Uan 1
1
At Longan Insure ste swa Daga
1Siginan ngays fagsigadan at Longan sanya wa gugat. Ay ka fag Longan gufud wa Diyus. Ay ka fag Longan Diyus wan. 2Kanya fag Longan si was Diyus siginan ngays fagsigadan. 3Ay kanya wa fag Longan at naawat fagayu. We nkawat mandi nus di sadi, kanya nu dway naawat. 4Sanya ginan fag Longan fagsigadan leleg. Ay ka fag leleg sik salung#1:4 salung: at masuwad, tagfoyung sa sangay taw sa baliwa at matuyan. sa sangay taw. 5Ay ka fag salung gdamlag sasad marum, ay ka fag marum di mafaarum ka fag mayamag.
6Ebi Diyus nasugu sik taw, at ngayan Uan. 7Kanya at fagindasugun laman nanfoyung sas fagayu taw sa ka fag salung baliwa, laman fagayu taw gafanud ban sanya fag salung. 8Bunya Uan ka fag salung. Kanya at nanfoyung yay sas taw sa ka fag salung baliwa. 9At matuyan fag salung indasug sas fagdaul daga ay tagfayamag sas fagayu taw. 10Kanya ndasug ste swa daga. Ay dewa te, kanya wan at naawat tam fagdaul daga, at ngay taw ste swa daga wa nasaful anya. 11Ay kanya dewa ndasug sat fulan fiya fiya, at ngay kaiban kalimata way anya. 12Ay roro ngap nus nga sinu fag taw nu nafili tuwa anya, ay nu gafanud tuwa sa anya, fangayan wa te, Diyus at unga. 13Diyus at ngay unga nu kasalug, di kata sik mangena nu gfasalug at unga, ay ate di kata sik taw at fakaumsigun, Diyus tuwa at fakaumsigun.
14Ay kanya fag Longan inke bilug kata sik taw, ay kanya nabanwan maful antam. Ay nalag wami at kasinean. Kanya Diyus at mafilian fag baguwama. Ay kanya gfangafanyu tuwa dawdaw ay matuyan yangay dawdaw nu gelongan.
15Uan nafatuyan sa baliwa anya. Katatuy at longan, “Kanya wa ngani ebi ku nalong ayu te, ‘Si ban ku guyan, e mdasug yay sik taw taglabi angku nu madaragang, teway aw dakya nsalug, kanya sanya wa gugat.’ ”
16E fagmasineun tuwa tam at yud katabu siginan anya, teway kanya matvngvd dawdaw nu kafanyu sa antam fagayu. 17Ebi, Diyus nafon antam at Suguwan, ay at nafadasug sa antam kanya fag Suguwan, Muisis. Ay bandi ataw indasug sa antam at famanyun ay at fagmatuyanun. Ay at nafadasug sa antam kanya fag duwa, tam Fun Isus. 18Nus di sayginan we taw batang glag tam Diyus. Ay roro at mafilian fag baguwama at nafoyung antam sa baliwas Diyus. Kanya Diyus yangay ay si wa at Tama.
Uan Tagfasurung Nanfoyung te, Diyus at Nafili fag Fun Gadasugun wan
19-20Taw Udyu at ngay tagfangguna sis Erusalem nasugu tibak taganyun ay tibak taw Lebi laman nanginto sas Uan te, “Sinu o?” Ay Uan wa nafanuksukanan nu gfatuyan sanya fag ngay taw te, “Bunwa aw Diyus at nafili fag Fun.” 21Ay ka fag ngay taw gdog yangay ginto te, “Nu katanya, sinu way o? Go o wan, Elyas?” Ay Uan nabalus te, “Yaya.” Ay ka fag ngay taw nainto yay fiya te, “Go o wan em fagfanyaun fag taglong?” Ay Uan nabalus yay fiya te, “Yaya.” 22Ay ka fag ngay taw ginto yangay fiya te, “Nu katanya, sinu way o? Foyungi emi laman e foyungan tuwami sat nasugu emi. Tain nu gfoyung o sa tibak taw te, kanya o?” 23Ay Uan nabalus te, “Aw wan ebi taglong Isayas at foyungan te, ‘Dumungug ban am sik taw nu guro sas talun at yud e taw te, fasinei tam Fun at fagnanloan fag dalan.’ ” 24At nananginto sas Uan sik ngay taw Parisiyu. 25Ay ka fag ngay taw nainto sas Uan te, “Taw madyay am fagfasurungun nu bunway o Diyus at nafili fag Fun, ay ate Elyas, ay ate em fagfanyaun fag taglong?” 26Ay Uan gbalus te, “Aw, gfasurung akway taw sasad safa. Ay roro e sik taw malindug si ay buknga ay wam nasaful te, sinu kanya. 27Kanya wa mangaro ku longan te, ‘Si ban ku guyan, e mdasug yay sik taw, ay kwe fagmasineun an oma gluwas at fansiyuk at sinilas.#1:27 an aw oma gluwas at fansiyuk at sinilas: at masuwad te, an aw oma at fanuguwan.’ ”
28Ginanya Uan nu glong sis fulan Betaniya sis dife Safa Urdan, sit fagsurungan taw.
Diyus At Tupa
29Ay balabag di, Uan nalag Isus nu kadasug sa anya. Ay Uan nalong sa tiba te, “Iste wan Diyus at Tupa, at nanfalyam taw asalanan sas fagdaul daga! 30Kanya wan ku longan ayu te, ‘Si ban ku guyan, e mdasug yay sik taw taglabi angku nu madaragang, teway aw dakya nsalug, kanya sanya wa gugat.’ 31Anggan aw, ebi ataw kya fiya fiya nasaful anya te, sinu kanya fag taw. Ay dewa katanya, indasug aw laman nansurung aw at ngay taw sasad safa. Ay ku fagnasurungun at masuwad te, laman ban taw Israel sumaful yangay anya. 32Nalag aw at Masine fag Falad nu kadaga siginans banwa kata sik linatad, ay insubuk sa anya. 33Ebi ataw taguna kya nasaful te, sinu ka fag taw. Ay roro at nasugu angku laman nanfasurung aw at ngay taw sasad safa, kanya at nalong angku te, ‘Nu nalag o at Masine fag Falad nu kadaga, ay nu kasubuk sa sik taw, kanya yangay ban fag taw at sumurung taw sa at Masine fag Falad.’ 34Ay katanya wa fiya ku nalag. Ay igfatuyan aw sa ayu te, kanya Diyus at Baguwama.”
Isus Nafili At ngay Tagadal Taguna
(Mat. 4:18-22; Mar. 1:16-20; Lukas 5:2-11)
35Ay balabag di, Uan ay at duwak tagadal sanya yangay fiya. 36Ay Uan nu nalag Isus nu kadasug, igfoyung sat tagadal fag duwa te, “Nin daw, Diyus at Tupa.” 37Ay at tagadal at duwa nu nadungug Uan at longan, naalo wa sas Isus. 38Ay Isus inbiling, ay nalag ka fag duwama nu guyan anya, ay ginto te, “Taw ro ay fagguyanun angku?” Ay ka fag duwama gbalus te, “Rabi, dada nu gbanwan o?” (Rabi at masuwad te, “Takamoyung”.) 39Ay Isus igbalus te, “Ay kin, aloi wa angku, nanlag watam ngani ku fagbanwanan.” Ay ka fag duwama naalo wa fiya sas Isus fagbanwanan. Ginanya, gakayabiun wan. Ay sanya wan duwama nu gfamenitan. 40Ka fag duwama at sadi, at nadungug Uan nu glong, ay at naalo Isus, at ngayan Andres. Ay kanya e fadugsay, at ngayan Simun Pedru. 41Ay rodi ataw Andres nasarap at fadugsay ay nafoyung anya te, “Nalag wami tam Mesias.” (Mesias at masuwad te, Diyus at nafili fag Fun.) 42Ay Andres nataban at fadugsay sas Isus. Ay Isus nu nalag, nalong te, “O wan Simun, Uan at baguwama. Katsi ban am ngayan at sadi Sefas.” (Sefas sas Grigu fag fanlong Pedru, at masuwad te, Batu.)
Isus Nafili Filipi ay Natanael
43Ay balabag di, Isus nalo wa sas talun Galiliya. Ay nalag sik ama at ngayan Filipi. Ay nalong te, “Sama, aloi wa angku.” 44Filipi siginans fulan Betsayda, ay sanya yangay Andres ay Pedru at fulan. 45Ay Filipi nasarap Natanael. Ay nu nalag wan, nalong te, “Sama, nalag wami kanya fag taw sas Muisis at Suguwan at nalong, ay anggan Diyus at ngay taglong ebi at nalong. Kanya wan Isus, sik taw Nasaret, ay at tama Use.” 46Ay Natanael ginto Filipi te, “Sek, yaya, we kasure masine siginans fulan Nasaret.” Ay Filipi nabalus te, “Aloi wa angku ay nanlagi.”
47Gina Natanael nangakbang sas Isus, Isus nalong te, “Nin wan sik taw Israel at yud gfanluk.” 48Ay Natanael nainto Isus te, “Tain tuwa ngap am fagnasafulun angku?” Ay Isus nabalus te, “Filipi bagu nan-gewan emu, gina o sis daga fun igus, nalag akwa emu.” 49Ay Natanael bagu ntuyan te, “Em Takamoyung, o wa mangaro Diyus at Baguwama! Ay anggan o wan taw Israel at Fun!” 50Ay Isus nalong te, “Sama, nu nadungug wo ku longan te, nalag aw emu sis daga fun igus, gafanud wo angku. Ay roro bandi ban am nalag glabi yay katsi am nalag.” 51Ay Isus nalong yangay te, “Matuyan ku longan sa ayu te, lumag ban am tam banwa nu maluwangan, ay Diyus at ngay tagfabarita nu kaabat ay nu kadaga laman nantarabang angku, Taw at Baguwama.”
Currently Selected:
Uan 1: TAWEAST
Označeno
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines