Luk 9
9
Zezu aluma betuma bedzi iku ne bole
1Zezu akukise betuma bedzi iku ne bole. Yedzi ekaba bangu singa ne ukani ve upanza mimbiti myesi ne usaka mibedzu. 2Wangu amana vavu, yedzi eluma bangu ne utse tandaka misisili mive mye Ukani ve Nzambi ne usaka mibedzu. 3Zezu atanda ne bangu ati: «Ye beyi bitse undzunga beyi nde bapa yila tine yotu. Beyi nde bapa unsumbi, nde bapa nwanza, nde bapa bila, nde paba bedolo, bapayi si ingoyi dzotu ne mutu. 4Yebi yamba beyi se ndaku mbotu, dzakayi wawu ndzii ne beyi bivutse. 5Ye batu bilewe yamba beyi, temayi ngundu ye bangu. Fufulayi iwulu dze metambi me beyi. Beyi ti bapika vavu, beyi belaka nati Nzambi atse pama bangu.»
6Ye Zezu emana wowe vavu, ye bebingi bedzi betse se membuka mesi. Ne utandaka misisili mive mye Nzambi, ne usaka mibedzu.
Bayi ye Elodi
7Elodi lipatima le Galile, ayuka mesi me mesuta. Wangu edze nde yiba nda wangu itsimene. Utsina ne batu boko bedze ne tanda ati: «Zezu ni Zambatisi wa nyuse tima ye liku.» 8Aba ati: «Eli iya laka nyulu.» Boko ati: «Toko Mutu we Nzambi motu we me yinga se liku.»
9Ni Elodi ati: «Me mene ni we luma ne utsita Zambatisi tsungu, ni wangu yu mutu ni nza? Wami iyuka mamvu me tu.» Ye Elodi efumba yene Zezu.
Zezu abungile batu meku mye mikama mitanyi (5000)
10Betuma be Zezu baye vutse, ye bangu betanda Zezu mesi me bangu bepika. Zezu abapa bangu ulayi ne batu, kwele ye ngundu ye kumvu Betsayida. 11Ye batu beyuka vavu, ye bangu bebinga Zezu. Zezu ayamba bangu, yedzi ewowe ne bangu mamvu me Ukani ve Nzambi, Zezu asaka batu bedze ne mebedzu.
12Betuma be Zezu beyene ati, vusa va kitse yinda, ye bangu betsindene nongo nedzi ati: «Vutise batu betse se membuka, ne se mendaku medzi bakaka. Awawu bangu betuka kobisele buma ye bembula ne bila bye udza, awa bebe bedzi ni se buma ye ikanye.» 13Ni Zezu ne bangu ati: «Beyi mene kabayi bangu bila.» Betuma be Zezu nedzi ati: «Besu bedzi si ne pembe itanyi ne beswi bole, we ni witi besu betse sumba bila bye batu ba besi?» 14Ni yedze ne mikama iku mye mebaka. Zezu ne betuma bedzi ati: «Sundisayi bangu mitsitsi, batu meku metanyi ne ye bangu buma.» 15Ye betuma bepika nda Zezu eluma bangu pika, basundise batu mitsitsi. 16Ye Zezu eboko pembe mene itanyi ne beswi mene bole, yedzi ewaya ikulu, avutise Nzambi live ne bila. Zezu akaba bila ne bebingi bedzi, ye bangu bekabaka batu besi. 17Batu besi badza, bayula. Metsika mebila mevuka, malundise membele iku ne mole.
Pyeli ati Zezu ni we Nzambi etobo
18Vusa votu, Zezu atse bondo se buma yotu wangu mene, ne bebingi bedzi bedze konedzi. Zezu asunwule bangu ati: «Me batu bitanda se nyulu yami ni meza?» 19Bebingi nedzi ati: «Aba ati, we ni Zambatisi, boko ati, we ni Eli, boko ati, we ni Mutu we Nzambi motu wawaa, wanyuse.» 20Zezu ne bangu ati: «Ni beyi bati me niza?» Pyeli akalule: «We ni we Nzambi etobo.»
21Zezu asimba bangu ati: «Beyi nde banda batanda ne mutu tine motu, me beyi beme tanda kule yami.» 22Ye Zezu evele tanda ne bangu ati: «Uve we yikwene Mutu ayene membaba meyitsi. Batu bekala ne bekunwu be bekabi be bisemi bye Nzambi ne belakisi be bitsila betse lewe wangu. Betse buma wangu, vusa ve unsatu wangu atse nyuse.»
23Ye Zezu etanda ne batu besi ati: «Ti yedzi ne mutu witondo binga me, wangu nde tsimene nyulu yedzi mene. Uve wangu abapa koko ye beliningise wangu mene#9.23 Koko ye beliningise yedzi ni buma ye bekomidze Zezu betsete. masi mesi ne ubinga me. 24Yayu witse fumba lungise libiku ledzi atse fiya langu, ni witse fiya libiku ledzi utsina nami atse lunga. 25Mutu tabomo unta nvu nwen ilongo, afiya libiku ledzi, ayabaka langu, yedzi ibomo niyi? 26Mutu tadzi ne sonyi yami ne mamvu mami iwowe, nami we yikwene Mutu, metse yene sonyi nedzi, yami itse ya se ukani vami ne ukani ve Tata wami, ne ukani ve betuma be Nzambi bemipende. 27Metanda beyi umbu amene, se batu bidzi wa, boko ndetse waa ti bangu besande yene Ukani ve Nzambi.»
Pyeli ne Zan ne Zaaki bayene Zezu se ukani ve Nzambi
28Masi nwambi mesuta, Zezu amana wowe vavu, yedzi eboko Pyeli ne Zan ne Zaaki, abita kule kudzi ne ubondo. 29Ye Zezu edze ne ubondo, panza yedzi ya yikwene, ne mikanda myedzi eswa mya fuma fuuu. 30Palikise, batu bole bedze ne wowe ne Zezu, yedze ni Moyizi ne Eli. 31Bayene bangu se ukani ve Nzambi. Moyize bane Eli bedze ne wowe ne Zezu ne liku ledzi Zeluzalemi. 32Pyeli ne boko bedze nedzi bawoto bembula. Ndili ye bangu benyuse, bangu bayene ukani ve Zezu ne batu bole bedze nedzi. 33Ndili ye Moyize ne Eli betse, Pyeli ne Zezu ati: «Kunwu, ayi ni buma yive, bebe betuka dze wa, bebe betunga membanza mesatu, mbotu yowe, mbotu ye Moyizi ne mboko ye Eli.» Ni Pyeli eke yiba medzi edze ne tanda. 34Yedzi edze ne wowe vavu, ye lingutsu levungile bangu. Bebingi be Zezu bayene bongo. 35Dzuyi dzayinga se lingutsu ati: «Ayu ni nwana wami metobo, yukayi wangu.» 36Dzuyi dze mana wowe, ye Zezu evuka wangu mene. Ye bebingi be Zezu bebata dzangu, bangu beke tanda ne mutu tine motu me bangu beyene vusa vavu.
Zezu asaka nwana widzi ne umbiti
37Vusa ve se nwen, ye Zezu ne bebingi bedzi beyinga se kudzi ne usundaka, ye unkuka nwen batu nwen ya kwanye ne Zezu. 38Se unkuka nwen batu nwanwu, ye mutu motu ewula unsima ati: «Kunwu, kolokolo yowe, waya nwana wami yu, wangu ni nwana wami we itsika! 39Umbiti nwen kwata keke wangu palikise, yedzi iwula misima, ye umbiti wiyingise nwana ne singa, ye meteyi mipula nwana se undzuvu. Ye nyulu yi pika wangu ngadzi, nwangu ne upula udilu. 40Masunwunle bebingi bowe ne upanza umbiti, ni bangu nde tuka.» 41Zezu ati: «Beyi batu be lolo, beyi nde ivukidze, beyi bedzi ne ma nvu mebi. Metse dze ne beyi ni ndzii ndili yowi?» Zezu ne mutu mene ati: «Yaka ne nwana wowe we ibaka wiya.» 42Ye nwana edze ne tsindene, umbiti nwan nanwule nwana nwan nyingise wangu ne singa. Zezu abanwunle umbiti, alungise nwana avutise nwana ne tata. 43Batu besi bakima. Bangu bati: «Nzambi adzi ne uneni amene.»
44«Dzuvulayi meluyi me beyi, umve beyi babata mami itandele, betse tsina we yikwene Mutu se meboko me batu.» 45Ni bebingi be Zezu nde yuka me Zezu ewowe ne bangu, mamvu mamu medze ni mesaka isolo, ni bangu beke yiba metsina me mamvu mamu, ne bangu bedze ne bongo ve u sunwule Zezu metsina me mamvu mamu.
Witakwe boko ubutu niza?
46Bebingi be Zezu bedze ne wowe tima ye bangu, ne ufumba yiba witakwe boko. 47Zezu ayiba me bangu bedze ne wowe, yedzi eboko nwana unte ne udzika konedzi. 48Ye Zezu etanda ne bangu ati: «Wiyamba nwana yu ne itondo dzedzi idzi ne dzangu nami, ame yamba ni me. Weme yamba me, ayamba ne we meluma me, ni widzi nda nwana unte tima ye beyi, awayu ni witakwe boko besi.»
49Zan ne Zezu ati: «Kunwu, besu beme yene mutu motu we me panza mimbiti ne kumvu yowe, ye besu beme simba wangu nedzi nde se yimvu ye bebe.» 50Ni Zezu akalule nedzi ati: «Beyi nde simba wangu, we nde wunda bebe adzi ni we bebe.»
Zezu atse Zeluzalami
51Ndili yakalwe ye Zezu inangwe ilongo dzi. Zezu ati, umve matse Zeluzalemi. 52Zezu aluma betuma se mbuka ye Samali ne utse yebise wangu buma. 53Ni batu be mbuka balewe yamba wangu, nedzi edze ne utse Zeluzalemi. 54Zaaki bane Zan beyene vavu, bangu ne Zezu ati: «Kunwu ti wa tondo, besu beluma nwunyan nwiyinga ikulu nwen bungise bangu besi.» 55Ni Zezu ayikwene, awaya bangu, ne bangu ati: «Beyi nde pika vavu.» 56Ye bangu betse se mbuka mboko.
Bitondo binga Zezu
57Ye bangu bedze ne landa, mutu motu ne Zezu ati: «Metse binga we bibuma byesi byowe itse.» 58Zezu akalule nedzi ati: «Bembakwe bedzi ne mebila me bangu bisolime, ne benyodzi bedzi ne mendaku, ni me we yikwene Mutu mende buma yami inanga bembula ne yami idzunda.» 59Zezu ne mutu moko ati: «Binga me.» Ye mutu ekalule nedzi ati: «Kunwu dzika maketse sodze tata wami.» 60Zezu nedzi ati: «Dzika bitsindzi bye sodze bitsindzi bye bangu. We, tseke ne utanda misisili mye Ukani ve Nzambi.» 61Mutu moko ne Zezu ati: «Kunwu me binga we, ni dzika maketse lakene ne yali yami.» 62Zezu nedzi ati: «Wiboko ipimbi ne ukuna, tawaya mbisa, awayu nde tuka dzandza se Ukani ve Nzambi.»
Currently Selected:
Luk 9: WUM
Označeno
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES