मत्ती 2
2
स्यारलेगी येशूला मिहया़ ज्याल ओहङग्यो
1हेरोद क्याहल्बुगी ती़हजीला यहूदीयाकी बेथलेहेम माएँ युहलला येशू ठुङ नाङसीन ओहजेला स्यारलेगी नामयी ताएँ मिहया़ येशूला छोल्दी यरूशलेमला ओहङसीन। 2ओहले खुङया़गी मिहया़ला दि ल़ेहमु म़ेदी टी़हसीन, “नाहरे च्यी़राङ ठुङ नाङग्यो यहूदीया़की क्याहल्बु का़हला ज़्य़ू नाङदी येहबा? ङ्यिहगी येशू ठुङ नाङग्योकी तेहन्दाला क्यी़ह ज्योर च्य़ूएँ ताक्छेन तेन्गेन्गी कार्माला स्यार ङो़ले थोङसीन ओ़ह सोङबे ङ्यिह येशूला ज्याल ओहङग्यो यिहम्बा!” म़ेदी मासीन।
3दि केच्या थे़दी क्याहल्बु हेरोद ठादोगी छाबा-छुबे पेहसीन। ओहले दि केच्याया़ क्यी़ह ज्योर फान्ज्यो यरूशलेमगी मिहया़गी सेमॱआङ कालाम-मालाम काहल्सीन। 4ओहले क्याहल्बु हेरोदगी पूजाहारी छ्यिम्बुया़ दाङ छ्य़े-ठिमकी लोबेनया़ला क़े क्याहप्ती, “थार्पा नाङगेन्गी क्याहल्बु मास्यीका का़ह ग्या़ला ठुङ नाङज्ये येह?” म़ेदी टी़हसीन। 5ओहले खुङगी हेरोदला मासीन, “यहूदीयाकी बेथलेहेम युहलला,” च्यिबेमाना सुङरापला लुहङतेम्बाया़गी दिगी तेहन्दाला दि ल़ेहमु म़ेदी प्री़हदी येहबा–
6“ए यहूदीयाकी बेथलेहेम, ख्ये यहूदीयाकी क्याहसागी पाहरक्यीला काहन्डुमु पेहतीॱआङ फेमा म़ेह,
च्यिबेमाना ख्ये ङो़ले क्याहल्बु छ्यिम्बु च्यी़ थेन फेप्च्ये येह,
ओहले मिहरोगीॱराङ कोहरोवागी ल़ेहमु जेती
ङाहगी पाहङ-मिहसेर इस्राएलला ज़ी़ नाङज्ये येह।” #मीका ५:२
7दि थे़दी हेरोदगी ओ़ह स्यारले ओहङग्योगी नामयी ताएँ मिहया़ला खाजुम्बाला क़े क्याहप्ती ताम टी़हदाप पेहसीन ओहले कार्मा काहजे ती़हजीला थोङबा माएँ ताम खुङया़ लाहमले क्यी़ह ज्योर्सीन। 8ओहले हेरोदगी खुङया़ला दि ल़ेहमु म़ेदी बेथलेहेमला ताङ चाहङसीन, “सोङ, ओहले या़हबु पेहती ओ़ह पेहजाला छोल्दोङ। खोला च्य़ेह सिहन फान्ज्यो ङाहला लेहङगु स्येतोङ, ओहले ङाहॱआङ काहल्दी खोला ज्याल्गे।”
9ओहले खुङ क्याहल्बुगी ताम ङ्यिहन्दी बेथलेहेम ङो़ले काहल्सीन। डोडोपा काहङला स्यारला थेन्ग्योगी कार्मा येहपाराङॱआङ थोङसीन। ओ़ह कार्मा तोहङदा-तोहङ लाहम स्य़ूहदी ल़ेनु स़ेबु येहकेन्गी ग्या़ थेका थो़लाराङ लेप्ती क़ूहसीन। 10दि थोङदी खुङ ज्यिबुराङ क़ेहनाङ लाहङसीन।
11ओहले ओ़ह खाङबाला लेप फान्ज्यो खुङया़ खाङबा नाहङला स्य़ूहसीन ओहले पेहजा ल़ेनुला आमा मरियम ङ्याम्बुराङ थोङसीन। ओहले खुङया़ पी़मु च़ूदी पेहजा ल़ेनुला ज्याल्सीन। ओहले राहङ-राहङगी काहम्ज्युङ खा फ़ेदी पेहजा ल़ेनुला सेर, स्युक्पा ओहले टिहमा स्यिहम्बु खाएँगी नुमया़की ज्याल्देन फुल्सीन।
12ओहले हेरोदसाला लो़हदी माहन्डो म़ेदी मिलामला किन्ज्योगी ज्याल्गा नाङ फान्ज्यो खुङया़ लेहमेनॱराङ लाहमले पेहती राहङ क्याहल-खापला लो़ह काहल्सीन।
मिश्र क्याहल-खापला प्रे़ह काहल्ग्यो
13ओहले ओ़ह नामयी ताएँ मिहया़ काहल फान्ज्यो योसेफगी मिलामला चो़वो छ्येवा किन्ज्योकी स्यिहङगामगी स्याहप्च्यीला थोङसीन ओहले स्यिहङगामकी स्याहप्च्यीगी खोला दि ल़ेहमु सुङ नाङसीन, “ख्ये लाहम्साङराङ आमा दाङ पुहला ख्येर्ती मिश्र क्याहल-खापला सोङ। ओहले ङाहगी लो़हदी स्यो म़ेदी मा़हमे थु ख्याया़ ओ़हलाराङ तेहतोङ च्यिबेमाना हेरोदगी पेहजा ल़ेनुला सेच्ये म़ेदी साम्लु ताङदी येह” म़ेदी सुङ नाङसीन।
14ओहले योसेफ लाहङदी आमा दाङ पेहजा ल़ेनुला ख्येर्ती कुहङमुराङ मिश्र क्याहल-खापला काहल्सीन। 15ओहले हेरोद मा़हस्यी थु खुङ मिश्र क्याहल-खापलाॱराङ तेहसीन। लुहङतेम्बा लाहमले चो़वो छ्येवागी सुङ नाङग्योकी स्याहल दि ल़ेहमु पेहती तेहन्दा डुप्सीन, “ङाहगी राहङगी पुहला मिश्र क्याहल-खापले क़े क्याहप्सीन।” #होशे ११:१
हेरोदगी ल़ेनु पेहजाया़ला से च्य़ूक्यो
16ओहले नामयी ताएँ मिहया़गी खोला चिहन क्याहप्क्योगी ताम हेरोदगी क्यी़ह ज्योर्सीन ओहले खो स्यिहताङगी मी़राङ माहथोङ। ओहले खोगी बेथलेहेम दाङ ओ़ह साहर-सुहरकी युहलया़ला येहकेन्गी लोह ङ्यी़ दाङ ओ़ह यिहन्ज्यु माहर-तेपकी पुह-पेहजा रेबेलाॱराङ से च्य़ूसीन च्यिबेमाना हेरोदगी कार्मा थोङग्योकी ती़हजी नाहम यिहम्बा म़ेदी नामयी ताएँ मिहया़ ङो़ले क्यी़ह ज्योर्ती येहकें। 17ओ़ह ती़हजी यर्मिया लुहङतेम्बागी सुङ नाङग्योकी स्याहल तेहन्दा डुप्सीन।
18“रामा माएँ क्याहसाला ङुहप्रा तिहङरा पेहकेन क़े च्यी़ थ़ेसीन,
ङुहप्रा तिहङरा पेहती ङुहक्यो दाङ तुहङालगी खेलाङ पेहक्योगी क़े छ्यिम्बु,
राहेल राहङगी पेहजाया़गी तेहन्दाला ङी़ह तेहती येह।
मोहला सुगीॱआङ सेम ज़ुङ च्य़ू मा़हखु
च्यिबेमाना पेहजा थाम्ज्यीराङ स्यिदी येह।” #यर ३१:१५
19हेरोद स्यि फान्ज्यो, चो़वो छ्येवागी स्यिहङगामकी स्याहप्च्यी च्यी़ मिश्र क्याहल-खापला योसेफगी मिलामला फेप्ती सुङ नाङसीन, 20“लाहङदोङ, ता़ह आमा दाङ पुहला ख्येर्ती इस्राएल क्याहल-खापला लो़ह सोङ च्यिबेमाना पेहजा ल़ेनुला सेच्ये छोल्गे मिह स्यि सिहन्दी येह” म़ेदी सुङ नाङसीन। 21ओ़ह तिङले योसेफगी आमा दाङ पुहला ख्येर्ती इस्राएल क्याहल-खापला लो़ह काहल्सीन।
22ओहले हेरोदकी पुह अर्खिलउस यहूदीयाकी क्याहल्बु काहल दु माएँ थे़दी योसेफ ओ़ह लुहङबाला डोज्येला ज्यी़सीन। ओहले येहपाराङ किन्ज्योगी योसेफला मिलामला ज्याल्गा नाङदी खुङ गालील साने़ला काहल्सीन। 23ओहले खुङ नासरत माएँ क्याहसाला काहल्दी तेहसीन। दि ल़ेहमु पेहती लुहङतेम्बाया़ लाहमले सुङ नाङग्योकी स्याहल तेहन्दा डुप्सीन, “मिहरोला नासरी माज्ये येह।” #मर्क १:२४; लूक २:३९; यूह १:४५
Currently Selected:
मत्ती 2: HYLM
Označeno
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.