Mâk 7
7
Yesù ə twe màʼà byiə kə inaʼ
(Matìyò 15.1-9)
1Abù kə ntsuk fə̀liy fiy aghee Falàsî nə̀ àghê tyi dee ulàŋ àliy ə ŋwò bə̀ a Yèlusalèm, dzəŋə bə̀ akə̀lə̀ Yesù. 2Ghu kòʼ tsə tsə̀təndii tə Yesù tə̀liy tiy ghu nyiə nəniy nə̀ ghu awo kə̀ sûw anə yiə byìə̀ kə inaʼ kə ghě Falàsî. 3(Aŋwòə aghee Falàsî nə̀ àghě Dzû yiy kə nyiə tsə̀ dzə̀ wày nə̀ ghu awo kə̀ twoʼò sûw dzwâb tsə dzə̂ anə byìə̀ kə inaʼ kə ghu kiy kə dzîy). Ghu kə ghî zəŋə aŋwòə ghu kə nia làŋ kə inaʼ kə ghu kə̀ wiy kiy. 4Ghu kə wày dzə ani nyi fyiə kə kə ŋwô bə̂ anə bekivən, nə̀ ghu kə̀ twoʼò sûw fyiə kə ghà kə̀ anə làŋ kə inaʼ kiy. Ghu nam kwu fwuli ndə̀mə̀ ùlàŋ ùliy wiy ghu kə nia tsə̂ nəniy, ani sùw tə̀bwam, nə̀ ntwà tìy, nə̀ ŋgùw tə̀ ghu zəŋi anə fyiə kə̀tsəə kiy, (nə̀ ŋkày mìy.#7.4 Uŋwàʼà ù liwiy kwe fwuli tsə; nə̀ ŋkày mìy.) 5Aghee Falàsî nə̀ aghê tyi dee ulàŋ wìy ə bəb yə̀ â Yesù nə̀ “A də̌ kìə̀ tsə̀təndii tiə̀ tìy də̀ nia way lâŋ kə inaʼ kə nə̀ tě ŋgàŋ ə səsə kə byiə̀ na nəniy. Ghu nyiə nə̀ ghu awo kə̀ twoʼò sûw anə yiə byìə̀ kə inaʼ kiy dzîy nəniy ə?” 6Yesù ə bə̀lì kə ghu nə, “Ghà də mə̀nə̀ nyi mbe imbè! Wè ntwùm ə̀ Kə̀zə̀ Ìzayà kə dzày kpe ŋwô anə yiə ù kə dzây zì na nəniy kwùmə̀ bə̀ nə̀ ghà, nə̀ Zə̀kìy kə dzày na nə̀. ‘Aghû yə̀ màŋə̀ fwùlə̀ kə miə anə ughùw u dzwə, nə̀ fôŋ tə ghu tiy kwuni də̀ a lòʼò tə̀ ŋwô tìy. 7Ghà fwulə̀ miə̀ kə̀ŋwôŋwô, aŋwòə ghà tyi dè kə ùlàŋ wə̀ aghê zəŋi nyiə̀ na nəniy, dzìy yəə à də̀ ulaŋ u Kəzə̀.’ ” 8Yesù dzày yə̀ a ghu nə “Gha kâm bàʼ na yə̀ ùlàŋ u Kəzə̀, ghà fə̂d tsìy tə̀ŋì yə̀ anə ùlàŋ wə̀ aghee mbyi ghu byiə̀ nyə̀ nəniy â ghà.” 9U dzày yə̀ a ghu nə, “Gha niyoŋə̀ twe myàʼà ùlàŋ u Kəzə̀ kwuni dzwùmə̀ yə̀ kə ulàŋ u inaʼ ghi. 10Tee a də̌ yiə yə Musîs kə twâ na nəniy nə̀, ‘Ghà kwu ani zuw yə awò nə̀ tè nə̀ zwə̂, Wù wə̀ ù dzày nəniy ayiə àbɛbə yiy â tè we, moo awò zə̂ we, ghu kwu ani wiy màʼà we.’ 11Ghà kwuni dziy nə̀, I dzwabə̀ ŋwò awò wù ani dzày yə̀ â tè we nə̀ zə̂ a we nə̀, ‘Kûku, mə way dzə ani fày wò, aŋwòə Mə mə nìy lâŋ kam kìy ani nyə̀ Kə̀zə̀ nə̀ fyiə kə Mə mə̀ kwu nəniy ani nyə̀ â wò.’#7.11 Fyiə kə mə nîy lâŋ kìy ani nyə â Zə̀kìy ghu tyoŋə nə̀ a də̀ kobàn. 12Yiə yə i də̀ nəniy ghii, ghà ə zəŋi nə̀ ghu kə fây dzə̀ə nə̀ təli ghu yiy nə̀ nə̀ zəə ghu yiy sòʼò. 13Ghà kwuni nìy bə̀ ùlàŋ ghi byɛbə myàʼà yə̀ dzə̀ ə̀ Kə̀zə̀ ate. À yù màŋ də̀ kə iyiə imòʼ anə ayiə yə ghà zəŋə nəniy, ndə̀m nam dòʼò səə ŋwô.”
Fyiə kə kə zəŋə wù ə də̌ wù ù dzə̂ wìy
14Yesù ə̀ kàm twoŋə dzəŋə na bə̀ ŋwaâ kə̀. U dzày tsə a ghu nə, “Ghà ə twoʼò fwiy kə utswuŋi ghii gha adzə̀m tə̀ ghà ə zuw kəli tsə ayiə yə mə dziy dzây. 15À wày dzə fyiə kə kə nyiə tswii yə̂ anə uwè u wû kə zəŋə nə̀ wù si dzəə anə sə k-a-zə̀, à də̀ fyiə kə̀ kə fyiə kwoʼo bə̂ anə fôŋə̀ wù kə zəŋə we nə̀ ù si də wù ù dzə̂ wìy.” 16#7.16 Uŋwàʼà ù liy wiy kwe fəli tsə nə̀. Wù wò ù kwù nəniy utswuŋi wiy, u zuw. Kòʼo anə 4.23 17Abù Yesù ŋwò tsə a kə̀lə̀ ŋwàâ kə̀ zù tsìy nyi yə̀ a ndaw, tsə̀təndii tə we tiy bəb yə̀ a we nə “Iyiə yə wò mə̀ dzây nəniy anə fəzə̀zə̌, i mə̀ myìŋə̀ nə̀ìndiə ə?” 18Yesù ə bəb tsə a ghu nə, “Gha mə̀ fə̀ kə zuw kəli sòʼò yə̀? Gha koʼò wày nə̀ à wày dzə fyiə kə̀ kə nyiə tswii yə̂ anə unìə̀ u wù kə zəŋə nə̀ ù si dzəə anə sə k-a-zə̀ yə̀? 19Aŋwòə kə nyiə zè dyòʼò dzə̀ wày anə fôŋ, kə zê nyiə dyòʼò anə kəmbə̀d, kə fyi ŋwò dyaŋi yə̀ anə məmfa zù dyaŋi anə kəghu.” I dê tsə nə̀ Yesù kə dzìy nə̀ ufânyiə ùliy wiy way dzə ù dzəə nəniy. 20U dzày tsə sòʼò nə̀ fyiə kə kə fyiə kwoʼo bə̂ anə fôŋ ə̀ wù, à də̀ kə ghe kə zəŋə nəniy nə̀ ù si dzəə anə sə k-a-zə̀. 21Aŋwòə ayiə àbɛbə yə àdzə̀m a ŋwô fyiə kwoʼo bə̀ anə fôŋ, ayiə yəə à də̀ kəlyiaŋi, nə̀ ùtsoŋ wiy, nə̀ ìwiy àghù yìy, 22Nə̀ ani nə̀ŋì tsə̀ nə̀ àghiy aghù yìy moo nə̀ àŋəmə aghu yiy, nə̀ isə ìduw yiy, nə̀ ani zəŋə ndə̀mə̀ ndə̀mə̀ tə ayiə àbɛbə yiy, nə̀ ìguw yiy nə̀ ani liə ani kəli ufyiə wə ùdzə̀m u də nəniy, nə̀ ghòʼ kìy, nə̀ ani dziy ayiə àbɛbə yiy anə utuw u ghù, nə̀ uwe ù kwoʼo wiy, nə̀ ani zəŋi ayiə àlyîlyaʼa yiy sòʼò. 23Ayiə àbɛbə yə àdzə̀m a ŋwô fyiə kwoʼo bə̂ anə fôŋ ə̀ wù, à də̀ ayiə ghè yə̀ a zəŋə tsə wù u də̌ wù ù dzə̂ wìy anə sə k-a-zə̀.
Ibɛmə i yiŋì kə̀ twum
(Matìyò 15.21-28)
24Yesù ə ŋwò tsə a Galìlî zù a mbwòʼ ə̀ ìlìy a kələ̀ Taylì. U zù tsìy nyi yə̀ a ndàw ìlìy yìy, u kə liə way nə̀ wù liy kəli nə̀ ghe də awote. Ghu nam kəli kə ŋwò nə̀ ù də̀ awote 25Wìyəŋi ùliy wà we ùyəŋi kə kwu nəniy nsìy mə̀bɛbə̀ miy anə ùwè, u zuw tsə loʼo kə Yesù də nəniy ate, bù awo, nyaʼa bə̀ a təŋə Yesù. 26Wìyəŋi ù ghè wə̀ kə wày dzə yəŋì Dzû, ghu kə byi we a Silìyà a mbwòʼ ə̀ Fùnisìyà. U bwoʼ kəwo â Yesù nə̀ ù zəŋi tsə nsìy mə̀bɛbə̀ mə̀ ŋwò fyi tsə azòŋə̀ wa we. 27Yesù ə bə̀lì kə a we nə̀ “Anîsə̂ kwu ani nyi kə dzə̀ isə. Aŋwòə i dzwâbə̀ dzə̀ wày ani nìy kə ufânyiə u nìsə̂ a maʼà yə̂ â bvwu tiy.” 28Wìyəŋi wə bə̀lì kə a we nə̀ “Ìsoŋì soŋì a Mwe ə̀ Mbyi, bvwu tiy namə kwumə nyiə tsə̀ ŋwò mbòʼò mə̀ ùfànyiə mə ìn tswaʼi dòʼò a təŋə ndàŋ ì nyiə̀ yìy abu anîsə̂ yìy nyiə nəniy.” 29Yesù ə dzày yə̀ â wìyəŋi wə we nə, “Wò də̌ ani zù a ndaw bòʼ ayiə yə wò dzày nəniy, nsìy mə̀bɛbə̀ mə̀ mə nyəli màʼa wa niə̀.” 30Wìyəŋi wə ŋwò zù a ndaw zù kòʼ yə̀ wà we ù nə̀ŋì doʼò anə ukày nə̀ nsìy mə̀bɛbə̀ mə̀ mə fyi ŋwò azòŋə we.
Yesù ə zəŋi taw kə wù lìy wìy ù kə kwôʼ doʼò, dzə̀ŋə̀ kè
31Yesù ə̀ kàm ŋwò fyi fwuli tsə a mbwòʼ ə̀ Tailè tsìy yə̀ anə inaʼ i Sidòn zù akə̀lə̀ ìŋwù i Galìlî a mbwòʼ ìlìy yə̀ ì kwu nəniy naʼà tìy ìvəm 32Ghu nìy bə̀ wù lìy, u kə kwôʼ dòʼò nəniy də̀mə̀ kè sòʼò ani dzə̀ŋì. Ghu bù nə̀ we bwoʼ Yesù nə̀ wokiy nə̀ ù gàʼ tsə kəwo azòŋə̀ wù ù ghè wə̀ tə̀ ù taw kə. 33Yesù ə nìy kə wù wə̀, nyəli màʼà tsə ŋwàâ kə̀, zù nə̀ we anə ukè, kwe nyi yə̀ àwiwo anə utswùŋi we, tsə tsə ntiə anə wà kə̀wo ə̀ we, mwàm yə̀ nɛm kə wù ùghà wə̀ ate. 34Yesù ə liay kwoʼ kə idoŋ an-a-vələ, ŋwò də̀m zwày kə, dzày tsə nə “Effatâ” i miŋə nəniy nə̀ “Fwiykə.” 35Utswuŋi u wù ghè wə̀ ə kaʼ tsə ani zuw. Nɛm kə we kiy kaʼ yə̀ sòʼò ani bwìy dzwàb. Wù ù ghè wə̀ kaʼ yə̀ ani dzə̀ŋi dzwàb. 36Yesù ə sə̀ŋì fyi yə̀ kə̀tswuŋi a ghu nə̀ ikwu ghu nə̀ dzîy iyiə i ghè yə̀ â wù lìy. Abù Yesù dzày tsə nəniy ghi, ghu fə̀d ndəmi tsə iwee ani dzày. 37Adzwə ŋge zwum aghê ghà yə̀ anə ayiə yə ghu kə zuw ayiə ghè yə̀. Ghu dzìy nə̀, “Yesù mə ŋgee zəŋi dzwàb anə ayiə adzə̀m; ù bòʼò zəŋi dyaŋi àghu yə̀ ghu də̀ way ani zuw, ghu kaʼ yə̀ ani zuw, zəŋi sòʼò à yuu ghu də̀ dzə̀ŋə̀ way, ghu kaʼ yə̀ ani dzə̀ŋì.”
Currently Selected:
Mâk 7: isu
Označeno
Deli
Kopiraj
Want to have your highlights saved across all your devices? Sign up or sign in
© CABTAL 2023