Va'Atəŋ 1
1
Va'atəŋ
(1:1—11:32)
Maŋgəlva azəməɗək zəga pakə gəm ɗəfa
(1:1—2:25)
1Də wətəŋ na, Maŋgəlva azəməɗək disiŋ də dəlvafuŋ.
2Dəlvafuŋ asanək ɗarə, pak dəmani, guzli dəsan aka təki mekeleŋ, heret iŋkile kpukpumɗe məbayaŋ gəgay dəsərətəni; əmpəs na Maŋgəlva dədabbal aket iŋkile, 3#2KO 4:6yaŋ Maŋgəlva amna: «əkeɗeɗe dəkekeɓe'i!» əkeɗeɗe akekeɓe'ke. 4Maŋgəlva awlak na əkeɗeɗe məkekeɓe'in lewi yi. Maŋgəlva agohonək əkeɗeɗe məkekeɓe'in də guzliyo. 5Maŋgəlva aya əkeɗeɗe məkekeɓe'in na, «kapaya», guzli na «dəfəɗa». Təki atirke, təki addaŋka: pay maddaabəŋgi yi.
6 #
2PI 3:5
Maŋgəlva anah əmpa na: «Təki keŋreŋge dəsan addekit iŋkile, duɗeket iŋkile!» 7Maŋgəlva aɗɗak təki keŋreŋge naka, awɗeketik iŋkile nafuŋ dit en balsən təki keŋreŋge. Vas agəɗə. 8Maŋgəlva aya təki keŋreŋge nak na, disiŋ. Təki atirke, təki addaŋka: pay masulani yi.
9Maŋgəlva anah na: «Iŋkile nammba disiŋ əŋ dəkkalaŋ a təki taka, təki məklakan dərbangən zəni!» Vas agəɗə. 10Maŋgəlva aya təki məklakan nak na, dəlvafuŋ; aya əkkal net iŋkile tam na, pehe. Maŋgəlva awla na, moggoni sawɓa. 11Maŋgəlva amna: «Dələv dəgilgit zəgeɗ məkdəketi: kevile aɗi mahanyən va zeŋvin asani, wəleŋɗe məzuwaŋ duwaŋ va zeŋvit asani!» Agəɗək vaska. 12Dəlvafuŋ agilgitik zəgeɗ məkdəketi: kevileɗ məzəɗɗaŋ mahẽyit təstəsə, gəm wəleŋɗe məzuwaŋ məs də mahẽyit addəvit kirtit va zeŋvit asani. Maŋgəlva awlak na, moggoni. 13Təki atirke, təki addaŋka; pay mahokoni yi.
14Maŋgəlva anah na: «Zəgeɗ məzuwiɗeŋ dəssoŋ a təki keŋreŋge na disiŋ, kawɗakan kapay də dəfɗa, dəssoŋgən zəgeɗ narban pay net wəzləreɗi, net əvoŋɗe gəm əzvaɗe, 15dəssoŋgən məzuwiɗeŋ a təki keŋreŋge na disiŋ, kawkekeɓe' dəlvafuŋ!» Vas agəɗə. 16Maŋgəlva aɗɗek məzuwiɗeŋ gugriɗ sula, məzuwiɗ metiŋgini, ammba kawdawgən kapaya, an muzliya, kawdawgən dəfɗa, gəm ŋgərzleɗi. 17Maŋgəlva aziy a təki keŋreŋge na disiŋ nak kawkekeɓe' dəlvafuŋ, 18kawdawgit may kapay də dəfɗa, kawɗakan əkeɗeɗe'e gəm guzliyo. Maŋgəlva awlak na, moggoni. 19Təki atirke, təki addaŋka: pay mapoɗoni yi.
20Maŋgəlva anah na: «Zəgeɗ memeyẽɗ mederet duwaŋ hõslõ' hõslõ' aret iŋkile, biŋgeɗ dəveŋgeŋ a təki keŋreŋge na disiŋ aka dəlvafuŋ.» 21Maŋgəlva azəməɗik eŋzleɗ gugriɗ na pehe, zəgeɗ mederet məzəɓlaŋ də zeŋvit məgusiŋgusiŋ temtem məs dəknihtin iŋkile, dit biŋgeɗ pak va zeŋvit asani. Maŋgəlva awlak na, moggoni. 22Maŋgəlva aɗɗak əzaɓ aketi, amna: «muwə, mənzlərə, məknih iŋkile na pehe, biŋgeɗ duwanən kiyit aka dəlvafuŋ!» 23Təki atirke, təki addaŋka: pay masle'eni.
24Maŋgəlva anah na: «Zəgeɗ mederet duwaŋ aka dələv va zeŋvit asani: zəgeɗ memeyẽɗ neŋgili, dit en memeɗeŋɗe, vẽvẽɗe va zeŋvit asani!» Agəɗək vaska. 25Maŋgəlva aɗɗek zəgeɗ nawra va zeŋvit asan, zəgeɗ memeyẽɗ neŋgil va zeŋvit asani, dit vẽvẽɗe temtem naka dələv va zeŋvit asani. Maŋgəlva awlak na, moggoni. 26#1KO 11:7Maŋgəlva anah na: «Məɗɗa səm ɗəf dəgil va mənamə, va mənam səɗeki, dəzəmgən məlĩ aket kilfeŋge na pehe, biŋgeɗ na disiŋ, zəgeɗ memeyẽɗ naka dəlvafuŋ, gəm zəgeɗ memeɗeŋɗe məzəɓlaŋ aka dəlvafuŋ!»
27 #
VAA 5:1,2 #
MAT 19:4; MAR 10:6 Maŋgəlva azəməɗək ɗəf vit va ndəni,
vit va ndən zəknan səɗek azəməɗ ɗəfa;
ɗəf mizilin dət guluk azəmiɗe.
28Maŋgəlva aɗɗak əzaɓ aketi, Maŋgəlva aɓsit na: «Muwə, mənzlərgən kiykum, məknəh dəlvafuŋ, məzəm məlĩ akani. Məzəm məlĩ aket kilfeŋge na pehe, biŋgeɗ na disiŋ, dit zəgeɗ məzəɓlaŋ aka dəlvafuŋ pakə!» 29Maŋgəlva anah na: «Yaŋ in tat əpsukum kevileɗ məzuɗiyaŋ mahẽyit naka dəlvafuŋ pakə, wəlaŋga muwə uwa nan də wətəni, awaniɓa məs mahanyən addəvən pakə, wasan wəzəm nokum. 30Kevile məkdəkan pak nəpsitik zəgeɗ memeyẽɗ naka dəlvafuŋgu, biŋgeɗ na disiŋ dit zəgeɗ məzəɓlaŋ məzəmpəsaŋgə, zəgeɗ mederet pakə, ka zəga nawzəma.» Vas agəɗə. 31Maŋgəlva awla an agəɗ pak moggoni sawɓa. Pay atirke, təki addaŋka: pay masləre'eni.
Currently Selected:
Va'Atəŋ 1: GB
Označeno
Share
Copy
Want to have your highlights saved across all your devices? Sign up or sign in
All right reserved