मरकुस 15
15
पिलातुस गै सामणै यीसू
(मत्ती 27:1,2,11-14; लूका 23:1-5; यूहना 18:28-38)
1जिंयाई दिन उग्यो मुख्य याजकां, धर्म सासतरियां, बुढा यहुदी नेतावां अर सारी यहुदी महासभा एक योजना बणाई। बे यीसू नै बांदगे लेग्या अर बिनै राजपाल पिलातुस नै सूंप दियो। 2पिलातुस बिनै पूछयो कै, “तूं यहुदियां गो राजा है।” यीसू उतर दियो, “इंया ही है। तूं खुद केण लागरयो है।”
3फेर मुख्य याजकां बिं पर भोत सारा दोस लगाया। 4पिलातुस बिनै फेर पूछयो कै, “तूं उतर कोनी देवै है, देख बे किती बातां गो दोस तेरै पर लगाण लागरया है।”
5पण यीसू अब बी कोई उतर कोनी दियो। ईं पर पिलातुस नै भोत अचंभो होयो।
मोत गी आग्या
(मत्ती 27:15-26; लूका 23:13-25; यूहना 18:39–19:16)
6फसह गै त्यूंहार गै मोकै पर पिलातुस कोई एक केदी नै, झिकै नै लोग चावै है बांगै खातर छोड़ देवंतो हो। 7बर अब्बा नाम गो एक केदी लड़ाई करण आळां गै सागै जेळ में हो झिकै लडाईयां में आदमियां नै मारया हा। 8अर भीड़ उपर जा'गे बिनै केण लागी कै, “जिंया तूं म्हारै सागै पेलां करतो आयो है बिंयाई कर।” 9पिलातुस बानै पूछयो, “के थे चावो हो कै मैं थारै खातर यहुदियां गै राजा नै छोड़ दैयूं?” 10पिलातुस ओ इंगै वास्तै केयो क्यूंकै बो जाणै हो कै मुख्य याजकां बिना दोस गै कारण पकड़वायो है।
11पण मुख्य याजकां भीड़ नै उकसाई कै बे बिंगी जिग्यां बरअबा नै छुड़ा लेवै। 12पण पिलातुस बाऊं बात चीत कर'गे फेर पूछयो, “झिकै नै थे यहुदियां गो राजा केवो हो बिंगो मैं के करूं, बताओ थे के चावो हो?”
13जबाब में बे चिलाया, “बिनै करूस पर चढा दैयो।”
14जद पिलातुस बानै पूछयो, “क्यूं अण हिस्यो के अपराध करयो है जद ओर जादा रोळो मचायो अर केयो बिनै करूस पर चढा दैयो।”
15पिलातुस भीड़ नै राजी करणी चावै हो ईंखातर बरअबा नै छोड़ दियो अर यीसू नै कोड़ा लगवागे करूस पर चढाण खातर दे दियो।
सैनिकां द्वारा यीसू गी बेजती
(मत्ती 27:27-31; यूहना 19:2,3)
16फेर सिपाई बिनै रोमी राजपाल गे निवास में लेग्या अर बां सिपाईयां गी पूरी फोज नै बुला ली। 17फेर बां यीसू नै बेजणी रंग गा गाबा पिराया अर कांटा गो एक ताज बणा गे बिंगै सिर पर रख दियो। 18फेर बिनै सलामी देण लाग्या कै यहुदियां गै राजा गो सुवागत है। 19बे बिंगै सिर पर सरकणै गी मारता जाण लागरया हा। बे यीसू पर थूकै हा अर गोडा गै बल झुक गे बे बिंगै आगै नीवण करै हा। 20ईं तरियां जद बे बिंगी मजाक उडावा हा तो बां बिंगा बेजणी गाबा उतारया अर बिनै बिंगा आपगा गाबा पिरा दिया। अर फेर बिनै करूस पर चढाण खातर बारै लेग्या।
यीसू गो सूळी पर चढाणो
(मत्ती 27:32-44; लूका 23:26-43; यूहना 19:17-27)
21बानै कुरेन गो रेण आळो सीमोन नाम गो एक आदमी रा में मिल्यो। बो गाम कानूं आवै हो बो सिकन्दर अर रुफस गो बाप हो सिपाईयां बिं पर दबाब बणा गे यीसू गो करूस चका दियो। 22फेर बे यीसू नै गुलगुता नाम गी जिग्यां पर लेग्या। 23जद बां बिनै लोबान रळेड़ो होयो दाखरस पीण नै दियो। पण बण बिनै कोनी पीयो। 24फेर बिनै करूस पर चढा दियो। जद बां बिंगै गाबा नै परची ऊं लाटरी काडगे आपस में बांट लिया। 25दिन गै नौ बज्या जद बां बिनै करूस पर चढायो। 26अर बिंगो दोस पत्र बणागे बिंगै उपर लगा दियो झिकै पर लिखेड़ो हो “यहुदियां गो राजा।” 27-28बिंगै सागै दो डाकू बी हा एक बिंगै दाहिणै पासै अर एक खबै पासै।
29बिंगै कनै ऊं निकळण आळा लोग बिंगी बेजती करै हा आपगो सिर झुकागे बे केवा हा अरै वा, तूं बो ई है झिको मिन्दर नै धोड़गे तीन दिना में फेर बणावै हो। 30अब करूस ऊं नीचै उतर अर अपणै आपनै बचा ले।
31ईं तरियां मुख्य याजकां अर धर्म सासतरियां बी यीसू गी मजाक उडाई। बे आपसरी में केण लागग्या, अण ओरा नै बचाया है, पण अपणै आपनै कोनी बचा सकै। 32अब ईं मसी अर इसराएल गै राजा नै करूस पर ऊं नीचै तो उतरण दे जिंऊं म्हे ओ देख गे बिं पर बिस्वास कर सकां अर बां दोना ई झिका बिंगै सागै करूस पर चढाया हा बिंगी बेजती करी।
यीसू गो प्राण त्याग
(मत्ती 27:45-56; लूका 23:44-49; यूहना 19:28-30)
33फेर सारी धरती पर दोफारै में अन्धेरो होग्यो। 34दिन गे तीन बजे ऊंची आवाज में यीसू केयो, “एली एली लमा सबकतानी।” हे मेरा परमेसर थे मनै क्यूं भूला दियो?#भजन संगिता 22:1
35झिका कनै खड़या हा, बामूं कीं लोगां ओ सुणयो तो बे बोल्या सुणो ओ एलिल्याह नै बुलावै है। 36जद एक जणो भाजगे आयो अर स्पंज सिरकै में डुबोगे अर सरकणै पर बांदगे बिनै चुसायो अर केयो, “ठेरो, देखां इनै एलियाह नीचै उतारण खातर आवै या कोनी।”
37फेर यीसू ऊंची आवाज में बोल्यो अर प्राण छोड़ दिया।
38जद मिन्दर गो पड़दो उपर ऊं नीचै तांई पाट गे दो टुकड़ा हो'ग्या। 39फोज गै एक अधिकारी झिको यीसू गै सामणै खड़यो हो बण इंया सुणयो अर देख्यो कै बण प्राण किंया त्याग्या। बण केयो ओ आदमी सच में परमेसर गो बेटो है।
40कीं लुगाईया बठूं दूर खड़ी देखै ही। बामै मरियम मगदलीनी, छोटै याकूब अर योसेस गी मां मरियम अर सलोमी ही। 41जद यीसू गलील में हो तो ऐ लुगाईयां बिंगी दासी ही अर बिंगी सेवा करती ही। बठै ओर बी भोत सारी लुगाईयां ही झिकी बिंगै सागै यरुसलेम तांई आयी ही।
यीसू नै माटी लागणी
(मत्ती 27:57-61; लूका 23:50-56; यूहना 19:38-42)
42-43जद आथण होगी अर क्यूंकै सब्त गो दिन हो। ईंखातर अरिमतिया गो युसुफ आयो। बो यहुदी महासभा गो मानेड़ो आदमी हो अर परमेसर गै राज गै आण गी अडीक करतो हो। हिम्मत गै सागै बो पिलातुस गै कनै आयो अर बण यीसू गी ल्हास मांगी। 44पिलातुस नै भोत अचरज होयो कै बो इती जल्दी किंया मर ग्यो। बण सेना गै अधिकारी नै बुलायो अर बिंऊं पूछयो कै बिनै मरे भोत देर होगी के? 45फेर जद बण सेना गै मुख्य ऊं हाल सुण लियो तो युसुफ नै ल्हास दे दी। 46जद बण एक मलमल गी चादर खरीदी। अर ल्हास नै उतारगे बिमै पळेट दी अर जा'गे बणाएड़ी कबर में रख दी। अर कबर नै एक मोटै पथर ऊं बंद कर दी। 47मरियम मगदलीनी अर योसेस गी मां मरियम देखण लागरी कै यीसू गी ल्हास कठै रखी है।
Currently Selected:
मरकुस 15: BGQ
Označeno
Deli
Kopiraj
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved. © WIn Publishing Trust