मत्ति 20
20
काम पाकालाइको तुलना
1इसु दोअ्काताङहानेहि, “सादेलको सारभि बारिको एमि गिर्हिभाइका एइ। जाइ एर्हिमाङ ताइको आङगुर बारिता जेलाता काम पापालि द्याङगेलाइ भोलि हानेहि। 2काम पाकालाइदोफा एनिता निङका जेला तोकेतेङ वा एम्बालाइहेङ ताइको आङगुरबारिता काम पालि दिङगिल्हि।
3“कालाउ क्हा बजेभारि बाहार ओल्हेलाउ वा हातेता काम माकोसिङ जाअ्तेङ हिका द्याङगेलाइहेङ तिङहि। 4वा एम्बालाइहेङ दोअ्हि, ‘नेलाइ बुङ काङको आङगुर बारिता काम पालि हानेसु रो नेलाइको निङलि गोइका मुनासिप जेला का नेलाइहेङ प्याङका।’ 5कालाउ एम्बालाइ काम पालि हानेहि। आरोङ वा तेन्हे बजेभारि रो सुम बजेभारि बुङ बो द्याङगेलाइहेङ एन्साङ पातेङ कामता लागाइहि।
6“आरोङ वा ना बजे हातेभारि हानेलाइ बोगेलाइहेङ जाअ्तेङ हिका तिङहि रो एम्बालाइहेङ दोअ्हि, ‘नेलाइ हाइपालि इता काममाकोसिङ लिअ्पाङ जाअ्तेङ हिसुन्हा?’
7“एम्बालाइ वासेहेङ दोअ्हि, ‘हासुङ केलाइहेङ कामता लागाइका मान्थु।’ वा एम्बालाइहेङ दोअ्हि, ‘एन्सानु नेलाइ बुङ काङको आङगुर बारिता काम पालि लोसु।’
8“जेलाउ बेला दुबेहि, कालाउ आङगुर बारिको गिर्हि ताइको कामत्याहेङ दोअ्हि, ‘काम पाकालाइहेङ काइतेङ न्हुअ्सो लोकालाइसो लाम्फा लोकालाइ सुदाङहेङ एम्बालाइको जेला पि।’#लेबि १९:१३; नियम २४:१५ 9ना बजे कामता लागेकालाइ लोहि रो एम्बालाइ झाराङ पुरा दिनाको जेला निङहि। 10जेलाउ लाम्फा कामता लागेकालाइ लोहि, कालाउ एम्बालाइ हेन्जा दोङ जेला निनाङ वाला दोअ्तेङ फोम पाका हिघाहि, कालाउ बुङ एम्बालाइ झाराङ एनिको जेला खिनिङ निङहि। 11जेला निङकान्हुअ्सो एम्बालाइ किसमिस बारिको गिर्हिकोता हानितेङ गनगन पालि तेङहि, 12एम्बालाइ दोअ्लि तेङहि, ‘इदोइ न्हुअ्सो लोकालाइ ए घान्टा खिनिङ काम पाहि, केलाइ ते लिअ्पाङ धाङका सानेता काम पान्हाहि। कालाउ बुङ ना एम्बालाइहेङ बुङ केलाइहेङ झोको दोङ जेला पिकाहिन्हा।’
13“कालाउ बुङ वा एम्बालाइता एमिहेङ उतर पिहि, ‘सानाइति, का नासेहेङ हाइदोङ बेमान पाका मान्थुघा। हाइ ना कादोफा पुरा ए दिनाको जेलाता काम पालि मन्जुर पाका माको? 14नाङको निङका जेला चुमतेङ हाने। का न्हुअ्सो कामता लोकालाइहेङ बुङ नासेहेङ झोको दोङ जेला पिलि भोखा। 15काङको जेथे हि, इङको का ताइमिको दोअ्काभाइपा पालि मानिनाङका कुनु? ना ताइको मिँ हाइपालि तु:पाखेना?’”
16कालाउ इसु दोअ्हि, “एसा दोङ न्हुअ्कालाइ लानावा रो लाङकालाइ न्हुअ्तावा।”#मत्ति १९:३०; मर्कुस १०:३१; लुका १३:३०
इसु सुम्खे ताइमि सिका काथा पाका
(मर्कुस १०:३२-३४; लुका १८:३१-३४)
17इसु यरुसलेमभारि हानेकाताङ पालाउ तेन्हे चात्यागेलाइहेङ एपाहा चुमपुतेङ दोअ्हि, 18“हिङसु, केलाइ यरुसलेमभारि हानेदोङन्हाखे। एला का द्याङको चानहेङ मुल धामिगेलाइ रो धरममास्टरगेलाइको खुरता सुमप्यावा। एम्बालाइ वासेहेङ सिकासाजाइको दुस लागायावा। 19कासेहेङ गिल्ला पालि, छरि लागाइलि रो कुरुसता टाङगाइलि दोअ्तेङ एम्बालाइ कासेहेङ बोजात्यागेलाइको खुरता सुमप्यावा। कालाउ बुङ सुन्निता का सिन्हुतेङ ल्होकाङका।”
एमि आमाइको बिनइ
(मर्कुस १०:३५-४५; लुका २२:२४-२७)
20कालाउ जब्दियाको चान याकुब रो युहन्ना ताइको आमाइदोफा इसुकोता लोहि। कालाउ एम्बालाइको आमाइ इसुको आगाता तिर्हो थोतेङ सेउपातेङ एसा दोअ्हि, “कासेहेङ दाया पा।” 21इसु वासेहेङ हिअ्हि, “ना हाइ भोखेना?” वा दोअ्हि, “हुकुम पा, नाङको सारभिता काङको इदोइ न्हेमि चानगेलाइता एमि नाङको दाम्पाहा रो भेनेङ नाङको केपाहा योम्लि निनाको।” 22कालाउ बुङ इसु दोअ्हि, “नेलाइ हाइ र्हेसुखेना, इङको नेलाइ मागेस्वाना। जेदोङ तु:का सहेलि भोदोङखा, हाइ इङको नेलाइ सहेलि दोस्वाना?” एम्बालाइ दोअ्हि, “द्वाङ।” 23इसु दोअ्हि, “काङको तु: ते नेलाइ सहिस्वाना, कालाउ बुङ काङको दाम्पाहा रो केपाहा योम्लि पिका काङको खुरता मान्थु। इदोइ थामे एम्बालाइको हि, जाइको भाअ्सिङ काङको आबा त्यार पालिदोका हि।”
24इदोइ हिङतेङ तेमि चात्यागेलाइ इङको न्हेमि ओनेदोफा चेरताम्पाहि। 25कालाउ बुङ इसु एम्बालाइहेङ ताइकोता काइतेङ दोअ्हि, “नेलाइ दोङ गेसुखेना, बोजात्याको राजपाकालाइ ताइमन पातेङ हक चालाइखे रो बाबारकालाइ बुङ ताइ बसता हिका द्याङगेलाइहेङ खाबरा जामाइखे।#लुका २२:२५-२६ 26नेलाइको माझाता इसिका माज्याङ, कालाउ बुङ जाइ नेलाइता बारालि भोखे, इङको नेलाइको सेवापाका जेङलिगोयावा।#मत्ति २३:११; मर्कुस ९:३५; लुका २२:२६ 27जाइ नेलाइता लाङ जेङलि लाल्सा पाखे, इङको नेलाइको बान्धाइ जेङलिगोयावा। 28जेसापा का द्याङको चान सेवा निङलि माको, कालाउ बुङ बोमिको सेवा पालि रो हेन्जाङहेङ लाअ्पाकाको मोल चुकाइतेङ ताइको बायु पिलि लोघा।”
इसु न्हेमि कान्हाहेङ एल्पाका
(मर्कुस १०:४६-५२; लुका १८:३५-४३)
29ओबालाइ यरिहो पुरसो हानेकाताङ पालाउ, द्याङगेलाइको बाराका चेअ्सु इसुहेङ पिताइहि। 30दामाको भेर्पा योम्तेङहिका न्हेमि कान्हागेलाइ इसु इङको दामा हानेदोङखे दोअ्का हिङतेङ एसा दोअ्तेङ र्हिकाइहि, “ओइ प्रभु, दाउदको खाल, केलाइहेङ दाया पा।” 31द्याङगेलाइ एम्बालाइहेङ सिकापा हिसु दोअ्तेङ हाकाराइहि, कालाउ बुङ एम्बालाइ एसा दोअ्तेङ झन हापाङ र्हिकाइहि, “ओइ प्रभु, दाउदको खाल, केलाइहेङ दाया पा।” 32कालाउ इसु थिङगापा जाअ्हि रो एम्बालाइहेङ काइतेङ दोअ्हि, “नेलाइ हाइ भोसुखेना? का नेलाइको भाअ्सिङ हाइ पाप्याङका?” 33एम्बालाइ वासेहेङ दोअ्हि, “ओइ प्रभु, केलाइहेङ मिँ तिङका बान्हाइपि।” 34इसु दायातेङ एम्बालाइको मिँ साइपितेङसाङ एम्बालाइ तिङका जेङहि रो एम्बालाइ वासेहेङ पिताइहि।
Currently Selected:
मत्ति 20: DHIM
Označeno
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.