THUFIM 2
2
Fimnak Ih Man
1Ka fapa, ka lo simmi hi zir awla,
Tuah dingih ka lo simmi kha na thinlung ah khum aw.
2Fimnak hi ziang a si ti kha ngai awla,
Theithiam dingin na thinlung thawn zuam aw.
3A si, hmuhnak le theihnak kha na ko ih,
Theihthiamnak khal na dil ahcun;
4Ngun bangin ngah na duh ih,
Hlawnthil thuh mi bangin na hawl ahcun,
5Cutin na tuah asile Bawipa ṭihzah cu ziang a si ti na thei ding ih,
Pathian theihnak cu na hmu suak ding a si.
6Fimnak petu cu Bawipa a si ih,
Amah ih hnen ihsin fimthiamnak le theihthiamnak an ngah a si.
7Miding pawl le mi thinlung tluang pawl cu
A bawm ih a humhim a si.
8Midang parah thuding a tuahtu pawl a humhim ih
Amah a duhdawtu pawl kha a kilveng a si.
9Ka thu na ngai a si ahcun a dikmi, a ṭha mi le
Ka tuah ding mi ziang a si ti kha na thei thei ding.
10Fimnak na lung sungah a lut ding ih,
Na theihnak in a lo lungawi ter ding.
11Na fimnak le na theih thiamnak khan a lo humhim ding ih,
12Thil ṭha lo lakin a lo kham ding.
Ṭong ṭha lo a hmangtu pawl lak ihsin a lo kilveng ding.
13Cu pawl cun lamthim ih feh dingah lam dik cu an tlansan;
14Thil ṭha lo tuah kha an duhzawng a si ih,
Thilsual tuahnak hmun ah an lung a awi ṭheu.
15Rinsan tlak lo le zum tlak lomi pawl an si.
16Ṭongkam naal zet thawn a lo bumtu nunau ṭha lo hnen ihsin a lo run suak ding;
17Cu nu cu a pasal parah dingnak neilotu le,
Pathian hnenih a thukam ziang a siarlotu a si.
18A inn ah na feh a si ahcun thihnak lamzin ah a fehtu na si.
19A hnenah a fehtu cu zokhal an kirsal nawn lo.
Nunnak lam an tong sal nawn lo.
20Cu a si ruangah miṭha pawl ih lam cu na zawh dingih
Miding pawl ih nun bangin na nung ding.
21Miding mi le miṭha famkim pawl cu hi leilung ah an um ding.
22Asinain mi ṭha lo pawl cu cuih ramsung ihsin Pathian in a dawihlo ding ih,
Mi hrokhrawl pawl cu phawi hlo an si ding.
Currently Selected:
THUFIM 2: FCL
Označeno
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.