Luk 21
21
Semi ye ŋwatu uŋkwili
1Zezu amana wowe vavu, awaya, ayene batu be Untamvu bedze ne usomo bedolo se membele me bisemi bye ndaku ye Nzambi. 2Wangu ayene ne ŋwatu uŋkwili we mimvuvu, nedzi asomo bepitisi be bedolo bole se mbele ye bisemi. 3Ye Zezu etanda ati: «Me tanda beyi, umbu amene, bedolo be ŋwatu uŋkwili we mimvuvu yu mekaba batakwe beboko besi. 4Ni boko beme somo bedolo ni be bangu beme dze ne bangu betsalala, ni wangu se mimvuvu ŋwedzi akaba bedolo besi bedzi biki dza bila ne bangu.»
Zezu atanda itsala dze ndaku ye Nzambi
5Va batu bedze ne uwowe ne ndaku ye Nzambi, ne ukakise memanyan meve mengeyingeyi, ne bineni byoko bye bekaba Nzambi, Zezu atanda ne bangu ati: 6«Ndili yetse ya, ye byesi bye beyi bikakise bi, bye tse tsalive, nde imanyan ti ne dzotu dzi tse vuka kule dzoko.»
Mitse banda ya ubusu ve misiyili mye ilongo
7Bangu basuŋwule wangu ati: «Kuŋwu, mamvu mowe itanda ma, me tse ya ni ndili yowi? Ni ndimvu ye bitse yiba mitse ya ni inza?» 8Zezu akalule ati: «Dzayi ne untsengu, toko bakuta beyi. Batu beyitsi betse ya ne kumvu yami.» Betse tanda ati: «Me ni we Nzambi etobo, ndili ya kalwe.» Ni beyi nde binga bangu. 9«Ndili ye beyi bitse yuka belwana mebadzi ne fuŋwule, beyi nde yene bongo. Umve mamvu mamu ma banda ya, ni mangu nde tse siya tsaŋwen.» 10Yedzi evele tanda ne bangu ati: «Ilongo dze tse lwana ne ilongo dzoko, ne kani atse lwana ne kani moko. 11Senze yetse anyingene kate anyingene amene, ne se melongo moko yetse dze ne pinga, ne mebedzu me neni me tse ya se bibuma byoko bye melongo, betse yene mendimvu ne mamvu me neni ikulu, batu betse yene bongo amene. 12Ni mamvu mamu mesi ne uya, betse kwata beyi, betse nyokile beyi, betse bapa beyi se mendaku me umbondu ne upama beyi, betse somo beyi mingenenge, betse bapa beyi busu ve bekani ne ve mepatima, ma mesi itsina nami. 13Ayayu, ni ye beyi bitse wowe ne kumvu yami. 14Dzayi ne ukilu, beyi nde yene bayi ne me beyi bitse tanda busu ve bepami be mamvu, ne ubomo mbingu. 15Ni me mene me tse tanda beyi me beyi bitse wowe ne ukani, muutu ti ne motu wi wunda beyi nde tse tuka wowe ne beyi, nde tse tuka kalʉle beyi. 16Ne tata, ne mama we beyi, ne baana be mama be beyi, biyali, bembatsi be beyi, bangu betse kaba beyi mekasa, bangu betse buuma beyitsi tima ye beyi. 17Batu besi betse wunda beyi itsina nami. 18Ni lisuyi ti ne lotu le myulu mye beyi nde tse nyongo. 19Pikayi singa, yayu beyi bebata lɨbiku le beyi.»
Zezu atanda itsala dze Zeluzalemi
20«Ye beyi bitse yene Zeluzalemi, bewolo badzendze me kwele mesi, witi ndili ye utsala Zeluzalemi ya ketse bakime. 21Ndili mene yayu, bitse dze Zudee, betse tanga se bikudzi, bidzi Zeluzalemi batanga ulayi, bidzi se bimbanzi nde tse tuka vʉtse ngundu. 22Yetse dze ni masi me Nzambi itse pama batu be Isayeli, mesi me betende se Sanguvu ye Umpende, me tse ya ni vavu. 23Ndoko ne baatu bitse dze ne mimi vʉsa vavu, ne baatu bitse nyangise baana mebele! Ne batu be ilongo dzadzu betse yene membaba, ne kamve ye Nzambi yetse ya se batu babu. 24Betse buuma bangu ne pusezunlu, betse bapa bangu mingenenge se melongo mesi, ne be nde yiba Nzambi betse dzangite Zeluzalemi, nzii ne ndili ye bekaba bangu yitse siya.»
We yikwene Muutu atse ya
25«Se musa, se sundzi ne myatsitsi, betse yene mamvu me likimiyinda, mepepe meneni me nzali we metsimba me tse kukidze ne singa yesi, ne batu besi be se senze, betse dze ne bayi, ne bongo. 26Batu betse waa ne bongo, ne bangu bitsimene mitse ya kule senze, ye bisinga byesi bye ikulu bitse anyingene. 27Ye bangu bitse yene we yikwene Muutu aya se lingutsu ne singa yesi ne likuma lesi. 28Ndili ye beyi bitse yene mamvu mamu, sikulayi myulu ne singa! Yedzi ni Nzambi iya lungise beyi.»
Unlinvile ŋwen ŋwili ŋwen kumvu figye
29Ye Zezu etanda bangu unlimvile ati: «Wayayi ŋwili ŋwen kumvu figye, ne mili myoko myesi! 30Ndili ye beyi biyene kayi ye mili yaki mendze, beyi beyiba ati, mvula akitse non. 31Dzangu dzotu, ndili ye beyi bitse yene mamvu mamu, uve beyi bayiba ati, Ukani ve Nzambi va ya bakaka. 32Me tanda beyi ni umbu amene, batu be yake yi nde tse waa besi, bangu ti nde yene mitse ya. 33Ikulu ne senze dze tse nyongo, ni iwowe dzami nde tse tuka nyongo.»
We yikwene Muutu atse ya ni palikɨse
34«Dzayi ne ukilu, beyi nde tuka dza bila, ne unoto melaku me ndili mesi, ne utsimene mamvu me ilongo, toko we yikwene Muutu atse ya ni palikɨse beyi nde yiba, 35nda konwon yi kwata beswi palikɨse. Ne batu be se senze betse yene vʉsa vavu ni palikɨse. 36Beyi nde nanga bembula, bondayi me ndili mesi, yayu beyi bebomo singa ye utuka mamvu miya, ne uya untele busu ve we yikwene Muutu.» 37Zezu ne musa, alakise se ndaku ye Nzambi, ne ikolo yedzi tse nanga mbula kule Kudzi ye kumvu ŋwili ŋwen olivye. 38Ne suka kwen ye batu besi biya se ndaku ye Nzambi ne uyuka Zezu.
Trenutno izbrano:
Luk 21: WUM
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES