लूका 2
2
यीसू गो जन्म
(मत्ती 1:18-25)
1बां दिनां में रोमी देस गै महाराजा ओगुस्तुस हुक्म दियो कै सारै देस गी जणगणना हो'सी। 2ईंखातर सारा लोग आपो-आपगी जन्म-भूमी पर आपगो नाम लिखाण गेया। 3आ पेली जणगणना सीरिया गै राजपाल क्विरिनियूस गै टेम में होई।
4-5ईंखातर युसुफ दाऊद राजा गै खानदान में होण गै खातर गलील परदेस गै नासरत गाम ऊं यहुदियां परदेस गै बेतलेहम गाम में जांती बारी आपगी होणाळी घराळी मरियम झिकी गरभवती ही बिनै सागै लेग्यो। 6जद बे बठै हा तो मरियम गै जापै गो टेम पूरो हो'ग्यो। 7धरमसाळा में जिग्यां ना मिलण गै खातर आपगै मोबी बेटै नै गऊसाळा में जन्म दियो अर घाबै में पळेट गे ठाण में लिटा दियो।
पेलो सुब समाचार सुरगदूतां गुआळिया नै देणो
8बिं रात नै बठै कनैई खेतां में भोत सारा गुवाळिया आपगी भेड़ां गी रुखाळी करा। 9बिं टेम ई प्रभु बठै एक सुरगदूत घाल्यो अर परमेसर गी इती घणी तेज जोती चमकी कै बे सारा देखगे डरग्या। 10जद सुरगदूत बानै केयो, “थे डरो ना, मैं थानै एक भोत ई आनंद गो सुब समाचार सुणाऊं, झिको धरती गै सारा लोगां खातर हो'सी। 11क्यूंकै आज राजा दाऊद गै नगर में थारै खातर मुकतीदाता प्रभु जन्मयो है, ओ ई मसी प्रभु है। 12मैं थानै मेरी ईं बात गी निसानी बताऊं कै थे बिं टाबर नै गऊसाळा गै ठाण में कपडै़ में लपेटेड़ो देखोगा।” 13जद चाणचकै ई बिं सुरगदूत गै सागै बोळा सारा सुरगदूत आ'गे परमेसर गी मेमां करण लागग्या। 14अर बोल्या, “सुरग में परमेसर गी जय हो, धरती पर बां लोगां नै सांती मिलै झिकां ऊं परमेसर खुस है।” 15फेर सुरगदूत पाछा सुरग में उड़ग्या, जद बे गुआळिया आपसरी में केण लाग्या कै, “आज्यो, आपां बेतलेहम गाम में चालगे देखां तो सरी झिको समाचार आपां नै प्रभु दियो है।” 16फेर बे बेगा सा बठै जा'गे मरियम अर युसुफ कनै गेया अर टाबर नै ठाण में सुत्यो देख्यो। 17गुवाळिया बिं टाबर नै देखगे झिकी बात बिंगै बारै में सुणी ही बां सारै लोगां नै बता दी, 18अर गुवाळिया नै झिकी बात बताई ही बिनै सुणन आळा सारा लोग हेरान होग्या। 19पण मरियम आं सारी बातां नै आपगै मन में राखी अर सोचती रेई। 20इनै बे गुवाळिया झिकी बातां बां सुणी बानै साची होएड़ी देखगे परमेसर गी बडाई करता पाछा आग्या।
यीसू गो नामकरण
21जद छोरै गै जन्म गा आठ दिन होया तो खतनै गी रीति-रिवाज पूरी करी अर बिंगो नाम यीसू राख्यो। आ बात बिंगी मां गै गर्भ में होण ऊं पेलां ई सुरगदूत बता दियो हो।
मिन्दर में यीसू नै अरपण करणो
22-24प्रभु गै नेम-विधान में लिखेड़ो है कै पेलो छोरो प्रभु नै अर्पण करणो है। अर कबूतर या चिड़ियां गा दो बच्चां गी बली देणी है। अर झिका नेम-विधान लोगां खातर प्रभु मूसा नै दिया बिंगै हिसाब ऊं बांगै सुद्ध होणै गा दिन पूरा हो'ग्या तो यीसू नै यरुसलेम गै मिन्दर में लेग्या।
समौन गो भजन
25यरुसलेम में समौन नाम गो एक धरमी भगत हो अर पवितर आत्मा बिंगै सागै ही, बो इसराएली लोगां गै सुखचैन गी अडीक करै हो। 26पवितर आत्मा बिनै कदैई पेलां बतायो कै “तूं प्रभु गै मसी गा दरसण करण ऊं पेलां समाईजै कोनी।” 27बालक यीसू गा मां-बाप बिनै नेम-विधान पूरो करण खातर मिन्दर में ल्याया तो समौन पवितर आत्मा गै केणै पर बिंऊं मिलण आयो। 28समौन यीसू नै आपगी गोदी में चक'गे परमेसर गो धन्यवाद करयो अर केयो: 29“हे प्रभु, अब तूं आपगै देईड़ बचन गै हिसाब ऊं मनै तेरै दास नै चेन ऊं आपगै कनै आण दे। 30क्यूंकै मैं तेरै भेजेडै़ मुकतीदाता गा दरसण कर लिया है। 31झिकै नै तूं सारै जगत गै लोगां गै खातर भेज्यो है। 32बो एक जोती गै समान है अर सगळी जातियां गी मुकती करसी, इसराएल देस में झिका तेरा आपगा लोग है बानै ईं बात गो गर्व हो'सी।” 33यीसू गा मां-बाप बिंगै बारै में भेद भरी बातां सुण गे भोत हेरान होया हा अर अचंभै में पड़ग्या। 34जद समौन बानै आसिरवाद दियो अर मरियम नै केयो, “सुण, ओ टाबर परमेसर गो चुणेड़ो निसान है, इसराएल देस में ईं पर बिस्वास करण आळा लोग मुकती पासी अर आनंद मनासी पण झिका लोग बिस्वास ना करसी अर बिरोध करसी बे लोग नास हो'ज्यैगा। ओ टाबर परमेसर गै कानूं चुणेड़ो एक निसान गी तरियां है बिंगो केई लोग बिरोध करैगा। 35बिंऊं लोगां गै दिल गी भावनां गो पतो चालज्यैगो अर तेरै बेटै गी भंयकर सतावना नै देखगे तेरो काळजो पाट ज्यासी अर तनै इंया लागसी जिंया तलवार काळजै माखर आर-पार काड़ दी।”
हना गी गवाई
36बठै हना नाम गी एक परमेसर गी बात बताण आळी ही, बा असेर कबिलै गै फनूएल गी बेटी ही। 37बा ब्याऊं सात साल गै बाद में विधवा हो'गी अर बिंगी उंमर चुरासी सालां गी ही, बा मिन्दर में रेंवती अर बरत अर पराथना कर'गे रात-दिन भगती करती ही। 38बिं टेम बा मिन्दर में यीसू अर बिंगै मां बाप नै मिलण आई बण प्रभु गो धन्यवाद करयो अर यरुसलेम देस में छुटकारै गी अडीक करण आळै लोगां नै यीसू गै बारै में बताण लागगी।
नासरत नै पाछो जाणो
39जद बां मिन्दर में प्रभु गै नेम-विधान गै हिसाब ऊं सारा कारज पूरा कर लिया तो पाछा गलील में आपगै गाम नासरत में उड़ग्या।#मत्ती 2:23 40बठै यीसू जवान अर बुद्धी में भरपूर होंतो गेयो, परमेसर गी किरपा गो हात बिंगै सिर पर हो।
बारा साल गी उंमर में यीसू गो मिन्दर में जाणो
41फसह गै त्यूंहार पर हर साल यीसू गा मां-बाप यरुसलेम नगर में जांता हा। 42जद बे बारा सालां गा होया तो सदां गी तरियां बे त्यूंहार मनाण यरुसलेम में गेया। 43जद बे त्यूंहार मना'गे पाछा घरे आण लागरया तो यीसू यरुसलेम में ई रेग्यो पण बिंगै मां-बाप नै ध्यान कोनी लाग्यो। 44बां सोच्यो कै यीसू दूसरा यातरियां गै सागै आंतो होणो अर इंया चालतां-चालतां एक दिन गो सफर टप ग्यो। फेर बे यीसू नै आपगै रिस्तेदारां अर जाणकारां में ढूंडण लागग्या। 45जद बो बानै लादयो कोनी तो बे ढूंढता ढूंढता पाछा यरुसलेम कानी चाल पड़या। 46जद बे तीन दिनां गै बाद में पाछा यरुसलेम गै मिन्दर में गेया अर देख्यो तो बो ग्यानी लोगां गै बिचाळै बेठयो अर सुआल-जबाब करण लागरयो। 47बठै सुणन आळा सगळा लोग बिंगी बुद्धी अर जबाब ऊं हेरान हा। 48बिंगा मां-बाप बी ओ देख गे हेरान हा अर बिंगी मां बिनै केयो, “बेटा, तूं म्हारै सागै आ के करी?, देख तनै ढूंढता-ढूंढता म्हे किता दुखी हो'ग्या।”
49यीसू बानै जबाब दियो, “थे मनै क्यामी ढूंढै हा, थे जाणो कोनी कै मनै मेरै पिता गै घर में ई रेणो जरूरी है?” 50पण बे बिंगै जबाब नै समझ कोनी सक्या।
51फेर बो बांगै सागै आपगै गाम नासरत में आ'ग्यो अर बांगै हुक्म गो पालण करतो रेयो। पण बिंगी मां ऐ सगळी भेद भरी बातां आपगै दिल में राखी। 52अर यीसू बुद्धी में तेज अर डील-डोळ में बदतो गेयो अर सागै परमेसर अर लोगां गै प्रेम में बदतो गेयो।
Currently Selected:
लूका 2: BGQ
Označeno
Deli
Kopiraj
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved. © WIn Publishing Trust