Fagbulun 3
3
Pedru Nafafiya sik Taw yud Malo
1Sik menit sfatulu sfafun, Pedru ay Uan nalo sas Diyus bale. Anway kadugenya ngay taw at ugali nu nandarangin. 2Ay sanya e sik taw yud malo siginan ngay bagu kasalug. Ay kayu menit kayu menit tiba guba anya sas Diyus day sakbawan bale, laman nanfanget sa sangay taw tagsakbo. Ka fag sakbawan at ngayan Masine. 3Ay at yud malo nu nalag Pedru ay Uan nu gsakbo sas Diyus bale, kanya get. 4Ay Pedru ay Uan nalinggat dawdaw sa anya ay nalong te, “Linggati emi.” 5Ay at yud malo nalinggat wa fiya, anway nu gfasad, e fagafonun ro sa anya. 6Ay Pedru nalong sa anya te, “Kwe singku. Ay dewa katanya, e fon akro emu ku fagekwaun. Sas Fun Isus, sik taw Nasaret, at fagmadaragangun, alindugi ay loi!” 7Ay Pedru nated at yud malo at siyun fag take ay nafalindug anya. Ay at yud malo darafa ay anggan at sulfuwan darafa matud wan. 8Ay kanya nlindug way sigad ay nalodlowan. Ay naalo wa Pedru ay Uan sas Diyus bale, ay gfantulbuwan igseg sas Diyus. 9Ay fagayu taw nalag nu glo ay nu gseg sas Diyus, 10natoglag anya te, kanya wan at tagfanget at malunggung sis Diyus day sakbawan bale at ngayan Masine. Ay ka fag ngay taw namatangan dawdaw ay nadulawan.
Pedru Gfamoyung sis Diyus Bale
11Ay ka fag mangama wa gfalfas nu gted Pedru ay Uan balukas. At ngay taw gfantarungan nu kaful sanya fag tuluk taw sis ke maugunan fag dalan, at ngayan te, Sulumun, teway nadulawan dawdaw sat nalag. 12Pedru nu nalag kanya fag ngay taw, nalong te, “Am fag ngay taw Israel, taw ro ay faglinggatun dawdaw emi? Go gayup am te, em fagmadaragangun ay em fagmasineun at nafafiya tuy fag taw? 13Yaya! Bundi ami! At nafafiya anya antuwa tam aguyangan Abrayam, ay Isaak, ay Akub at Diyus, laman e gseg tuwa at fanuguwan, Isus. Kanya wan ay nataban ebi sas Pilatu. Ay ay nafamayud anya sas Pilatu at akbang, dewa Pilatu at fasadan gananfalfasun anya. 14Ay kalimata way am anya, sik matuyan fag taw ay malayun sat masine. Ay ay naet te, falfasi sik takamate way fag taw. 15Nafafate am Tagfon Leleg. Ay dewa katanya, Diyus gdog yay nafaleleg anya dewa nkate. Ay nalag wami fiya fagayu takatanya. 16Tuy fag mangama ay nalag ay ay natoglag at faginfiyaun, antuwa at fagafanudun sas Isus at fagmadaragangun, ay at fagafanudun at nafabitsug fiya fiya anya, kata ay nalag.
17“Ku ngay fadugsay, nasaful aw te, yam nasaful at masuwad ebi ay fagbulun sas Isus. Ay anggan ay ngay tagfangguna wa mandi nasaful at masuwad. 18Diyus at ngay taglong ebi at naguna nafoyung te, ‘E faurianan ban sas Diyus at nafili fag Fun.’ Ay katsi Diyus wan at nafagurungan ka fag longan. 19Ay nu katanya, ubuni ay asalanan ay afolii sas Diyus, laman kanya gfalyam ay ngay asalanan. Ay laman e fagmanabayanun tuwam siginans Diyus. 20Nu katanya tuwa, Diyus sumugu ban ste sa ayu at nafili fag Fun, tam Isus, ay umke bagu fag fagmabitsugun ban am siginan anya. 21Ay kadugenya Isus gbanwan yay sas banwa yap ngay Diyus nafabagu fagayu, kata Diyus at fatuyanan sat ngay taglong at nafoyung ebi taguna. 22Kata Muisis at nalong te, ‘Tam Fun tam Diyus gfasure ban sa ayu sik taglong siginan ay kalongan kata yangay angku. Dungugani tuwa fagayu at longan ayu. 23Ay nus nga sinu fag taw at yud gdungugan sa ka fag taglong at longan, e mayan wa anya siginans Diyus at ngay taw ay fate wa anya.’ 24Ay kata tuwa at sadi Diyus at taglong fagayu at foyungan sa ka fag ngay menit baliwa, siginans Samwel ay anggan sa at fadogan fag ngay taglong. 25Diyus nafatuyanan sat ngay taglong, laman sa wa antam taw Udyu. Kata at nalong sas Abrayam te, ‘Igfon kban sik fagmasineun sas fagayu taw sas fagdaul daga, siginan am kadagdagan.’ 26Ay Diyus fagnasuguun at fanuguwan, taguna sa ayu laman tumarabang ayu gubun ay ngay fagbulun at mauri.”
Currently Selected:
Fagbulun 3: TAWEAST
Označeno
Deli
Kopiraj
Want to have your highlights saved across all your devices? Sign up or sign in
Copyright © 2023 by OMF International, Philippines