Luk 11
11
Zezu alakise bebingi bedzi nda bibondo
1Vusa votu, Zezu edze ne ubondo. Ndili yedzi emana bondo, umbingi wedzi nedzi ati: «Kunwu, lakise besu nda bibondo, nda Zambatisi elakise bebingi bedzi.» Zezu ne bangu ati: 2«Ndili ye beyi bibondo.» Tandayi tuu:
«Tata we besu,
kumvu yowe yedzi umpende.
Pika witi batu besi beyiba we!
Luma Ukani vowe ve sunda se sendze.
3Kaba besu bila masi mesi.
4Boloko besu mesumu,
nda besu biboloko batu besi bipika besu mamvu mebi.
We nde dzika Satan amaama besu.»
We me dzuka abomo
5Zezu avele tanda ne bebingi bedzi ati: «Me mikise ne utanda beyi dzamvu dzi, wedzi ne umbantsi wetse kwele yedzi tima ye pindzi.» We nedzi witi: «Umbatsi wami, bikise me pembe isatu. 6Umbatsi wami aya sombo yami, ayinga undzunga ni me nde yila yami ikaba wangu.» 7Ni toko umbatsi wowe atuka kalule we se ndaku ati: «Dzika meto! Ma mana dziba ndaku, besu ne bana bami baya bembula. Mende tuka nyuse ne ukaba we pembe.» 8Me tanda beyi umbu amene, dzakene wangu ti nde nyuse ne ukaba wangu pembe ne umbatsi ve bangu bole, wangu atse nyuse ne ukaba wangu byesi byedzi idzuka, nedzi idzuka unkomo. 9Yami itanda beyi miti: «Dzukayi, betse kaba beyi. Fumbayi, beyi betse kobise. Dzumidzayi, betse dzuvule. 10Yayu, widzuka abomo, wifumba akobise, bedzumvele ni widzumidze.» 11Wangu tata wikaba nwana tadzi, ti nwana adzuka wangu swi ni nza? 12Ndili ye nwana idzuka tata ibi, wangu atuka kaba nwana dzinga? 13Beyi batu bidzi ne ma nvu mebi, beyi beyiba kaba bana be beyi bila bive. Ni yanga ne Tata we beyi we ikulu nde tuka kaba Fudzu ye Umpende ne bisunwule wangu!
Zezu asaka tsina
14Vusa votu Zezu apanza umbiti nwen dzika mutu tsina. Ndili ye umbiti nwen pula, ye mutu mene ewowe. Batu bedze wawu bakima. 15Ni boko ati: «Belezebule kunwu we mimbiti ni wikaba Zezu singa ye upanza mimbiti.» 16Boko bafumba dendise Zezu unla nvu. Bangu nedzi ati: «Pika dzamvu dze likimiyinda, yayu beyiba ati, Nzambi ni we meluma we.» 17Ni Zezu ayiba metsimini me bangu, wangu ne bangu ati: «Ndili ye batu be ilongo dzotu bilwana ibadzi tima ye bangu, ye ilongo dzadzu dzitsalumve, ye ne mendaku minawenge kule moko. 18Beyi betanda ati, Satan ni wikaba me singa ye upanza mimbiti. Ni ti yadze vavu, singi Satan akilwana ni nedzi mene, ni ka ilongo dzedzi dzetse tsalive. 19Ni Satan takaba me singa ye upanza mimbiti, yayu wikaba bembatsi be beyi singa ye upanza mimbiti niza? Yangu ni ye bembatsi be beyi mene bikwise beyi mikwaka. 20Ni me, wikaba me singa ye upanza mimbiti ni Nzambi. Yayu Ukani ve Nzambi va kalwe tima ye beyi.»
21Ndili ye mutu idzi ne singa, abata ndaku yedzi ne saka ye ibadzi, nde mutu wibetime ne untamvu nwedzi. 22Ni mutu witakwe wangu singa taya anyindzile se ndaku yedzi, ta takwe wangu singa, aboko wangu saka ye ibadzi yesi, yedzi edze ne ivukidze, akabaka ne untamvu nwedzi nwesi nwedzi eboko.
23«Mutu we nde ibila nami, adzi ne mbele yami. Mutu we nde kobise me ne ukukise batu, wangu ni witsala bangu.»
Umbiti nwaya vutse
24Ndili ye umbiti nwipula se nyulu ye mutu, ye nwangu nwitse se ikanye ne ufumba buma ye nwangu wisolime. Umbiti ti nwakekobise buma, ye nwangu nwitanda ati: «Mevutse se ndaku yami edze ne kala.» 25Yedzi ivutse, akobise ndaku bayebise, ndaku yaya tselele. 26Yedzi itse boko mimbiti myoko untsami mitakwe wangu ka mve. Ye myangu minyindzile se ndaku, ye mimbiti midze wawu. Yumana vavu, ye ubedzu ve mutu wayu vitakuse ve wika uneni.
Witakwe itsisa niza?
27Ye Zezu ewowe vavu, nwatu motu apulene tima ye unkuka nwen batu, awowe ne singa ati: «Itsisa ne nwatu we dziya we, we nywise we ibele.» 28Ni Zezu akalule ati: «Tanda witi, itsisa ne batu biyuka iwowe dze Nzambi, ne bikuuna wangu.»
Zezu alewe pika dza nvu dze likimiyinda
29Mikuka mineni mya ya kwele ye Zezu, Zezu ne bangu ati: «Batu belolo ba, baya ni batu bebi, bangu befumba yene mamvu meneni. Ni dzamvu dze likimiyinda dze bangu bitse yene si dze Zonase Mutu we Nzambi. 30Nda Zonase edze ndimvu ye batu be ngundu ye Ninive, yayu we yikwene Mutu atse dze ni ndimvu ye beyi batu belolo. 31Yayu vusa ve umpami, kani we nwatu we ilongo dze doko atse telime busu ve batu belolo ne upita bangu. Wangu aya kwele ye ilongo dze sele ne uyuka mamvu me ukani ve Salomon iwowe. Awa yedzi ne mutu witakwe Salomon. 32Batu be Ninive bedzika ma nvu mebi ni ne bangu beyuka Zonase. Ni awa yedzi ne mutu witakwe Zonase. Yayu ndili ye Nzambi itse pama batu, batu be ngundu ye Ninive betse telime busu ve batu belolo ne upita bangu. 33Ndili ye mutu itakise ibamvu kaka ne usodze, ne ne usomo sina ye lunga. Ni wangu atakise dzangu ni ne udzika ikulu, yayu ti batu banyidzile se ndaku bayene kwalala. 34Misa ni ibamvu dze nyulu ye mutu. Ndili ye misa mowe medzi umve, ne nyulu yowe yedzi si umve. Ni misa mowe ti madze ubi, ne nyulu yowe yedzi si ubi. 35Yayu, pika kebe toko ibamvu dzowe dzadze yututu nda se pindzi. 36Ni nyulu yowe ti yadze kwalala nde yila ye yututu, yangu yesi yedzi ni kwalala nda ndili yowe idzi se ibamvu kwalala amene.»
37Ye Zezu emana lakise mutu we Falizi abanga Zezu ne utse dza bila se ndaku yedzi. Zezu anyindzile se ndaku yedzi, ye Zezu esunda untsitsi ne udza bila. 38mutu we Falizi akima ne Zezu edza bila nde swaka meboko. 39Ye Zezu etanda nedzi ati: «Beyi batu be Falizi, beyi beswaka bikopi ne bipele si ituna ni se milima mye beyi, beyi beyiba si pika mamvu mebi.» 40Beyi nde yuka tine dzotu, Nzambi awanga nyulu awanga ne unlima. 41Kabakayi be minvuvu bidzi se bikopi ne bipele bye beyi, yayu bye beyi byesi bye tse dze tselele. 42Ni ayi ndoko ne beyi batu be Falizi! Beyi bekabene mebuku iku me minyimbi ne bendzumba ne metsangi ye beyi bikaba Nzambi ikavu dzotu. Ni beyi bedzimbise umpami ne itondo dze Nzambi. Tadzi beyi bebanda pika ni vavu, ni beyi nde dzimbise byoko.
43Ndoko ne beyi batu be Falizi! Se mendaku me umbondu beyi betondo dze si se bibuma bye busu, ne beyi bitondo ati, benyusile beyi se bibuma bye mikuka. 44Ndoko ne beyi, ne beyi bidzi nda mesongo mende yene, ne batu belanda kule mangu nde yiba.
45Unlakisi we bitsila motu ne Zezu ati: «Kunwu yowe me tanda vavu, we me tukene wayu kani besu.» 46Zezu nedzi ati: Ndoko ne beyi belakisi bebitsila, beyi besunwule batu ne utumbidze udzulu, ni beyi nde ne tuka betime ne udzulu vavu tine ne unlenvu nwotu. 47Ndoko ne beyi, bitunga mesongo meve me Batu be Nzambi, ni bekoko be beyi ni bebuma bangu. 48Yayu beyi belaka ati, beyi bayakwe mamvu me bekoko be beyi bepika. Bangu babuuma Batu be Nzambi, ni beyi betunga ni mesongo me Bangu. 49Yene utsina ve Nzambi ewowe ne ukani vedzi ati: «Metse luma bangu Batu be Nzambi ne betuma, bangu betse buma boko, betse nyokile ne boko.» 50Ulave bewanga ilongo, babuuma Batu be Nzambi uyitsi, ni Nzambi atse sunwule beyi kuunvu beyi batu belolo. 51Bangu bebanda buuma wika ni Abele, ye bangu bebuuma ne Zakali se libuku le ndaku ye Nzambi, tima ye tsiya ye ndaku ye Nzambi ne liyi ye umpende. Ee me tanda beyi, Nzambi atse sunwule beyi kumvu, beyi batu belolo ne mamvu mesi. 52Ndoko ne beyi, belakisi bebitsila beyi badzuba peyi yi bapa beyi kwele ye Nzambi. Beyi mene beke binga peyi yayu, ni bifumba binga peyi yayu, beyi besimba bangu ne usuta. 53Ndili ye Zezu epula se ndaku, ye belakisi be bitsila ne batu be Falizi bekanve nedzi. Ye bangu bebanda ne ukaba wangu midzitsi miyitsi. 54Ni bangu befumba ni ndendise wangu unlanvu, ne upita wangu ne mamvu medzi ewowe.
Currently Selected:
Luk 11: WUM
Označeno
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES