Luk 15
15
Ngana ye muutu we kundzile ndonvene yedzi ye nyongo
1Betolingi be bedolo, ne batu bidzi ne mesumu, besi baya kwele ye Zezu ne uyuka mamvu medzi iwowe. 2Batu be Falizi ne belakisi be bitsila beyene vavu, ye bangu bepanda Zezu ati: «Muutu yu adze bane batu bidzi ne mesumu, adza ne bila kone bangu.» 3Ye Zezu ete bangu ngana ati: 4«Ti muutu motu tima ye beyi, adzi ne bindonvene meku metanyi ne menayi ne bindomvene iku, yotu ti ya nyongo, wangu nde tuka dzika bindomvene meku metanyi ne menayi ne bindomvene bitanyi ne binayi se mekuba ne utse fumba yotu ye me nyongo nzii nedzi ikudzile yangu? 5Yedzi eyene ndonvene atsisa. Yedzi etumbidze yangu asatse kule idzuku.» 6Yedzi etse ndaku, abanga bembatsi ne bidzi kone dzi ati: «Yakayi bebe betsisa, ma yene ndonvene yami ye nyongo.» 7Me tanda beyi: «Yedzi ni vavu, ndili ye muutu widzi ne mesumu, imekidze Nzambi, Nzambi adzi se itsisa dzi neni, itsisa dzedzi dza takwe dze batu meku metanyi ne menayi, ne batu betanyi ne benayi bidzi telee, bamana mekidze Nzambi. Ne bangu baya nde dzamvu ne uvele mekidze Nzambi.»
Ŋwatu akobise dolo wedzi we nyongo
8«Ni ti, ŋwatu motu adzi ne bedolo bedzi iku, dolo motu ti anyongo, wangu nde takise ibamvu, akombo ndaku ne ufumba, nzii nedzi ikudzile dolo we me nyongo?» 9Yedzi ikudzile dolo, wangu ne bembatsi ne bidzi kone dzi ati: «Yakayi betsisa ma yene dolo wami we me nyongo.» 10Me tanda beyi: «Yedzi ni vavu, ye muutu motu widzi ne mesumu imekidze Nzambi, yedzi ne itsisa tima ye betuma be Nzambi.»
Ŋwana we nyongo bakudzile
11Zezu avele tanda ati: «Muutu motu edze ne baana beme mebaka bole.» 12ŋwadzi atanda ne tata ati: «Kaba me dzami ikavu dze uŋkobo.» Ye tata ekabene uŋkobo tima ye baana bole. 13Tata amana kabaka uŋkobo, va masi masuta, ye ŋwana we ibaka we unte esumbise ŋwedzi uŋkobo ŋwesi, aboko bedolo atse ne bangu se ilongo dzoko dze ulayi amene, awawu, wangu amana bedolo besi ne utsala. 14Ndili yedzi emana tsala bedolo besi, pinga yi neni ya kwa se ilongo dzadzu, wangu edze aya se unyingu. 15Yedzi etse dzanza kwele ye muutu motu we ilongo mene, muutu mene aluma wangu se mekuba ne utse bata bingu. 16Wangu afumba dza bila bye bingu, ni banyima wangu byangu. 17Yedzi etsimene se unlima ŋwedzi ati: «Tata wami, bedzanzi bedzi, bedzi ne bila biyitsi, bedza nda bangu bitondo, ni me wuya, me waa ne me nzala! 18Uve ma vutse kwele ye tata wami, ti ma kalwe wawu, me tanda wangu miti, tata, ma pika mesumu busu ve Nzambi ne vowe. 19Medzi kaka telee ne uvele dze ŋwana wowe. Bata me nda bedzanzi bowe.» 20Yedzi etsimene vavu, yedzi etelime ne uvutse kwele ye tata wedzi. Tata ayene wangu asa ne ulayi ne ndaku, ye tata eyene wangu tsesi. Tata atse ne mbangu, asanzile ŋwana yoloo. 21Ŋwana nedzi ati: «Tata wami, ma pika mesumu busu ve Nzambi ne busu vowe, medzi kaka telee ne uvele dze ŋwana wowe.» 22Ni tata ne bedzanzi bedzi ati: «Yakayi wangu ne linga yotu yi nve mesadzi, mesadzi, swisayi ŋwana wami. Somayi wangu lingasi se unlemvu, ne bekotoko se mekulu. 23Yakayi ne ngombo wa nwongo, buumayi ngombo wayu. Bebe bepika itsinda, bedza ya bebe betsisa. 24Utsina ne ŋwana wami yu edze awaa, anyuse, edze anyongo, bayene.» Ye bangu bebanda itsinda. 25Ndili mene yayu ŋwana wedzi we wika we ibaka edze ni mekʉba. Yedzi eyinga mekʉba, atsindene kone ndaku, ayuka batu bebina itsinda. 26Wangu abanga undzanzi motu, asuŋwule wangu ati: «Misuta kwele ye ndaku ni me nza?» 27Undzandzi nedzi ati: «Ŋwandzi wowe aya vʉtse, tata wowe abuuma ngombo wi wongo, ne ŋwana wedzi me ye vʉtse yebini. 28Ye ŋwana we wika ekamve, alewe nyinzile se ndaku. Tata apula ne ubondoko wangu ati, yaka nyinzile se ndaku.» 29Ni ŋwana we wika ne tata ati: «Me wedzi nowe wa bisiwu, ne bisiwu me pika dzanza dzowe, ma sa nde lewe dzowe iluma me pika. Ni we sa nde ne kaba me ŋwana taba, witi me tsisa besu ne bembatsi bami. 30Ni ye ŋwana wowe yu meya, we me tsala we bedolo besi ne baatu be bifwati, wa buuma wangu ngombo wi wongo.» 31Ye tata ekalʉle nedzi ati: «Ŋwana wami, we dzika benu wa masi mesi, byami byesi ka byowe. 32Uve bebe bapika itsinda, batsisa utsina ne ŋwadzi wowe yu edze awaa, wangu anyuse. Wangu edze anyongo, bakudzile.»
Trenutno izbrano:
Luk 15: WUM
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES