मत्ती 6
6
दानो विषय मेहे सिक्षा
(लूका 11.2-4)
1सावध रो तुमु तुमा धार्मिकताआ काम मांहोहो देखाडूहू कोता कोहू नाहा, निते तुमा स्वर्गातल्या बाह्हाप रोत तुमामे किबी जोडयो उवे नाहा. 2त्यापोत जांहा तू दान आपी ताहा ताआ आगाडी नरसिंगा वाजाडुहू नाहा, जेहलो ढोंग कोय मांहे सभास्थानात अने गल्ली-गली माय कोअता का, मांहे जिया स्तुती कोअला जोवे आय तुमामे खरंच-खरंच कोत्लू का, ते आपाआ फोल मिलवीत चुक्यो होय. 3पण जांहा तू दान कोअही तेहलाम ताआ बांगडू आथ होमजुलो नाहा का ताआ हुडू आथे की कोईत होय. 4ज्यायाकोलो ताआ दान गुप्त रोही अने ताआ बाह्हू जो गुप्तमे पालत्लू तो ताहु प्रतिफोल आपी.
प्रार्थनाआ सिक्षा
(लूका 11.1-4)
5जांहा तू प्रार्थना कोअही तेहलाम ढोंग्या होसऱ्या ओवुहू नाहा, काहाके मांहोहो देखाडल्या कोअता मंदिरोम अने वाटेए कडेवर उभे रोत प्रार्थना कोअला तियाहा गोमत्लो, आय तुमामे खोरीज कोत्लू का, ते आपाआ पुरो फोल जोडयो कोईत चुक्यो होय. 6पण तू जांहा प्रार्थना कोअनारू तेहलाम आपाआ बंद खोलीम जा अने दरवाजू बंद कोईत आपाआ बाह्हा आरी जो गुप्तमे होय प्रार्थना को अने ताआ बाह्हू जो गुप्तपणे पालत्लू ताहु तिया फोल आपे 7अने जांहा तू प्रार्थना कोअही तेहलाम अन्यजाति सारखो बड़बड़ मा कोअहा, काहाके ते एहलो विचार कोत्ले का त्याआं जाखो गोगीला त्याआं होमल्यु जानारू. 8याकोअता त्याहोच बोनाहा नाहा, काहाके तुमाआ बाह्हू मागीला पहीले तुमाआ गरजा तियाहा मालुम होय. 9याकोअता तुमु एहला प्रमाणे प्रार्थना को, ओ आमा ओबा, तू जो होर्गाम होय, ताआ नाव पवित्र मान्ये जालो, 10ताआ राज्य आवे, ताआ ईच्छा जीही होर्गाम पुरो ओते, तेहलूज धोरतीपो पण पुरो उवे. 11आमाआं दीहोओ रोटू आज आमाहा आप. 12अने जेहलो आमू आमा शत्रूहू माफ कोअया तेहलूज तू पण आमा अपराध माफ को. 13अने आमाहा परीक्षेमेहे लेतावी नाहा, ताहा वाईटापोरोत वासाड, काहाके राज्य, पराक्रम अने गौरव ताआज होय आमेन. 14जर आमाहा मांहाआ अपराध क्षमा कोअनारू ताहा तो तुमाआ होर्गामेऱ्ये बाह्हू पण तुमामे क्षमा कोअनारू 15पण जर तुमु मांहाआ अपराध क्षमा कोअनारू नाहा ताहा तुमाआ होर्गाआ बाह्हू पण तुमाआ अपराध क्षमा कोअनारू नाहा.
उपासोओ सिक्षा
16पण जांहा तुमु उपास कोअहा ताहा सुबीपो ढोंग्या होसऱ्या देखाडहु नाहा, काहाके ते आपाआ सोब उतरित मेकात्ले, ज्यायाकोलो ते मांहा आगाडी उपास होयतो देखिलो जोवे आय तुमामे खोरोज कोत्लू का, ते तियाआ पुरो फोल प्राप्त कोईत लेदे. 17पण तू जांहा उपास कोअही तेहलाम ताआ मुंडकाप तेल टाकीत अने सोब तोवीत ले. 18याकोअता का तू मांहोहो उपासी देखातू नाहा, पण ताआ बाह्हू गुप्तमे होय अने ताआ बाह्हू जो गुप्तमे पालत्लू ताहु फोल आपे.
होरगा मेहे धन एकठो कोआ
(लूका 12.33-34; 11.34-36; 16.13)
19तुमा कोअता धोरतीपो धन साठवून मा मिकाहा जीही किडे अने जंग नाश कोअता अने जीही बांड सेध लागाडत्लु अने चोरी कोअत्लु. 20पण आपाहा होर्गाम धन एखटो को जीही किडे अने जंग नाश कोईत नाहा अने बांड नाहा सेध लागाडे अने नाहा चोरी कोए. 21काहाके जीही ताआ धन होय तिही ताआ मोन लागीत रोय.
डीलोओ दिवू
22काहाके डीलाआ दिवू डोउ होय, त्यापोत जर ताआ डोउ साफ होय ताहा ताआ आखे डील प्रकाशाम रोही. 23पण जर ताआ डोउ खराब होय ताहा ताआ आखे डील अंधकारमय रोही, याकोअता जो प्रकाश तांआम होय तो आंदारो होय ताहा ओ आंदारो केवडू होय?
कोडनी गुठी चिंता नि कोअलोओ
(लूका 12.22-34)
24कोडु पण बेन धन्याची साकरी कोहू शकत नाहा. काहाके तो एकापो प्रेम कोअनारू अने दिहरापो द्वेष कोअही किंवा एकाआरी हाजू वागीलो अने दिहीराहा तुच्छ मानणारु तू परमेश्वर अने धन बेन जोआआ सेवा कोहू शकत नाहा. 25कोईत आय तुमाहा कोत्लू का, आपाआ जीवाकोता ए चिंता कोहू नाहा का, की खावा अने की पिवा अने आपाआ डीलाकोता की पाघरिलो, खानापेक्षा जीव अने कापडाप रोत डील जाखा महत्वाओ होय का नाहा? 26जुगोमेरयो सिडाहा पाला, ते पेईलो कोअते नाहा अने वाडीलो ए कोईत नाहा अने खोलामेहे जमा कोईत नाहा तेबी तुमाआ होर्गामेऱ्ये बाह्हू तियाहा खाहुं आपत्लू तीयामरोत तुमाआ किमोत जाखा होय का नाहा? 27तुमामेरयू कोडू एहेलू होय का, जो चिंता कोईत आयुष्याला वाढविलो अने निवरवीत शकतो? 28कापडा कोता तुमु चिंता काहा कोअता? रानोमेऱ्या फुलोहो पाला का ते केहलो वोदत्ले ते मेहनतो कोईत नाहा, वाडीलो कोईत नाहा. 29तेबी पण आय तुमामे कोत्लू का सलमोन सुद्धा आपाआ आखे वैभवाआ त्यामोऱ्यो एका होस पण कापडे पेअल्यु ने ओतू. 30त्यापोत जर रानोमेऱ्या खोड़ जे आज होय अने उद्या आगीई भट्टीम टाक्ये जाइअलो तियाहा जर देव एहलो प्रकारे कापडे पेआडत्लु ताहा ओ अल्पविश्वसी, तो तुमा कोअता काहा नाहा यांपोरोत विशेष कोअनारू? 31तुमु चिन्ता कोईत ओमा कोहा की खाहू की पिहू की पेअहु कोईत चिंता कोअहा मा. 32काहाके अन्यजाति उस्तुक तेने याआ आखे वस्तुऊ होदिअलो रोतेहे, पण तुमाआ होर्गामेऱ्ये बाह्हाहा मालूमे होय का तुमामे याआ आखे वस्तुंउ आवश्यकता होय. 33कोईत पेल्लू तुमु परमेश्वरोओ राज्य अने धार्मिकताआ होद को म्हणजे तुमाहा ऐ आखी वस्तु तुमाहा जोड़े. 34अने हांदा चिंता कोहू नाहा काहाके हांदा दिह खुदोओ चिंता खुद कोइत लेय; आजे दिहो कोअता आजे दु:ख जाखो होय.
Currently Selected:
मत्ती 6: NOINT
Označeno
Share
Copy
Want to have your highlights saved across all your devices? Sign up or sign in
Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.