Luk 4
4
Satan mama Zɛzi
1Usya Zɛzi ayengasa bya zowa ya Zudɛn, ajasa humɔn na Ekokoyi ya Pu, okate, ya yango yahongɛ ango bya bɔngɔ. 2O minya memboto menanyi, Satan amama ango. Mujasa nemba nemba ominya mɛnɛ mɛ, usya elɔmɔ mɛnɛ ya yekanasa ayɛnɛ za. 3Satan asɔhɔ neji te: «Ice ɔbɛ Mwana wa Zambe, sɔhɔkɔ na imanya jitɛ te ja akalwace pɛmbɛ.» 4Zɛzi ahungwɛ neji te: «Bamukwɛlɛ te: Ndonga ya moto ya yenge o maja okayi nde na mayɔkɔ ma Zambe.» 5Satan alwa neji ukwa ibete, ya ango ahɛlɛ ango ibujɛkɔ betomba bya mɔngɔ byahajɛ. 6Ya satan ahuwana bosɔhɔkɔ neji te: «Mewɛcɛ ɔbɛ pizo na tuma yetɛ yahajɛ na bokumani bwa betomba bitɛ byahajɛ. Imɛ wa bamuwɛ, ete mawɛ na wa manɔnɔ. 7Wɛnɛ ohuma mabɔngɔ o boho bwamɛ, ibɔndɔkɔ imɛ, bitɛ byahajɛ ibyɔbɛ.» 8Zɛzi ahungwɛ neji te: «Mangwɛli ma Zambe ma atanda te: Humaka mabɔngɔ na ibɔndɔkɔ ɔbɛ Zambe Ku ɔbɛ amɛnɛ, ete ojaza behaji byeji.» 9Satan ahuwana bolwaka neji bya Zɛluzalɛmi, ahacɛ ango ukwa mwaza mwa Elongwɛ ya Zambe, ya ango asɔhɔ na neji te: «Ice ɔbɛ Mwana wa Zambe, lɛbɛcɛ nyo bya hehe. 10Bosina te, bamukwɛlɛ te: “Etandaka na bosina bwɔbɛ na bangɛlɛ beji ikɔlɔkɔ ɔbɛ.” 11«Ibebɛpɛcɛ ɔbɛ o mabɔ mango bosina te oko watoko dumanga ɔbɛ na imanya.» 12Ya Zɛzi asɔhɔ neji te: «Mangwɛli ma Zambe tanda te: Teka mama Zambe wa Ku ɔbɛ.» 13Usya ango ahijɛsɛ imamaka Zɛzi na mayuwa mɛ mahajɛ, Satan amanya na neji, ibokaka iyate ekusi.
Bato ba cɛcɛ Zɛzi o betafɛlɛ ya Nazalɛti
14Okate, Zɛzi alumya bya Ngalile, tuma ya Ekokoyi ya Pu yajasa na neji. Bato ba sɔhɔkɔsɔ buce na bosina bweji o betafɛlɛ ya njenja mɔngɔ yɛ. 15Ahɛlɛkɛsɛ bya belongwɛ bya mebɔndu byango, moto wahajɛ akumɛkɛsɛ ango. 16Zɛzi ahunwana bya Nazalɛti o betafɛlɛ ya ango anɛnɛsɛ. Buya bwa iyɔkɔ ja ba-Zufi, akweya o Elongwɛ bya mebɔndu yajasa ibonwu jeji. Ya ango alanga Mangwɛli ma Zambe. 17Ya bawɛ ango buku wa Ezayi wa ntɔci. Ya ango ahundwa na ilanganka ekana ya te: 18«Ekokoyi ya Ku wamɛ Zambe yangutɛ na mɛ, amubɔnɔ mɛ bosina bwa itandanka mentende itundu ja mbɛ. Amuloma mɛ itandaka baji o menjoko te bepwa, na itandaka na baji na njimi te: Bye yɛnɛcɛ. Amuloma imɛ ipokwaka na baji o bonyeka. 19Na itandaka nkola mwa Zambe Ku wamɛ ehɛlɛcɛ bondonga bweji.» 20Okate, Zɛzi abungwa buku awɛ na njazi ya ango ahula hinsi. Bajasa o Elongwɛ ya mebɔndu bahajɛ mihɔn mango majasa ukweji. 21Ahula obotandaka bango te: «Mangwɛli ma Zambe ma byamuyoka mɛ majɛ obo bekubwɛcɛ, mwɛnhɛ.» 22Bahajɛ bakumɛsɛ okate bayecɛ na janga mwa bekana bya bondonga bya pwakasa o honko mweji. Ya bango basɔhɔ te: «Mwana otɛ, hɛbɛ wa Zozɛfi?» 23Zɛzi akalwɛ na bango na lembya te: «Mayeba te, byetɔbɔkɔ imɛ ekaneni ya te: “Nganga ajɛ na pizo ya ihakaka nyo eji amɛnɛ.” Byabihunwaka bolukwaka te: “Bɛhɛ beyoka beyaya byomubeka bya Kapɛnahumi, bekaka yumɛnɛ usatɛ, o betafɛlɛ ɔbɛ amɛnɛ!”» 24Ahungwɛ na bango te: «Mombo matanda bihi, teka ntɔci mwa myalubwɛ o buka bweji.» 25Matanda bihi mombo te: «O sondi ya Eli yajasa na menkuwɛ buce bya Izahɛli, usya iko ja jibamasa o menkola mehanto ne luku, ya za ya inɛnɛ ya tuwa o mɔngɔ mwahajɛ. 26Okate, Zambe mulomasa Eli iyonjɛcɛ myango myahajɛ, nde, ka mɔkɔ mwaji bya betafɛlɛ ya Salɛta o mɔngɔ mwa Sidɔni. 27Na o sondi ya Elize wa ntɔci, yajasa na bato ba bejima buce o Izahɛli, nde ka mɔkɔ akungwanasa ka Nama moto wa Sili wa ba hakasa.» 28Bato bahajɛ bajasa o Elongwɛ ya mebɔndu ba nganya buce, usya bango ayokasa mayɔkɔ mɛ. 29Bahajɛ bayemwa, balwa hizɛ Zɛzi bya ipwe ja betafɛlɛ jaji na mbɔku mwa balongasa Nazalɛti, ya bango bahakasa ilɛbɛcɛ ango o ndɔngɔ. 30Nde akɔlɔ o panga bato na ilwaka.
Zezi ahaka moto aji na nkuku
31Zezi alwa bya betafɛlɛ ya Kapenahumi, yaji o njenja mɔngɔ ya Ngalile, o buya bwa iyɔkɔ ja ba-Zufi. 32Ya ango akweya o Elongwɛ ya mebɔndu na ihɛlɛcɛ bato iyɔkɔ ja Zambe, bato bayecɛkɛsɛ njanga mwa iyɔkɔ jango atandakasa, bosina te, «asɔhɔkɔsɔ na pizo. 33Okatɔ ya Elongwɛ ya mebɔndu, yajasa na moto ajasa na nkuku mwa bobe, ya ango apotanga yoce na pizo te: 34He! Yohaka na bɛhɛ nde? Zɛzi moto wa Nazalɛti! Omuya ihangaka bɛhɛ? Mango ayeba ɔbɛ, ojɛ moto wa Pu wa Zambe amuloma!» 35Ya Zɛzi apɛmɛ ango te: «Kanganka ete o pwa o nyo ya moto wɛ!» Nkuku mwalɛbɛ te moto mɛnɛ o hehe, o boho bwa bato bahajɛ, mwango te mwa pwa teka yucɛ ango. 36Bato bahajɛ te bayecɛ, okate ya bango atatuba o pangango te: «Mutɛ janga mwa iyɔkɔ nde? Moto otɛ asɔhɔ na menkuku mya ibebe na pizo na tuma myango te myapwa!» 37Ya bango balazɛ kuma ya Zɛzi o njenja mɔngɔ yahajɛ.
Zɛzi ayonjɛ membɛlu buce
38Zɛzi amanya Elongwɛ ya mebɔndu ikweyaka bya elongwɛ ya Simɔn, nyangwɛ wa mwaji wa simɔn ajasa na iwɛzi buce, ya bango ahimwa Zɛzi iyonjɛcɛ ango. 39Alɔkɔmɔ ukwa eji, na ipɛmɛcɛ iwɛzi, jango te ja manya ango na nyo, ibujɛkɔ, ango te ayemwa iwɛcɛ bango maja. 40Okate, utɔngɔmwe ja buya, bato bahajɛ bajasa na membɛlu, myajasa na bemba nganya bya menjanga-menjanga, baya na bango bya Zɛzi aji, ango te ahacɛ mabɔ meji ukwa membɛlu myahajɛ ihakaka bango. 41Menkuku mya pwasa o manyo ma membɛlu buce, mya potanga te: «Ɔbɛ Mwana wa Zambe!» Ya Zɛzi apɛmɛ bango, teka jika te ba sɔhɔce, bosina bwa ango ayebakasa te: Ajɛ Kilisite.
Zɛzi atanda iyɔkɔ ja Zambe o belongwɛ bya membɔndu
42Usya buya bwa bwayasa, Zɛzi apwa o betafɛlɛ, adambwa nyo ilwaka usya teka bato, lupu ja bato jahaka ango, usya bango akumɛsɛ ango, bahakasa ihimbaka ango, te ango teka maka patwa na bango. 43Nde asɔhɔ na bango te: «Yanyɛ malwa na binɛ beposi, itandaka itundu ja mbɛ, ja Etomba ya Zambe, nyangwa sina ya Zambe amuloma imɛ yɛ.» 44Okate, ya ango atandakasa iyɔkɔ ja Zambe o belongwɛ bya mebɔndu bya Zude.
Currently Selected:
Luk 4: KOQ
Označeno
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES