Johan 5
5
Rüzie Khieki nu Shürhokelieu
1Mha hako sie Judako nyi puo la Jisu Jerusalem nu kho.
2Jerusalem nu Tekuo Kharu kepenuo rüzieu khieki kifü pengou sa chüpie ba, Ibri#5:2 Süu, Aramaik. die nu thechü süu za Bethesda#5:2 Leshü kewe huo nu Bethsaida. üya. 3Ki süko nu kechükenyümia, mhiciemia, phiyhomia, mu lasiamia kekra vo zhü di dzü mele kepar pfhe baya. 4Kekreilamonyü puotei huo nu Niepuu dieliemia rüzie nu tsur di dzü keboushüya, mu dzü pou lala kesier ki sünu lelie kerietho-u kechükenyü kehoupuo nunu rei shürholietaya. 5Süki cie serethetha mhachü tuoketamia puo rei zhü. 6Jisue puo sünu kezhü ngu mu puo si zhü cha phiketa silie di sie puo ki, “No shürholie nyüya me?” 7Sitse mhachükezhüue puo ki, “Kezhau, dzü pou lala kesier ki miapuorei a pie le rüzie nu shüketuo ba molie, mu a sünu letuoü kesieki kekreimia a mhodzü letatayalie.” 8Jisu sie puo ki, “Sielie, n zhükhra pielie di tuoshülie.” 9Sitse themiau vilieta; mu puoe puo zhükhra pielie di tuolieta.
Sünhie sabat zha. 10Süla Judako shürholieketau ki, “sabat nhie ha no n zhükhra chüpie di chatuo ketuo hau thezho-u varhuote.” 11Derei puo uko ki, “Mia puo a chü keshürhokeshüu a ki ‘N zhükhra chü pielie di tuolie,’ idi pulie.” 12Sitse uko puo ketso di, “N ki, ‘Süu chü pielie di tuolie,’ ikeshüu supuo ga?” 13Derei themiau süu supuo shi si mo, Jisue tuo themia krodiu donu leketa la. 14Süsie Jisu rüsuokiu nu themia süu ngulie di puo ki, “Harie, tsie we no shürholiete; mha kesuo n gei vor sakecü keprei la kephouma chü sa hietacie,” sishü: 15Süsie themiau vo di Judako ki Jisue puo chü keshürhoshüketa pushü. 16Süla uko Jisu petsou vüta, kekreilamonyü puo sabat nhie mia chü pevikeshü la. 17Sitse Jisu sie uko ki, “A puo tsie ha rei mhachü ba zo mu a rei mhachüya,” sita. 18Puo hau pukeshü la Judako puo dukhriwaketuo le kechü sata; puo sabat zho-u varhuokecü zomonyü Ukepenuopfü ü puo Puo üdi puo thuo puoü Ukepenuopfü ze ketouketa la.
Nuou Kekuo
19Süla Jisu uko ki, “A nieko ki ketho-u puya; Nuou puo thuo zowe mhapuorei chülie kenjü; puoe puo Puou kedipuo chü ba ngu shiü süu rübei chüya; Puou kedipuo chüya shi, Nuou rei sükemhieko chüyacü la. 20Puou, Nuou khrieya mu puo thuo chüyakezhako pete thapie puo kieya, siro nie bu nie ngolieketuo la puo hako ki rei mhatho zhakuocü thashü puo kietuo. 21Puoue kesiamia chü perheilie di kerhei khapie süko ketsü tuoi, Nuou rei kerhei khapie puo medomia tsüya. 22Sütuoi Puoue miapuorei capi chüya mo, derei capi chüketuo kekuo pete pie Nuou tsüwate. 23Sidi mia bu Puou rhuyakezha tuoi, Nuou rei rhulieketuo la. Kehoupuorei Nuou rhuya kemo-u puo ketsekeshü Puou rei rhuya mo. 24A nieko ki ketho-u puya, themia kehoupuorei a dieko rünyülie di a ketsekeshüu pelekeliemia kechachie kerhei bate, mu sümia pejoketuo ba sa mote, derei kesia cie kerhei nu prate.
25“A nieko ki ketho-u putuo, puotei puo vorzhie; mu süu tsieta zo, kesiako Ukepenuopfü Nuou pfhe silietuo, mu sikelieko kerhei ngulietuo. 26Puoue kerhei puo nou ketuo tuoi, Nuou bu rei kerhei puo nou tuolieketuo Puoe khashüwate. 27Tsiu puo Nuou bu mia capi chüketuo kekuo khashüwate, kekreilamonyü puoe Themia Nuou zocü la. 28Hau la nieko ngota hie, u mekhru nu kezhüko pete puo pfhe silietuo. 29Sidi partatuo, sidi mha kevi kechüko rhei sie kerhei nu votatuo, mu mha kesuo kechüko rhei la sie u pejoketuo nu voketuo tei vorzhücü la.
Jisu Zhapuko
30“A a thuo zowe a medo nu mhapuorei chülie kenjü. A sikelie kemhie se mia capi chüya, mu a mia capi kechüu puotou zo, kekreilamonyü a a thuo a medo chütuoü monyü a ketsekeshüu neiu chütuo üya. 31Mhanuü a thuo a zhapu chüya ro, a zhapu die süu ketho mote. 32Derei a zhapu chüyacümia puo ba, mu puo a dze kepu süu ketho zocü a si ba. 33Nieko mia ketsepie Johan ki shü, mu puoe ketho-u zhapu chüshü. 34A themia kinu zhapu se morosuo ükecüu mo, derei nieko kelalieketuo la a die hako kepu zo. 35Puoe tu keba mu zie keba mituu zo, siro nieko rei dokipuo puo kezie nu nie nei ba nyü sie zo. 36Derei a zhapu Johan zhapuu ki rei zhakuokecü puo ba; Puou a bu chü tseishünu di khashü a ketsü mhatho a chüyakezhako thuo Puou a ketsekeshü thashüya. 37Siro a ketsekeshü Puou thuo a zhapu chüya. Nieko zowe mhakipuorei puo pfhe si mo, mu puo rhiu rei ngu mo, 38Mu nie puo dieu pie nie nou shüse tuoya mo, kekreilamonyü niekoe puo thuo ketsekeshüu peleya kemo la.
39“Nieko kethodieko pfhü phrüya, kekreilamonyü nie süko nu kechachie kerhei ba ücü leyakezha la, mu süko a dze pu ba kethowe. 40Siürei nieko kerhei ngulieketuo la a ki vor nyüya mo. 41A themia kinu thetshepfü nyüya mo. 42Derei nie nou nu nie Ukepenuopfü kekhrie ba mokecü a si. 43A a Puou za se di vor zo, derei nieko a zelie mo, siürei mia puoe puo thuo puo za se di vor liro nieko puo zelietuo. 44Nieko huoniehuo kinu thetshepfülieya, derei Ukepenuopfü zokecüu kinu thetshe pfhüya moliro, nie kikidi pelelie vituo ga? 45Nieko a ü Puou mhodzüki nu nieko pejotuoücü le hiecie; nie pejokezha puo ba, süusü nieko puo khremerü kevor Mosa zo. 46Nie Mosa pele liro, nieko a pele rei zotieciü, kekreilamonyü puo a dze thushü zocü la. 47Derei nieko puoe thukeshüko peleya moliro, nie kikidi a dieko pelelietuo ga?”
Currently Selected:
Johan 5: ANBRBSI
Označeno
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More