Mataio Fakatomuaga
Fakatomuaga
Ko te Tala Lelei ki a Iehu e tuha ma te mau a Mataio, e fakailoa mai ai te tala fiafia, ko Iehu ko te Fakaola na folafola e te Atua ki ona tagata, i te Feagaiga Tuai. Ko te tala fiafia tēnei, e hē nā mo tagata Iutaia, nā tino na fānau mai ai ia Iehu ma na ola ake ai; kae e mo tagata uma o te lalolagi kātoa.
Ko te tuhi a Mataio e fakavāhegahega fakalelei lele. E kāmata i te fānau maiga o Iehu, tona papatihoga ma nā fakaohoohoga na pa ki ei, oi hohoko ai ma te kāmataga o tana gāluega ko te tālaki, akoako, ma te fakamālōlōga o tagata i Kalilaia. Oi hohoko ai nā tala o te malaga a Iehu mai Kalilaia ki Ieluhalema, ma nā mea na tutupu ki a Iehu i te toe vaiaho ka ko hēki fakahātaulo ai. Oi hohoko ai ma te tala ki tona toetū mai te oti.
Ko te tuhi a Mataio e fakailoa mai ai ko Iehu ko te Faiakoga hili ia, e ia te ia te pule ke fakamatala ai te Tūlāfono a te Atua, e akoako foki e ia e uiga ki te Mālō o te Atua. (Ko nā tino Iutaia nae hē fofou ke ki lātou takua te igoa o te Atua kāfai e tautatala, ma ko te mea ia e fakaaogā ai e Mataio te “Mālō o te lagi” kae e tutuha lava te uiga ma te “Mālō o te Atua.”) Ko te lahiga o ana akoakoga, e fakavahega ki ni vāega e lima (1) ko te Lāuga i luga o te Mauga e fakatatau ki te āmio, nā tiute, nā fakamanuiaga, ma te ikuga o nā tino o te Mālō o te lagi (matākupu 5—7); (2) ko nā fakatonuga ki te kau hoko e toka hefululua e tuha ai ma te lātou gāluega tālaki (matākupu 10); (3) nā talafakatuha e uiga ki te Mālō o te lagi (matākupu 13); (4) nā akoakoga e uiga ki te itūkāigā ōlaga e tatau ke ola ai nā hoko o ia (matākupu 18); ma te (5) ko nā akoakoga e uiga ki te ikuga o te ōlaga nei ma te Aho Fakamahino (matākupu 24—25).
Fakahologa o nā vāega o te Tuhi
Te gafa o Iehu ma tona fānau mai 1.1—2.23
Te gāluega a Ioane te Papatiho 3.1-12
Te papatihoga ma nā fakaohoohoga o Iehu 3.13—4.11
Te gāluega a Iehu i Kalilaia 4.12—18.35
Te malaga a Iehu mai Kalilaia ki Ieluhalema 19.1—20.34
Te toe vaiaho i Ieluhalema ma nā koga e pili ki ei 21.1—27.66
Te toetū ma nā kiteaga o te Aliki 28.1-20
Currently Selected:
Mataio Fakatomuaga: TNT
Označeno
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.