मरकुस 12
12
माडै़ किसान गी मिसाल
(मत्ती 21:33-46; लूका 20:9-19)
1फेर यीसू बानै एक क्हाणी बोलगे इयां समझाण लाग्या कै, “एकर एक आदमी आपगै खेत में अंगूर गी बेलां लगाई। फेर बिं खेत गै चारूंमेर बाड़ लगाई अर दरड़ो खोद'गे अंगूरा गो रस निकाळणा गी जिग्यां बणाई। ऊंचो डूंचियो बणागे अंगूरां गो खेत ठेकै पर कीं किसाना नै दे दियो अर आप केई दिना खातर दूसरै परदेस में उड़ग्यो। 2जद अंगूर तोड़ण गो टेम आयो तो किसाना ऊं आपगै खेत गा कीं अंगूर ल्याण खातर एक नोकर भेज्यो। 3पण किसाना बिं नोकर नै पकड़गे कुंटयो अर पुठो खाली हात भजा दियो। 4फेर एक ओर नोकर नै भेज्यो पण किसानां बिंगै सिर पर मारी अर बिंगी घणी बेजती करी। 5फेर मालिक एक ओर नोकर नै घालयो। पण बिनै किसान जान ऊं मार दियो। इंया मालिक केई नौकरा नै घालतो रेयो। पण केईया नै बां कूटया अर केईयां नै जान ऊं मार दिया। 6आखिर में खेत गै मालिक कनै भेजण खातर आपगो बेटो ई रेग्यो झिकै ऊं बो भोत प्यार करतो हो। बण बिचार करयो, किसान मेरै बेटै गो जरूर आदर करैगा बेटै गी बात जरूर मानैगा। 7पण किसानां जद बेटै नै आवंता देख्यो तो आपसरी में केण लागग्या ओ खेत गै मालिक गो हकदार है। आओ म्हे इनै जान ऊं मार देवांगा तो सारी जमीन गा मालिक बण जावांगा। 8ईंखातर बिनै पकड़ गे मार दियो अर बिंगै सरीर नै खेत ऊं बारै फेंक दियो।
9अब थे सोचो जद खेत गो मालिक आ'गे आंगै सागै के करैगो बो आ'गे जान ऊं मार देवैगो अर आपगो खेत दूसरा नै ठेकै पर देवैगो। 10थे लोग पवितर सासतर में लिखेड़ी ईं बात नै जाणो हो के? झिकै पथर नै मिसतरिया बिना बरते न्यारो फेंक दियो। बिं पथर नै दूसरै लोगां आपगै मकान गो खास पथर बणागे बरतयो।
11ओ काम परमेसर करयो,
अर आपणै खातर भोत चमत्कारी बात है।”#भजन संगिता 118:22,23
12ईं क्हाणी नै सुणन आळा मुख्य याजक, यहुदी नेम सिखाण आळा अर समाज गै मोटै लोगां गै समझ में आगी कै यीसू आ क्हाणी म्हारै बिरोध में दोस लगाण खातर कैई है पण बे भीड़ ऊं डरा हा। ईंखातर यीसू नै छोड़गे उड़ग्या।
कैसर नै कर देणो
(मत्ती 22:15-22; लूका 20:20-26)
13फेर यीसू गो बिरोध करण आळा बांगी बातां में गळती काडण खातर केई फरीसी गुट गा अर केई हेरोदेस गुट गै लोगां नै बांगै कनै भेज्या। 14बां यीसू गै कनै आ'गे केयो, “गुरूजी म्हे जाणा हां कै थे इमानदार हो। सच्च बोलो हो, लोग थारै बारै में के सोचै ईं बात गो फिकर कोनी करो अर आदमी, आदमी में फरक जमाई कोनी करो हो चाहे कोई कितोई मोटो क्यूं ना होवै हर काम में किंया चालणो इंगै बारै में परमेसर गी मरजी नै इमानदारी ऊं सिखावो हो। ईंखातर थे म्हानै बताओ कै रोम गै राजा केसर गो करजो चुकाणो सई है या गळत है।”
15म्हे केसर नै कर देवां के ना? पण यीसू बानै पूछयो थे लोग मनै क्यूं परखो हो? क्यूं मेरी बातां में गळती काडणी चावो हो? फेर यीसू केयो, “रोमी सरकार गो एक सिको ले आवो मैं थानै बताऊंगा।”
16बे एक सिको ले आया अर यीसू बानै पूछयो, “ईं पर किंगी फोटू है अर किंगो नाम लिखेड़ो है।” बां उतर दियो, “केसर गी फोटू अर नाम है।”
17फेर यीसू बानै केयो, “झिको केसर नै देणो है बो केसर नै दे देवो अर झिको परमेसर नै देणो है बो परमेसर नै दे देवो।” ओ उतर सुण गे बानै अचंभो हो'ग्यो।
ब्या अर जी उठणो
(मत्ती 22:23-33; लूका 20:27-40)
18इंगै बाद सदूकी गुट गै कीं लोगां यीसू गै कनै आ'गे सवाल पूछयो। बे कोनी मानै हा कै सारा मरण गै बाद आखरी टेम में दुबारै जींवता हो'ज्यैगा। 19ईंखातर पूछयो गुरू मूसा ओ नेम बतायो है कै जे आदमी गो भाई ब्या करण गै बाद बिना उळाद मर जावै है तो बिं आदमी नै आपगै भाई गी पत्नी ऊं ब्या कर'गे टाबर पैदा करणा है, बे टाबर बिंगै भाई गा मानीजैगा। 20जद यीसू एक क्हाणी ऊं समझाया कै एकर सात भाई हा। बामू एक जणै गो ब्या हो'ग्यो अर बो बिना उळाद मर ग्यो। 21बिंगी घरआळी दूसरै भाई गै सागै ब्या करयो पण बो बी बिना उळाद मर ग्यो। 22इयां सातूं भाई बे उळाद मरग्या अर आखिर में बा लुगाई बी मरगी। 23अब बताओ, जद मरेड़ा सारा जीवंता होवैगा तो बा लुगाई किंगी घरआळी हो'सी क्यूंकै सातां बिंगै सागै ब्या करयो है।
24यीसू उतर दियो, “थे पवितर सासतर में लिखेड़ी बातां नै कोनी जाणो अर परमेसर गी ताकत नै बी कोनी जाणो, ईं कारण भोत मोटी गळती करो हो। 25जद मरेड़ा सारा जीवंता हो जावैगा तो बे ना तो छोरीया ऊं ब्या करैगा, अर ना छोरियां नै ब्या खातर देवैगा। बे लोग सुरगदूतां गी तरियां होवैगा। 26जद तांई मरेड़ा दुबारै जीवंता होण'गी बात है तो, थे मूसा गी लिखेड़ी किताब में पढयो कोनी कै बण बीरान में जगती हरी झाड़की देखी अर बिनै देखण गेयो परमेसर बिंऊं बात कर'गे केयो, मैं अबरहाम गो परमेसर इसहाक गो परमेसर अर याकूब गो परमेसर हूं, मैं बांगो परमेसर हूं ओ जद केयो जद ऐ तीनू भोत पेलां मरग्या हा।#निरगमन 3:6 27परमेसर तो जीवंता गो परमेसर है मरेड़ा गो कोनी। इंगो मतलब ओ है कै सदां खातर कोनी मरया है अर सारा मरण गै बाद जीवंता होवैगा ईंखातर ईं पर बिस्वास कोनी करण ऊं थे लोग भोत मोटी गळती करो हो।”
सारा ऊं मोटी आग्या
(मत्ती 22:34-40; लूका 10:25-28)
28बिं टेम ई एक यहुदी नेम सिखाण आळो आयो अर यीसू ऊं बेंस करण लागग्यो अर यीसू बानै आच्छी तरियां उतर देवै हो अर बानै बिंगा उतर आच्छा लागा। ईंखातर बां यीसू नै पूछयो, “म्हारै सारै नेमा मू खास नेम किस्यो है?”
29यीसू जबाब दियो, “सारां ऊं खास नेम ओ है इसरएल गा लोगो सुणो आपणो परमेसर झिको मालिक है। बो एक है, बिंगै बिना ओर कोई कोनी। 30थै पूरै दिल पूरी आत्मा पूरै मन अर पूरी ताकत ऊं थे परमेसर झिको मालिक है बिंऊं प्यार करो। 31दूसरो खास नेम ओ है लोगां ऊं इंया प्यार करो जिंया थे अपणै आप सागै करो हो आं दोना नेमा ऊं मोटो कोई नेम कोनी।”
32ओ सुण गे यहुदी नेम सिखाण आळा केयो, गुरूजी थे भोत आच्छो केयो, थे बिलकुल सई केयो है कै एक ई परमेसर है ओर बिंगै बिना दूसरो कोई परमेसर कोनी। 33बिं परमेसर नै पूरै दिल, पूरी समझ अर पूरी ताकत ऊं प्यार करणो है जिंया म्हे अपणै आप ऊं करां हां। ओ सारी होंबलियां अर बलिदान ऊं मोटो है।
34जद यीसू देख्यो कै यहुदी नेम सिखाण आळा नै आच्छी तरियां समझा गे उतर दियो है बां बिनै केयो थे परमेसर नै आपगो राजा, मालिक मानण खातर पूरी तरियां तैयार हो इंगै बाद यीसू ऊं सवाल करण गी हिम्मत कोनी रेई मसी दाऊद ऊं बी मोटो है अर परमेसर गै सागै राज करण आळो है।
मसी किंगो बेटो है?
(मत्ती 22:41-46; लूका 20:41-44)
35जद यीसू मिन्दर गै आंगण में सिखाण लागरया हा तो बां लोगां नै पूछयो, “यहुदी नेम सिखाण आळां क्यू केवै है कै मसी दाऊद राजा गो बेटो है। 36पवितर आत्मा दाऊद राजा नै आ बात बताण खातर केयो मेरै परमेसर मेरै प्रभु मालिक नै केयो, बिरोध करण आळा नै हरा गे तेरै पगां नीचै कर देऊं। जद तांई मेरी दाहिणी ओर बेठगे मेरै सागै राज कर।”
37फेर यीसू नै समझायो कै दाऊद मसी नै ही आपगो मालिक मानै है। तो फेर मसी सिरफ दाऊद गी पीढी में आण आळो किंया होयो। बो दाऊद ऊं मोटो है। यीसू गी ईं सिक्सा नै भीड़ भोत खुसी गै सागै सुणन लागरी ही।
यहुदी नेम सिखाण आळा ऊं सावधान
(मत्ती 23:1-36; लूका 20:45-47)
38यीसू फेर केयो यहुदी नेम सिखाण आळा ऊं बचगे रेवो। बे अपणै आपनै खास आदमी गै रूप में दिखाण खातर घुमै है अर चावै है कै बाजार में लोग बानै निमस्कार करै। 39पराथना भवन में खास जिग्यां पर बेठणो चावै है अर ब्या या कोई कीं तरियां गै भोज, नूंतै में ऐ मोटा लोगां गै सागै खास कुरसी पर बेठणो चावै है। 40झिकां गा पति मरग्या है बांगी सम्पती धन पर करड़ो नेम बणागे उजाड़ देवै है। दिखावो करण खातर लम्बी पराथना करै है। हिस्यै आदमी नै परमेसर मोटी सजा दैयगो।
कंगाल विधवा गो दान
(लूका 21:1-4)
41बो मिन्दर गी दान पेटी सामै बेठयो देखण लागरयो बठै लोग दान करण लागरया। बठै केई जणा भोत जादा दान देण लागरया। 42पण एक गरीब विधवा, आई अर दो छोटा सिका घाल्या झिका एक पिसै गै बराबर हा। 43यीसू चेला नै आपगै कनै बुला गे केयो, “मैं थानै केऊं हूं अण गरीब विधवा मिन्दर में सारा ऊं जादा दान दियो है। 44सारा लोग आपगै कनै झिको ज्यादा धन हो, बिंऊं दियो पण अण गरीब विधवा आपगो सारो कीं दान कर दियो क्यूंकै बिंगै कनै खाण पीण गै खातर झिका पीसा हा बे घाल दिया।”
Currently Selected:
मरकुस 12: BGQ
Označeno
Deli
Kopiraj
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved. © WIn Publishing Trust