Luk 19
19
Zezu ne Zase
1Zezu akalwe Zeliko, alinenga ngundu. 2Awayu, yedze ne muutu we kumvu Zase, wangu edze ni kuŋwu we betolingi be bedolo. Wangu edze ne Untamvu. 3Wangu afumba yene Zezu, ni nda wangu idzi unkudzu, wangu nde tuka yene Zezu utsina ne batu uyitsi. 4Wangu atse ne mbangu busu ve bangu, yedzi ebita kule ŋwili ŋwen kumvu sikomole, ne uyene Zezu wi sutele wayu. 5Ndili ye Zezu ekalwe sina ye ŋwili mene, Zezu asikule mɨsa. Wangu ne Zase ati: «Sunda mesadzi Zase, velolo uve ma nanga se ndaku yowe.» 6Ye Zase esunda mesadzi, mesadzi, ayamba Zezu ne itsisa dzesi. 7Ndili ye batu beyene vavu, bangu besi bampanda Zezu ati: «Muutu yu, atse nanga se ndaku ye muutu we mesumu!» 8Zase, untele busu ve Kuŋwu, nedzi ati: «Kuŋwu, me pasele Untamvu ŋwami tima. Yayu meboko pesi yoko, mekaba be mimvuvu. Ne wami ekuta se untalu ŋwen bedolo, me vutise wangu bidzʉku binayi bye libu le bedolo bedzi.» 9Zezu nedzi ati: «Ve lolo Nzambi alungise batu be ndaku yi. Nowe se Zase, we dzi ni we imbisa dze Ablaami. 10Yayu we yikwene Muutu eya ni fumba ne ulungise batu bedze banyongo.»
Ngana ye bepitisi
11Nda batu bedze ne yuka me Zezu iwowe, wangu avele te ngana utsina nedzi edze kone Zeluzalemi, ye batu betsimene ati, Ukani ve Nzambi va kitse ya. 12Wangu ati: «Yedze ne muutu motu we ŋwunyan ŋwen kani, atse se ilongo dze ulayi yayu bekaba wangu ukani. Ti wangu amana, aye vutse.» 13Wangu ne utse, abanga bedzanzi bedzi iku, akabaka bangu muutu dolo motu. Ne bangu ati: «Pikayi umbungu ne bedolo babu beyi bebomo mesasene, nzii nami iya vutse.» 14Ni batu be ilongo dze dzi bedze ne uwunda wangu. Bangu baluma batu mbisa yedzi ne utanda ati: «Besu nde tondo ati, muutu yu ayikwe kani we besu.» 15Ni wangu ayikwe kani, yedzi evutse ilongo dze dzi. Yedzi ebanga bedzanzi bedzi ekaba bedolo, ne uyiba bye bangu bebomo. 16We wika aya ati: «A kuŋwu wami, ma bomo bedolo iku kule ye dolo motu wowe ekaba me.» 17Kani nedzi ati: «Yemini, we ni undzanzi we umve, nda wedzi tele se mamvu mete, waya ni lipatima le bingundu iku.» 18We unyole aya ati: «A kuŋwu wami, ma bomo bedolo betanyi kule ye dolo motu wowe ekaba me.» 19Kani ne we unyolo ati: «Nowe, waya ni lipatima le bingundu bitanyi.» 20Moko undzanzi aya ati: «Kuŋwu, yene bedolo bowe, bami esodze se fuku. 21Me dze ne bongo vowe, nowe idzi ne umbivilu. We boko byowe nde dzika, we tolo byowe nde ŋwasa.» 22Kani nedzi ati: «Undzanzi we mamvu mebi, me pamele we se mowe mene me wowe. We yiba witi me ni muutu we umbimvulu, me boko byami nde dzika, me tolo byami nde ŋwasa. 23Ni yowe eke dzika bedolo bami se ndaku ye bibata bedolo ni yi? Yami me ye vʉtse, tadzi me me kobise bedolo bami ne mesasene.» 24Yedzi etanda ne batu bedze wawu ati: «Bokayi dolo motu widzi nedzi, kabayi ne widzi ne bedolo iku.» 25Bangu nedzi ati: «Kuŋwu, wangu kadzi ne bedolo iku!» 26Kani akalule ne bangu ati: «Me sikidze beyi, muutu widzi ne yila, bevele kaba wangu byoko, ni muutu we nde yila, betse temise wangu ne yite yidzi nedzi. 27Ni batu biwunda me, be nde tondo ati, me yikwe kani we bangu, yakayi ne bangu wuya, buumayi bangu busu vami.»
Zezu atse Zeluzalame
28Zezu amana wowe vavu, yedzi ebandaka busu ne utse Zeluzalemi.
29Ndili ye Zezu ekalwe kone membuka mole Betafazi ne Betani, kone kudzi ye kumvu ye ŋwili ŋwen Olivye, tima ye bebingi bedzi Zezu aluma bebingi bole libusu. 30Wangu atanda ne bangu ati: «Tsekayi se mbuka yidzi busu ve beyi. Ndili ye beyi bikalwe, beyi beyenele bodzi ye kumvu ane bakuta. Bodzi yayu muutu asande bita kule yangu. Nyangulayi, yakayi ne yangu wa.» 31Muutu ti asuŋwule beyi ati: «Ye beyi binyangule yangu ni yi?» Tandayi wangu ati: «Kuŋwu adzi ne unyingu.» 32Bebingi be Zezu bole batse, bayene mamvu mesi nda Zezu etanda bangu. 33Ye bangu bedze ne nyangule bodzi, bekuŋwu basuŋwule ne bangu ati: «Ye beyi binyangule bodzi ni yi?» 34Bangu bakalʉle ati: «Kuŋwu adzi ne unyingu.» 35Ye bebingi bebapa bodzi kwele ye Zezu, basatse mikanda kule bodzi, ye bangu betedze Zezu kule yangu. 36Ye Zezu edze ne tsindene, batu bedze ne yalaka mikanda se peyi busu vedzi. 37Zezu adzanga se peyi yi sundaka se Kudzi ye kumvu ŋwili ŋwen olivye. Unkuka ŋwen bebingi bedzi ŋwesi ŋwen dze se itsisa dzi neni. Ne ukumise Nzambi ne singa yesi utsina ne mamvu me neni me bangu beyene. 38Bangu bedze ne tanda ati:
«Yayu Nzambi akaba meve ne Kani wi ya ne kumvu ye Kuŋwu!
Itavu se ikulu ne likuma ne Nzambi widzi ikulu amene.»
39Ndili mene yayu va batu be Falizi bedze se unkuka, ne Zezu ati: «Kuŋwu tanda ne bebingi bowe beloŋwen.» 40Zezu akalule ne bangu ati: «Me tanda beyi, bangu ti baloŋwen, memanyan me wulele misima.»
Zezu alila utsina ne Zeluzalemi
41Ndili ye Zezu etsindene kone ngundu, wangu ayene ngundu, yedzi elila utsina ne yangu. 42Zezu ati: «Zeluzalame, loloyi batu bowe bebiki yiba nda bikobise itavu. Ni dzangu dzedzi ni isole bangu nde tuka yene. 43Ni ndili yetse ya, ye batu biwunda we, bitse tunga baka ne ulwanise we. Bangu betse dzendze we me kwele mesi. 44Bangu betse nyunga we, nowe ne batu bowe. Bangu nde tse dzika we imanya tine dzotu kule dzoko, nowe eke yiba ndili ye Nzambi eya, ne uyamene we.»
Zezu apanza besumbisi se ndaku ye Nzambi
45Zezu anyindzile se ndaku ye Nzambi, apanza besumbisi. 46Wangu atanda ne bangu ati: «Se Iwowe dze Nzambi.» Nzambi ati:
«Ndaku yami yedzi ni ndaku ye umbondu.»
Ni beyi, bayikule yangu ndaku ye beyiibi!
47Zezu edze ne ulakise masi mesi se ndaku ye Nzambi. Yedze ne bekuŋwu be bekabi be bisemi bye Nzambi, ne belakisi be bitsila bye Nzambi, ne bekuŋwu be Bezwifi. Bangu besi befumba nda bangu bibuuma Zezu. 48Ni bangu nde yiba nda bangu bipika wangu, utsina ne batu besi bedze ne yuka wangu ne uyimvu vesi.
Trenutno izbrano:
Luk 19: WUM
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES