Luka 17
17
1LOMBA eŵauzya asambili ŵake, Sikukumika kuti vyopilingisya vilekekuza: sembe malilo kwa uyo akuza navyo! 2Ni chiweme kuli yeve kuti chimpero chikoloŵekewe pa mkosi pake naye apozewe mchimana, si kuti apilingisye kamo ka utu tutonto. 3Mochenjera mweo: mkwanu akaponta mtuzule; naye akalapa mtima mlekere. 4Naye akakupontera zuŵa limo kasano na kaŵiri, nokuyarukira kasano na kaŵiri kuti nalapa, ninga womlekera.
5Nipo apostolo enena na Asikuru, Mtiyangizizye mvwano. 6Naye Asikuru echiti, Mngati mwina mvwano nga ni kambuto ka sinape sembe muuzya mtanta uyu, Unyuliwe uzikiwe mchimana, nawo sembe ummvwilani. 7Lomba ni ŵani wa mweo, akaŵa na mlumbwana olima kano kuŵeta mbelele, angamuuzye akawera ku munda, Iza lomba pano, nkala pansi ulye; 8kansi sangamuuzye ngakongako, Uŵikiletu nilye neo, uvwale nonitumikila; tanganilye na kumwa, ninga ulye na kumwa pavuli pake? 9Kansi omyamika mlumbwana paachita vyauzyiwa? 10Tetyo namwe kumo, apo mkazosilochita vyonse vimuuzyiwa, mwakuti, Se nise alumbwana ŵosafwa kantu; tachita ivyo vyenze mulimo wasu kuvichita.
11Lomba yenzepo peŵenzekuya ku Yerusalemi yeve enzopita pakati pa Samariya na Galilaya. 12Naye apo penzoloŵa mkamunzi kachite emtenderezya ŵantu kumi amanzonzo, amene epanama patali: 13etumpula malizu echiti, Yesu, Kalonga, mtichitile chitinti. 14Naye akaŵaŵone enena naŵo, Nkamuyani mkalilangizye kwa ansembe. Lomba yenzepo pamene penzekuya esukiwa. 15Nipo umo wa ŵala poŵona kuti wapola ewerera emchinzika Mlungu na malizu akuru; 16evunama mnkonde mwake kumuŵonga. Uyo enze Msamariya. 17Yesu naye poyasuka echiti, Nte kumi ŵala ŵasukiwa? nga asano na ŵane ŵala ŵali kuni? 18Paliye yeka umo wawerera kumchinzika Mlungu sembe mulwendo uyu? 19Naye emuuzya, Ima nkoya: mvwano wako wakupuzumusya.
20Naye akakonshewe na Afarisayo kuti ufumu wa Mlungu uuze zuŵanji echiti, Ufumu wa Mlungu sukuza kololeka: 21sati anene, Ŵona apa! kano, Uko! pakuti ŵonani, ufumu wa Mlungu uli mkati mwa mweo.
22Lomba eŵauzya asambili, Zizize nsiku zimti mpangwe kuŵona imo ya nsiku zya Mwana wa muntu, namwe simti muiŵone. 23Azanene namwe, Ŵona uko! Ŵona apa! msafumapo kano kwakonka: 24pakuti nga ni umo kalaŵelaŵe, kakaŵiyata mumbi mlulezi, mkosanikira mpaka mumbi mlulezi, tetyo na Mwana wa muntu ni mwati azaŵere pa nsita yake. 25Lomba tangaamvwe matamano anyinji nokaniwa na luko luno. 26Nga ni umo mkwenzere pa nsiku zya Nowa, na pa nsiku zya Mwana wa muntu naye ni mkuti kuze kuŵere. 27Enzekulya na kumwa notenga notengeshewa mpaka nsiku yechiloŵeramo Nowa mchiwato, na zamba lichiza noŵacheneka ŵonse. 28Nga ni mkwenzere pa nsiku zya Lote; enzekulya na kumwa, nosita nositisya, nokomola nomanga mang'anda; 29sembe pa nsiku yechifumilamo Lote mSodoma wipona mulilo na myala yocheruka kufuma kumulu noŵacheneka ŵonse: 30ni mkuti kuze kuŵere na pa nsiku yati azavundululiwe Mwana wa muntu. 31Pa nsiku ila uyo ati azaŵe pa mtenje, na viya vyake mng'anda, asaseluka kuvifumyamo: tetyo naye ali ku munda asawerako. 32Momkumbuka mka Lote. 33Ali wonse ati asakosunga moyo wake azautaye: sembe ali wonse ati autaye azausunge. 34Numuuzyani kuti usiku ula azaŵepo analume aŵiri pa mpasa imo; umo azauliwe, muyake azasiiwe. 35Azaŵepo anakazi aŵiri opera pamo; umo azauliwe, muyake azasiiwe. [36Azaŵeko analume aŵiri ku munda; umo azauliwe, muyake azasiiwe.] 37Naŵo eyasuka emkonsha, Ni kuni, Asikuru? Naye eŵauzya, Pali chitumbi ni pati paze polongana makuŵi soti.
Currently Selected:
Luka 17: MA23
Označeno
Share
Copy
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.