Dibandu 6
6
Nsambi amatabula diambu utsiemusa batu
1Ava batu bamabandila ufunanga va butamba na baana babagetu wandi bamaburungu, 2bisi julu bamalaba yiri baana babagetu beni bamaba baboti, bamabawela; mugetu yika la mugetu, bamasola aba bamaronda. 3Mbana Fumu amavosa rie: Ngosingisa batu ubanganga monyu mutubu mu mbari bavu yika batu kabogu yitsingu yiogu yiuba yika kama na magumabeji mabilima. 4Va temu eni nesi va temu ajimaduka, mikuimbi mimaba va butamba mu mbari bisi julu bamafubana yitsiga na baana babagetu babisi butamba bamabura baana nogu: abamaburu bamababangogaga abamadumusu va temu eni.
5Fumu amalaba yiri batu bamaviosulila ukebivisa; yilumbu na yilumbu bamatasanga yika uvaga mabi. 6Fumu amagabusa murima nsima mu mbari amasunda batu; amalaba tindi munyongu. 7Fumu amavosa rie: Nyutsiemusa batu botsu aba nyimasunda, ubanda na batu te na biruitsi na bilandila na batsoli; mbe nyisamabasundanga mbe diwelimina. 8Tumba Fumu amalaba ubueji na Noe.
Nsambi amatabula diambu uwaka Noe kalala
9Ayiyi la yilombi yiNoe. Noe amaba dibaala disungama na amaba asigama va gusu Nsambi uviolila babaala botsu batemu andi; Noe amaba na murima umosi na Nsambi, 10Noe amabura baana bababaala barieru: Sem, Cham na Japhet.
11Nsambi amalaba yiri dibi dimabasa butamba buotsu na bango dikasi bamafunanga. 12Nsambi anogengila butamba amabulaba nsoruru: batu botsu bamakebivisa. 13Mbana Nsambi amatsingula Noe rie: Menu nyimatabula diambu utsiemusa batu botsu mu mbari bamabasa butamba de na dikasi diogu, nyubatsiemusa va mosi na butamba. 14Gomina dikumbj dimamba na tsimbi tsiwelimina na mamba, gukagaba dionyi mu bibuku na gukadisinga maka o gari no julu. 15Gulu nana gudigominina: usakama udikumbi uba kama na magumaranu mametera, uroga udionyi uba magumabeji na matera yiranu, na udonga udionyi uba yigumi na metera yiranu. 16Muna dikumbi dieni gukavaga fenetera aji gutoba o julu muansa, jionyi jiuba yibuku yimetera; gukavaga munu ndagu umosi buandi; gukavaga kilingu yirieru. 17Meʼ beni nyubasa butamba nyidu ajiutsiemusa biotsu abivu va butamba; biotsu abivu vabutamba biufu. 18Tumba nyuvangana pangini nagu. Ndeʼ gukota o dikumbi dimamba jenu na baana bagu bababaala na mugatsi agu na bagatsi babaana bagu. 19Gukotisa biotsu abivu monyu wandi, diwendi rie: bibeʼ bibeji biyibulu yibulu, yibusi na mulumi yiri bigotsiemuga. 20Na minongu miotsu mibatsoli, na minongu miotsu mibiruitsi na minongu miotsu mibilandila, bibeʼ bibeji bimunongu munongu biukota nagu yiri bigotsiemuga. 21Gukaromba minongu miotsu mibiguji nobisuega o dikumbi dimamba, abina dujanganga jenu na bibulu. 22Noe amadugusu motsu ama Nsambi amamuruma.
Currently Selected:
Dibandu 6: PUU1992
Označeno
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.