ମାଥିଉ 2
2
ହୁରବ୍ ଦିଗାର୍ ପଣ୍ଡିତ୍ମ୍ନ୍
1ଜ୍ଡେବ୍ଳ୍ ହେରୋଦ୍ ର୍ଜା ଯିହୁଦା ଦେଶ୍କେ ଶାସନ୍ କ୍ର୍ତିରିଲା, ସେଡେବ୍ଳ୍ ଯୀଶୁ ଯିହୁଦା ଦେଶାର୍ ବେଥ୍ଲିହିମ୍ ସ୍ହରେ ଜ୍ର୍ନ୍ ଅଇଲା। ହ୍ଚେ ଦ୍କା, ଯିହୁଦା ଦେଶାର୍ ହୁରବ୍ ଦିଗାର୍ କ୍ତେକ୍ ପଣ୍ଡିତ୍ମ୍ନ୍ ଯିରୁଶାଲମ୍ ସ୍ହର୍କେ ଆସି ହ୍ଚାର୍ଲାଇ, 2“ସେ ଜ୍ର୍ନ୍ ଅଇଲା ହିଲା କେଣେ, ଯେ ଯିହୁଦିମ୍ନ୍କାର୍ ର୍ଜା ଅଇଦେ, ସେ କୁଇତି? କାଇତାକ୍ ଅମିମ୍ନ୍ ଅମାର୍ ଦେଶେ ତାର୍ ଜ୍ର୍ନାର୍ କ୍ତା ଜାଣାଉତା ତାରା ଦ୍କି, ତାକେ ମୁଣ୍ତିଆ ମାରୁକେ ଆଇଲୁ ଆଚୁ।” 3ଯିହୁଦିମ୍ନ୍କାର୍ ର୍ଜା ଜ୍ର୍ନ୍ ଅଇଲାର୍ କ୍ତାଶୁଣି ହେରୋଦ୍ ର୍ଜା ଆର୍ ଯିରୁଶାଲମାର୍ ସ୍ବୁ ଲକ୍ ଚାନିଆ ଅଇଲାଇ।
4ଆରେକ୍, ସେ ଲକ୍ମ୍ନ୍କାର୍ ସ୍ବୁ ମୁକିଆ ଜାଜକ୍ ଆର୍ ମୋଶାର୍ ନିଆଇ ଶିକାଉତା ଲକ୍ମ୍ନ୍କେ ଗଟେତ୍ଇ କୁଦି, ଖ୍ରୀଷ୍ଟ କୁଇତି ଜ୍ର୍ନ୍ ଅଇଦେ। ସେ ବିଷୟେ ପବିତର୍ ଶାସ୍ତର୍ କାଇରି ଅଇଲିନି, ସେରି ସେମ୍ନ୍କାର୍ ତ୍ଇହ୍ଣି ଜାଣୁକେ ଚେଷ୍ଟା କ୍ଲା। 5ସେମ୍ନ୍ ତାକେ କଇଲାଇ, “ଖ୍ରୀଷ୍ଟ ଯିହୁଦା ଜିଲାର୍ ବେଥ୍ଲିହିମ୍ ସ୍ହରେ ଜ୍ର୍ନ୍ ଅଇଦେ। କାଇତାକ୍ ବବିଶତ୍ କ୍ତା କ୍ଉତାଲକ୍ ମିଖା, ଇଶ୍ୱର୍ କଇରିଲା କ୍ତାକେ ଶାସ୍ତର୍ ଲ୍ଗେ ବେସିଦିନ୍ ହୁର୍ବେ ଅନ୍କ୍ରି ଲେକିଆଚେ,
6‘ଏ! ଯିହୁଦା ଜିଲାର୍ ବେଥ୍ଲିହିମ୍ ସ୍ହରାର୍ ଲକ୍ମ୍ନ୍, ତୁମି ଯିହୁଦା ଜିଲାର୍ ନେତାମ୍ନ୍କାର୍ ବିତ୍ରେ କାଇରି ହେ ସାନ୍ନାଇ, କାଇତାକ୍ ଯେ ଅମାର୍ ଇସ୍ରାଏଲ୍ ଦେଶାର୍ ଲକ୍କେ ହସ୍ତି, ଅନ୍କ୍ରି ଗଟେକ୍ ଶାସନ୍କ୍ର୍ତା ଲକ୍ ତର୍ ତ୍ଇହ୍ଣି ଆସେଦ୍, ଆର୍ ସେ ଶାସନ୍କ୍ର୍ତା ଲକ୍ ଅଇଦ୍।’”
7ତାର୍ ହ୍ଚେ ହେରୋଦ୍ ର୍ଜା ଜ୍ର୍ନ୍ ଅଇଲା ହିଲାର୍ ବିଷଇ ଜାଣୁକେ, ପଣ୍ଡିତ୍ ମ୍ନ୍କେ କେ ନ୍ଜାନ୍ଲା ହର୍ କୁଦି, ସେ ତାରା କ୍ଡେବ୍ଳ୍ ଡିସ୍ଲି, ଇରି ସେମ୍ନ୍କେ ବ୍ଲ୍କ୍ରି ହ୍ଚାର୍ଲା। 8ଆରେକ୍, ସେ ପଣ୍ଡିତ୍ ମ୍ନ୍କେ ବେଥ୍ଲିହିମ୍କେ ହ୍ଟାଇକ୍ରି କଇଲା, “ତୁମିମ୍ନ୍ ଜାଇ ସେ ହିଲାକେ ବ୍ଲ୍କ୍ରି କଜା, ଆର୍ ମିଳ୍ଲା ମାଡେ ମର୍ଲ୍ଗେ ଲେଉଟି ଆସି, ତୁମି ଜାଇରି ଦ୍କ୍ଲାସ୍ ସେରି ମକେ କ୍ଉଆ, ଜ୍ନ୍କ୍ରି ଅମି ହେ ଜାଇ ତାକେ ମୁଣ୍ତିଆ ମାରୁମା।”
9-10ହ୍ଚେ ର୍ଜାର୍ କ୍ତାଶୁଣି ସେମ୍ନ୍ ଉଟି ଗ୍ଲାଇ। ଆରେକ୍ ଦ୍କା, ସେମ୍ନ୍ ଜାତାବାଟେ ପୁରୁବ୍ ଦିଗେ ଦ୍କିରିଲା ତାରାକେ ଆର୍ ତରେକ୍ ଦ୍କ୍ଲାଇ। ସେମ୍ନ୍ ସେରି ଦ୍କି ବେସି ସ୍ର୍ଦା ଅଇଲାଇ, ଆର୍ ସେ ତାରା ତାକାର୍ ଆଗେ ଆଗେ ଜାଇ, ସେ ହିଲା ରିଲା ଗ୍ର୍ ଉହ୍ରେ ତେବ୍ଲି। ଆର୍ ସେମ୍ନ୍ ସେ ତାରା ଦ୍କି ବେସି ସ୍ର୍ଦା ଅଇଲାଇ।
11ଆରେକ୍, ଗ୍ର୍ ବିତ୍ରେ ଜାଇ ହିଲାକେ ତାର୍ ଆଇସି ମରୀୟମାର୍ ସ୍ଙ୍ଗ୍ ଦ୍କି, ତାକେ ମୁଣ୍ତିଆ ମାରି ଜୁଆର୍ କ୍ରି ଆରାଦନା କ୍ଲାଇ, ଆରେକ୍ ନିଜାର୍ ନିଜାର୍ ହେଡି ଇଟାଇ ତାକେ ସନା, ବେସି ବାସ୍ନା ଦୁପ୍ ଆର୍ ବାସ୍ନା ଅସ ଚିକାଣ୍ ଉପ୍ହାର୍ ଦିଲାଇ। 12ହ୍ଚେ ହେରୋଦ୍ ର୍ଜାର୍ ଲ୍ଗେ ଲେଉଟି ନ୍ଜାମ୍କେ, ଚ୍ହ୍ନେ ଇଶ୍ୱର୍କେ ଦ୍କି ଜାଗ୍ରତ୍ କ୍ତାଶୁଣି, ସେମ୍ନ୍ ର୍ଜାକେ ନ୍କଇକ୍ରି ବିନ୍ ବାଟ୍ ଅଇ ନିଜାର୍ ଦେଶ୍କେ ଗ୍ଲାଇ।
ମିସର୍ ଦେଶ୍କେ ଗ୍ଲାଇ
13ସେମ୍ନ୍ ଗ୍ଲାହ୍ଚେ, ଦ୍କା, ମାପ୍ରୁର୍ ଗଟେକ୍ ଦୂତ୍ ଚ୍ହ୍ନେ ଯୋଷେପ୍କେ ଦ୍କାଇଅଇ କଇଲା, “ଉଟ୍, ହିଲା ଆର୍ ତାର୍ ଆଇସିକେ ନ୍ଇ ମିସର୍ ଦେଶ୍କେ ହ୍ଳାଉ, ଆରେକ୍, ଅମି ତୁମୁକେ ନ୍କ୍ଉତା ହ୍ତେକ୍ ସେତି ରିଆ, କାଇତାକ୍ ହିଲାକେ ନାସ୍ କ୍ରୁକେ ହେରୋଦ୍ ର୍ଜା କଜୁଲା।” 14ସେ ରାତି ଯୋଷେପ୍ ଉଟିକ୍ରି ହିଲା ଆର୍ ତାର୍ ଆଇସିକେ ଦ୍ରି ମିସର୍ ଦେଶେ ହ୍ଳାଇଲା, 15ଆରେକ୍ ହେରୋଦ୍ ର୍ଜା ମର୍ତା ହ୍ତେକ୍ ମିସର ଦେଶେ ରିଲାଇ, ଜ୍ନ୍କ୍ରି ବେସି ଆଗେ ହଶେୟ ବବିଶତ୍ କ୍ତା କ୍ଉତା ଲକାର୍ ତ୍ଇହ୍ଣି କଇରିଲା ମାପ୍ରୁର୍ ଇକ୍ତା ହୁରାଅଇଦ୍, “ମିସର୍ ଦେଶେହ୍ଣି ଅମି ନିଜାର୍ ହିଲାକେ କୁଦାଇଲୁ।” 16ହେରୋଦ୍ ର୍ଜା ବେସି ରିସା ଅଇଲା ଜ୍ଡେବ୍ଳ୍ ସେ ଜାଣ୍ଲା କି ସେ ତିନିଗଟ୍ ବୁଦିମାନ୍ ପଣ୍ଡିତ୍ ତାର୍ ଆଦେଶ୍କେ ନ୍ମାନି ତାକେ ଟକ୍ଲାଇ ବ୍ଲି। ସେ ତାର୍ ସେନା ମ୍ନ୍କେ ହ୍ଟାଇ ବେଥ୍ଲିହିମ୍ ସହର୍ ଆର୍ ତାର୍ ପାକି ତଡିର୍ ଜାଗାର୍ ସ୍ବୁ ଦୁଇ ବର୍ଷ ତ୍ଇହ୍ଣି କମ୍ ବର୍ଷାର୍ ହିଲାମ୍ନ୍କେ ମ୍ର୍ନେ ମାରୁକେ ଆଦେଶ୍ ଦିଲା। ସେରି ସେ ପଣ୍ଡିତ୍ ମ୍ନ୍କାର୍ ତାରା ଉଦ୍ଲା ବିଷୟ୍ ତେଇ ହ୍ଣି ଜାନ୍ଲା।
17ଇରି କାଇତାକ୍ ଗଟ୍ଲି ବ୍ଲେକ୍, ଶାସ୍ତର୍ ଲ୍ଗେ ଲେକା ଯିରିମିୟ ବବିଶତ୍ କ୍ତା କ୍ଉତା ଲକ୍କେ ଇଶ୍ୱର୍ କଇରିଲା କ୍ତା ସ୍ତ୍ ଗଟ୍ଲି।
18ସେତି ଅନ୍କାର୍ ଲେକାଆଚେ, “ଦାଉଦ୍ ର୍ଜାର୍ ବ୍ଉଶାର୍ ଲକ୍ମନ୍ ରେତା ଜାଗା ରାମା ଲ୍ଗେ ହ୍ଣି ଗଟେକ୍ ଲକାର୍ କାନ୍ଦ୍ତାର୍ ଶୁଣା ଗ୍ଲି। କାନ୍ଦ୍ ଆର୍ ବେସି ଦୁକ୍, ରାହେଲ୍ ନିଜାର୍ ହିଲାମ୍ନ୍କାର୍ ଗିନେ କାନ୍ଦ୍ତି ରିଲା। ଆରେକ୍ ସେମ୍ନ୍ ମ୍ରିଗ୍ଲାଇ ବ୍ଲି ସେ ଶାନ୍ତିର୍ କ୍ତା ମାନୁକେ ଇଚା ନ୍କେର୍ତି ରିଲା।”
ନାଜରିତ୍କେ ଲେଉଟି ଆଇଲାୟ୍
19ଯୋଷେପ୍, ମରୀୟମ୍ ଆର୍ ଯୀଶୁ ମିସର୍ ଦେଶେ ରିଲାଇ। ହେରୋଦ୍ ମ୍ଲାହ୍ଚେ, ଦ୍କା, ମାପ୍ରୁ ଗଟେକ୍ ଦୂତ୍ ମିସର ଦେଶେ ଯୋଷେପ୍କେ ଚ୍ହ୍ନେ ଦ୍କାଇଅଇ କଇଲା, 20“ଉଟ୍, ହିଲା ଆର୍ ତାର୍ ଆଇସିକେ ନ୍ଇ ଇସ୍ରାଏଲ୍ ଦେଶ୍କେ ଯାହା। କାଇତାକ୍ ହେରୋଦ୍ ର୍ଜା ଆର୍ ତାର୍ ଲକ୍ମନ୍ ମ୍ଲାଇ, ଜେମ୍ନ୍ କି ହିଲାକେ ମ୍ର୍ନେ ମାରୁକେ ଚେଷ୍ଟା କ୍ର୍ତିରିଲାଇ।” 21ସେଡେବ୍ଳ୍ ଯୋଷେପ୍ ଉଟିକ୍ରି ହିଲା ଆର୍ ତାର୍ ଆଇସିକେ ଦ୍ରି, ମିସର ଦେଶ୍କେ ଚାଡି ଇସ୍ରାଏଲ୍ ଦେଶେ ଆଇଲାଇ।
22ମ୍ତର୍ ଆର୍ଖିଲାୟ ନିଜାର୍ ଉବା ହେରୋଦାର୍ ଜାଗାଇ ଯିହୁଦା ଜିଲାର୍ ର୍ଜା ଅଇଆଚେ ଇରି ଜ୍ଡେବ୍ଳ୍ ଯୋଷେପ୍ ଶୁଣ୍ଲା, ସେଡେବ୍ଳ୍ ସେତି ଜ୍ମ୍କେ ସେ ଡିର୍ଲା। ମ୍ତର୍ ଚ୍ହ୍ନେ ଆଦେଶ୍ ହାଇ, ସେତିହ୍ଣି ସେ ଗାଲିଲୀ ଜିଲାକେ ଗ୍ଲା, 23ଆର୍ ନାଜରିତ ନାଉର୍ ସ୍ହରେ ଯାଇ ବାସାକ୍ଲା। ଜ୍ନ୍କ୍ରି ବବିଶତ୍ କ୍ତା କ୍ଉତା ଲକ୍ମ୍ନ୍ କଇଲା ଇକ୍ତା ସ୍ତ୍ ଅଇଦ୍ ଯେ, “ସେ ନାଜରିତ ସ୍ହରାର୍ ଲକ୍ବ୍ଲି ନାଉଁ ଅଇଦ୍।”
Currently Selected:
ମାଥିଉ 2: BDVNT
Označeno
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.