ ኤለ ዬና፤ ጋምአናዋ” ያግ ባረ ዎዛናን ቆፖፐነ አቱማነ ማጫ ቆማቱዋ ሾቻ ዶሞፐ፥ ቃይካ ኮዮዋዳን ሙሳነ ኡሻ፥ ማቱሳካ ዶሞፐ፥ 46ሄ ቆማ ጎዳይ፥ እ ቆፐና ጋላስነ ስቤና ሳትያን ያናዋ፤ ሄ ዎድያን አ ቃንጸሬደ፥ አ ግሹዋ ካጫካ አማነናዋንቱና እትሳ ኡዳናዋ።
47ባረ ጎዳ ሸንያ ኤሪደ ጊገናዌነ አ ሸንያዳን ኪተተና ቆማይ፥ እ ኢታ ኦባ ኦበታናዋ። 48ኤርቤናዌ ቃይ ኦበታናዉ በስያዋ ኦዳዌ፥ ጉ ኦበቴ። ዳሮባይ እመቴዳ አሳ ኡባፐ፥ አፐ ዳሮባይ ኮየቴ፤ ዎልቃማ ሀዳራይ እመቶዋፐ፥ አፐ ዳርሲደ ኮየቴ።
49የሱስ፥ “ታን ዬዳዌ፥ ሀ ሳኣ ቦላ ታማ ሳናሳ፤ ሀእካ ኤጼደንቶ፥ ታና አይ ኬና ናሸቻናዌሻ። 50ታን ጻማቀታና መቱዋ ጽንቃታይ ፖለታና ጋካናዉ ዋናደ ኡንኤታይታ!#ማር. 10:38 51ሀ ሳኣ ታን ዬዳዌ፥ ሳሮተ አሀናሳ ማላቲዬ? ህንተዉ ማላቶፖ። ታን ዮዌ፥ ሳሮታዉ ግደናን ሻካናሳፐ አትን። 52አያዉ ጎፐ፥ ሀእፐ ዶምና እት ጎልያን ደእያ እቼሹ አሳቱ ሻከታናዋንታ፤ ሄዛቱ ላአቱዋ ቦላ፥ ላአቱካ ሄዛቱዋ ቦላ ደንዲደ ዋላቀታናዋንታ። 53አዉ ናኣ ቦላ፥ ናአይካ አዉዋ ቦላ፥ አታ ናት ቦላ፥ ናታካ አት ቦላ፥ ቦሎታታ ናኣ ማች ቦላ፥ ናኣ ማቻካ ቦሎታት ቦላ፥ ዋላሳን ደንዲደ ሻከታናዋንታ” ያጌዳ።#ሚክ. 7:6
ዎድያ ሀኖታ ኤሩዋ
(ማቶሳ 16:2-3)
54ቃይካ የሱስ አሳዉ፥ “አዋይ ዉልያ ባጋና ህንተ ሻርያ በኦፐ፥ ‘ሀእ ሀ ሳትያን ሄኮ ዎልቃማ እራይ ቡካና ሀኔ’ ያጊታ፤ ቱሙካ ቃይ ቡኬ። 55ዱገ ባጋና ጫርኩ ጫርኮደ፥ ‘ሀቼ ሻማናዋ’ ያጊታ፤ ጌተቶዋዳንካ ቃይ ሀኔ። 56ህንተኖ ሎአ ማላትያ ኢታቶ፥ ሳኣነ ሳሉዋ ጼሊደ፥ ሀናናዋ ኤሪታ፤ ሽን ሀ ዎድያባ ዎት ኤራናዉ ዳንዳይክቴ?
ስጋተባነ ሞቱዋባ
(ማቶሳ 5:25-26)
57“ዎደ ህንተንቱ ጽሎ ግዴዳ የዉዋ ህንተንቶ አያዉ ፕርድክቴ? 58ነ ሞርክያና እትፐ ፕርድያ ዳና ስንን ሺቃናዉ ቦደ፥ ብሮ ኦግያ ቦላ ደእሽን ስገታ ድጋ። ሄዌ ዮፐ ኔና ጎቺደ ፕርድያ ዳናኮ አፋና፤ ዳናይካ ፖልሰዉ አ እማናዋ፤ ፖልሲ ቃሾ ጎለን የጋናዋ። 59ታን ነዉ ኦድያዌ፥ ዉርሰ አጩዋ ጭጋና ጋካናዉ ሄዋፐ ከሳካ” ያጌዳ።
Currently Selected:
ሉቃሳ ምሽራቹዋ 12: DFBE
Označeno
Share
Copy
Want to have your highlights saved across all your devices? Sign up or sign in
The Word for the World Ethiopia