Luk 20
20
Jisu Kekuo Dze Ketsokecü
(Mat 21:23-27; Mark 11:27-33)
1Siro puo khunhie puo rüsuokiu nu mia petha tsiu dieliekeviu pupie mia kie keba ki, zievokezhako mu thezhokepethakoe phichüko ze di vor, 2di sie puo ki, “No kedipuo kekuo se mha hako chüya ga? Siro supuonie kekuo hau pie n tsü ga? Hie ki pushücie.” 3Sitse puo uko ki, “A rei nieko ki mhapuo ketsotuo, a ki pushücie: 4Johan mia dzülukepfüu teigei nu mo themia kinu vor ga?” 5Sitse uko donu die süu kepu di sie, “Mhanuü we ‘Teigei nuwe,’ sishü ro, puo sie, ‘Siliro nieko kiüdi puo pelelie mo ga?’ sitie. 6Siro we sie, ‘Themia kinu zo,’ ishü ro, themia pete ketsie pie u vatie, ukoe Johan üse siedzekesimia puo ücü pele touketa la.” 7Sidi uko sie puo kirapuo nu vor shikecü si mo üta. 8Sitse Jisu uko ki, “A rei kedipuo kekuo üse mha hako chü tuo shicü se nieko ki pulie lho,” siwata.
Lieciemia Kerüzhü Kroko Dievi
(Mat 21:33-46; Mark 12:1-12)
9Süsie puo dievi hau pie themiako ki pushü: “Mia puo khubelietsa puo ciepie zhü di süu pie mia penyiewa di rüve rüna kepecie puo nu vo tuo cha phita. 10Siro puotei vorlie tse puo lieu nyie kebako ki khubesi puoya meseko kenguketuo la puo kituomia puo ketseshü, derei lie nyie kebako süu vüwa mu mhapuorei pie puo tsü mo di puo ketsewa. 11Süsie puo kituomia kekrei puo ketse lashü; derei süu rei vüwa mu puo bie kethengashü tsiu mhapuorei pie puo tsü mo di ketsewa. 12Süsie rei puo mia seu ketse lashü, hau va rei uko puo bie kerüzashü di puo whuowa. 13Süsie khubelie niepuu sie, ‘A kedipuo chü ro vi ta? A a nuo a khrieu ketseshütuo; siro uko puo sü rhulie rei si mo,’ idi lelie. 14Derei lie nyie kebako puo ngushü mu uko kerüchü di sie, ‘Hauha kayieute; úko puo dukhriwa khe, sitse puo kayieko u vie chülietuo.’ 15Sidi uko puo teshü khubelie nhaphie pra di puo dukhriwa. Siliro khubelie niepuu uko gei kedipuo chütuo ga? 16Puo vor di lie nyie kebako pekawatuo, sidi puo khubelieu pie kekreimia tsüwatuo.” Siro uko hau sishü tse, uko sie, “Kenyüthor mu!” sita. 17Derei puo uko mehoshü di sie,
“Ki kechüko khawaketa tsieu,
süu puo ke nu tsieu#20:17 Moro ketsie kemeyietho-u. chüte,
idi thupie kezhüu ca kedipuo ga?
18Kehoupuorei te ketsie süu gei ketsuu kesetshie phawatuo; tsiu süu kehoupuo gei tsu rei süu vütshie pie nyophe chüwatuo.” 19Süki thezhokepethako mu zievokezhako puo uko petsou di dievi süu kepu lelie tse puo telietaketuo leta, derei uko themiako preita.
Khezhanuo Khakeshü Dze Ketsokecü
(Mat 22:15-22; Mark 12:13-17)
20Süla uko puo rü di puo die geinu puo telie di khapie kekuokeseko mu ahng dzie nu shüwaketuo la mha rieketuo kro puo ketsepie u bu kemiatho mevi chü di vo. 21Sitse süko puo ki, “Kepethau, hie no kemezhü touu pie petha tsiu mia puo gei rei n nei si kreiya mocü si ba, derei Ukepenuopfü cha ketho-u pie pethayakezha si. 22Hie Kaisar khruo khruokecü thezho mo mo ga?” 23Derei puo uko do silie di uko ki, 24“Denari puo pie a pekieshücie. Süu gei supuo tsü mu supuo za thupie tuo ga?” Sitse uko sie, “Kaisar zo.” 25Sitse puo uko ki, “Kaisar vieko pie Kaisar tsüwalie, mu Kepenuopfü vieko pie Kepenuopfü tsüwaliecie,” sita. 26Süki uko themiako mhodzünu puo dieko la puo telie lhota, tsiu puo uko die kelakeshüko la uko ngopfü di kemekrie zeita.
Kesiamia Rheilakesie Dze Ketsokecü
(Mat 22:23-33; Mark 12:18-27)
27Siro themia kesia nunu rheilasielie lho üyakezha Sadukiko huo vo puo ketso di sie, 28“Kepethau, Mosa hie la thupie kezhü mhanuü mia puoe puo kimia nyi derei puo nuo jü di siata ro, puo yie bu tuolieketuo la puo siezeu bu süpfü lietuo üshü. 29Siro siezedzürie thenie tuoya ru phichütho-u kiyalie mu puo nuo jü di siata; 30süsie kenieu 31mu mia seu bu rei süpfü lie ru sükemhie mia thenieko pete rei u nuonuo jü di sia phreta. 32Sidi kenuotsa thenupfü rei siata. 33Siro rheilakesie nhie thenu süpfü bu supuo kimia chütuo ga? Mia thenieko süpfü lie phre zocü la.”
34Sitse Jisu uko ki, “Tsiedo kelhouko ha kiya mu nyhü ituoya; 35derei kijü luu nu volie keviko mu kesia nunu rheilasieketuoko kishükiya chülie lho. 36Siro süko sia lalie kenjü, kekreilamonyü uko teigeidieliemia mhie zo mu rheilakesie nuonuokocü la Ukepenuopfü nuonuo reita zo. 37Mosa zorei kesiamia rheilasielieyakecü tha kemecieshü zo, seinyho puo dzeu nu ngukelie puo Niepuu üse Abraham Kepenuopfü, Isak Kepenuopfü mu Jakob Kepenuopfü üdi pu zo. 38Siro puo kesiako monyü kerheiko Kepenuopfü zo, kekreilamonyü süko pete puo la rhei ba zocü la.” 39Sitse thezhokepethako huo sie, “Kepethau, no pu touwata zo,” sita. 40Kekreilamonyü uko puo ki mha ketso sa michieketa la.
Messiah Dze Ketsokecü
(Mat 22:41-46; Mark 12:35-37)
41Siro puo sie uko ki, “Kiüdi mia Khrista üse David nuo üdi pulie vituo ga? 42Kekreilamonyü David thuo zorei Chieliko leshü nu pukeshü:
‘Niepuu sie a Niepuu ki,
“No a zatsa ba zolie,
43a n ngumvüko khapie n phi khro shüwa kemochie,”’ isi zo.
44David rei puo üse Niepuu üdi puo kie ro;
kikidi puo üse puo nuou ülietuo ga?”
Thezhokepethako la U Kireilienukecü
(Mat 23:1-36; Mark 12:38-40)
45Siro themia peteko puo die rünyü ketha nu puo sie pethakelieko ki, 46“Thezhokepethako gei nie kireiliecie, uko u pfhenei rütshuse-icü se di tuo whiketuo u neiya, tsiu lhithochüko nu mia bu uko kelu nyüya, tsiu uko sinagogko nu theba kerükrieko nu ba nyü, mu thehethehieko nu therhubako nu ba nyüya. 47Uko samipfümia kiko peka cü tsiu puo meviva di cha pecha tuoyakezha zo! Uko mia ki rei u kepejo rekuotuo.”
Currently Selected:
Luk 20: ANBRBSI
Označeno
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More