Luka 12
12
1PA nsita yamene ila pechilongana mafwingomafwingo a ŵantu mpakokandana eyambonena na asambili ŵake potatika, Nkochenjerani mweo na chizamba cha Afarisayo, chamene chiri malipazyo. 2Sembe paliye kantu kovwinikiliwa kamene kati kakanovunukuliwa, na kofisika kamene kati kakanoziŵikwa. 3Teti vyonse vimunena mu mfinzi vize vimvwike mkuŵala; navyo vimuŵereŵesya mkwatu mvipinda vya kuntambo vize viŵirizyiwe pa mitenje. 4Nane nikuti kuli mweo mwakwasu, Msayopa ŵala oupaya muŵili, na pavuli pake aliye na kantu kochita soti. 5Lomba nimsokeni ni ŵani umti moyopa: Muyopeni uyo wamene akapaya ana nsaka yopoza mGehenna; inde, numuuzyani, Yopani wamene uyo. 6Kansi tumpeta tusano situsitiwa tundalama tuŵiri? na keka kamo ka uto koluŵika pa menso pa Mlungu. 7Sembe chukanga sisi la mmutu wanu lupendewa lonse. Msayopa: mkufwa chitema chikuru kupula tumpeta tunyinji. 8Nane numuuzyani kuti ali wonse ati anizomere pa menso pa ŵantu, tetyo naye Mwana wa muntu soti azamzomere pa menso pa malaika a Mlungu: 9sembe uyo ati anikane pa menso pa ŵantu azakaniwe pa menso pa malaika a Mlungu. 10Na ali wonse ati amnene Mwana wa muntu chize chilekelewe kwake: sembe uyo ati amchitire Mzimu Mtuŵa msikila sichiti chilekelewe kwake. 11Naŵo akamtwalani ku masunagoge na kwa achiyeruzya na ansaka msachita tupwe mumti muyasukire, na malizu ŵosyani, kano kunenanji: 12chikomo Mzimu Mtuŵa azamsambizyeni mkamfunda kamene kala vimti mnene.
13Nipo umo wa mliumba emnenera, Asambizi, muuzyeni mkwasu ayaŵane nane chipuna. 14Lomba enena naye, Muntuwe, ni ŵani eniika neo chipingula kano chipatula wa weo? 15Naye eŵauzya, Nkochenjerani, molilesya ku kaso konse: pakuti moyo wa muntu suyana na mapakilo a chuma chali nacho. 16Lomba eŵasimikira linganizyo echiti, Mmunda mwa msambazi ngana mwiwera vilyo vinyinji: 17naye elinga yeka kuti, Nichitenji, panusoŵa molongera vilyo vyangu? 18Naye echiti, Nichite teti: nipasule ntumba zyangu nomangisya zikuru; nze ntunshiremo mapira ŵangu ŵonse na vintu vyangu. 19Nane niniti ku moyo wangu, We moyo, uli navyo vintu vinyinji vyoŵikiwira katera ku virimika vinyinji; pumula, ulye, umwe nosangalala. 20Sembe Mlungu emuuzya, We wopusa, usiku uno moyo wako usakiwe kwako; na vintu viwiikira katera viviŵe vya ŵani? 21Woteti ni uyo olilongera yeka mpango, ntali nazyo mpango zya kwa Mlungu.
22Naye enena na asambili ŵake, Ni panumuuzyani, Msachita tupwe na moyo wanu lakuti tilyenji; kano na muŵili wanu lakuti tivwalenji. 23Pakuti moyo upula vilyo, na muŵili upula minjira. 24Lukanani akwalala kuti ntokomola kano kusanja; aliye vimatilo kano mantumba; naye Mlungu oŵalyesya: ninga na mweo mupula ngako tuni! 25Ni ŵani wa mweo pochita tupwe angaliyangizye msinku mkono? 26Teti kati kumkangani kuchita na katonto, muchitiranji tupwe na viyake vila? 27Lukanani vipwiŵi mvukulila: sivukata milimo kano kuvuta; lomba numuuzyani, Chukanga Solomoni mu mtupo wake wonse aliyovwalila nga ni chimo cha ivi. 28Sembe kati Mlungu ouvwalika teti uzu wa msanga, wamene uŵapo lero na mailo utaiwa mu mchero, nga kansi ntangamvwalikeni mweo kopula, mwe mwatonto mvwano? 29Namwe msasaka chimti mulye na chimti mumwe, msalanguluka mmitima. 30Pakuti ivi vyonse ni viyusakasaka mitundu ya pano pansi: sembe Ausu wanu oziŵilatu kuti ivi vumsoŵani. 31Lomba sakani ufumu wake, ivi ninga viyangizyiwe kwanu. 32Msayopa, kamkusi ka mbelele; pakuti chumtemwesya Ausu wanu kumpani ufumu. 33Sitisyani vimuli navyo na kupa vyabule; mulitimire vibeti vya ndalama vyosaguka, mpango zya pamulu zyosalopa, piisaza njivi na kanzerenzere pasachecheta. 34Pakuti pali mpango zyanu na mtima wanu nawo ni pauti uŵe.
35Muluunda mwanu mwakuŵa momanga, na misaniko yanu yokolera; 36na mwaŵene mwakuŵa nga ni ŵantu ololera asikuru ŵaŵo pati awere ku winga; kuti akaza nokunta apuvyomzulilako. 37Ana shuko alumbwana ŵala asikuru akaza ŵati azafwange ali tuni: lezee numnenelani kuti azavwale noŵankalika ŵeve pakulya na kuzoŵatumikila. 38Naye akaza pa nsita yakaŵiri yolondezyana, kano pa yakatatu, noŵafwanga teti ana shuko alumbwana ŵala. 39Lomba ziŵani ichi, chakuti mnecho angati eziŵa nsita iiti izilemo njivi sembe echesya, sembe aliyoleka ng'anda yake kutuliwa. 40Namwe kumo moliwamyira futira: pakuti pa nsita imsalukana ni pati aze Mwana wa muntu.
41Lomba Petro echiti, Asikuru, kansi musimikira linganizyo ili kuli seo kano na ku ŵonse? 42Naye Asikuru echiti, Nga ni ŵani chilolesya wochetekereka na wanzeru asikuru wake wati aike pa a mchiŵanza chake kwasongezya pa nsita yake? 43Ana shuko mlumbwana uyo asikuru wake akaza wati afwange ochita tetyo. 44Lezee numuuzyani kuti amuŵike pa vyonse vyali navyo. 45Sembe kati mlumbwana uyo akati mu mtima mwake, Asikuru ŵangu amuka kuza, naye akatatikonyata alumbwana na vituntulu, na kulya na kumwa nokolwa, 46asikuru wa mlumbwana uyo aaze pa siku lasalolera, na pa kansita kasaziŵa, azamkoŵere nomuŵika chitwa chimo na ŵosazomera. 47Naye mlumbwana uyo wamene eziŵa vyakupangwa asikuru wake nosaikilatu, nosachita umo mwakupangwila, azanyatiwe na vitimbo vinyinji; 48sembe uyo asaziŵa, nochita vyowamila vitimbo, azanyatiwe na vitimbo vyopendeka. Kwa uyo naye wamene opewa vinyinji ni kuviti vize visakiwe vinyinji: na kwa uyo wakusungika vinyinji ni kwati azasake vinyinji ngako.
49Neo nichizopoza mulilo pa charo cha pansi; nga nusakanji kati ulukolere? 50Lomba nili nawo ubatizo unti nibatiziwe nawo; aa! niliye potukulukira mpaka pauti usilizike! 51Kansi mulinga kuti nichizoleta mtendere pa charo cha pansi? numuuzyani, Yai; sembe ngakongako ni mapatukano: 52pakuti chitatikile lomba azaŵemo asano mng'anda imo ŵopatukana, atatu ŵosusya aŵiri, na aŵiri ŵosusya atatu. 53Azapatukane, awisi na mwana wake, na mwana na awisi; anyina na mwana wake mwanakazi, na mwana mwanakazi na anyina; nyavyalawake na mmikazi, na mmikazi na nyavyalawake.
54Naye enena na maumba soti kuti, Mkaŵona mkumbi ukwera kuli mzambwe mupuvyonena kuti, Ikuza mvula yosusa; nipo yuŵapo. 55Nayo ikakunta mpepo ya ku mwera mkuti, Chikuza chiŵe; nacho chuŵapo. 56Mwe mwaŵolipazya, muziŵa kuchilinga chinso cha charo na kumulu; nga pamsaziŵa kulinga nsita ino. 57Ni chinji pamsapingula mweka chamene chiri chiweme? 58Pakuti paukuya pamo na muyako wa mlandu kwa chipingula, wopimpilila pa njira kuyana naye; kano angaye nawe kwa chipingula, na chipingula angakutwale ku chilolo, na chilolo chingakupoze mkambolimboli. 59Neo nukuuzya kuti suti ufumemo peka patonto, mpaka pauti ulipe kansilililo ka ndalama.
Currently Selected:
Luka 12: MA23
Označeno
Share
Copy
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.