Génesis 21
21
Bix úuchic u síijil Isaac
1Je'el bix úuchic u séeb chi'itique', Yuumtzile' tu dzaj yóol u táan óoltic x Sara ca tu dzo'ocbesaj le ba'ax u ya'almaj ti'e', 2bey túuno' leti'e' x yo'omchaj ca tu dzaj jun túul paal ti' Abraham tu jach ch'ija'anil. Le chan paalo' síij jach tu kiinil je'el bix u ya'almaj ca'ach Kue'. 3Abrahame', Isaac tu dzajilac u kaaba'int le paal dza'ab ti' tumen x Sarae'; 4Ca tu súut kuptaj tu ocho kiino'ob síijic, je'el bix a'ala'abic ti' tumen Ku ca u beete'. 5Abrahame' yaan ca'ach cien ja'abo'ob ti' ca j síij Isaac. 6X Sara túune' tu tucultaj: Kue' tu beetaj in che'ej, tuláacal le máaxo'ob cu bin u yojéeltajo'ob dzo'oc u yantal jun túul in paale', yaan u che'ejo'ob tin wéetel. 7¿Máax ca'ach bíin u ya'al ti' Abraham wa tene' yaan u kuchul u kiinil in dzáic paalal ti'e'? Ba'ale' tene' dzo'oc in dzáic ti'e' jun túul paal quex tumen dzo'oc u ch'íijil.
Agar yéetel Ismaele' tojolch'iinta'abo'ob tu yotoch Abraham
8Le ca j nojochchaj le chan paalo' j luksa'ab u chu'uch. Le kiin j luksa'ab u chu'uche' Abrahame' tu noj kiinbesaj. 9Ba'ale' Sarae' tu yilaj bix ca'ach u p'a'asta'al Isaac tumen le paal dza'ab ti' Abraham tumen Agar le x egipciae'. 10Ca túun j bin u ya'al ti' Abraham: Xi'ico'ob, le x koos yéetel u yaalo', tumen Isaac in j xibil paale' mina'an ba'ax o'olal u jatzic ba'al u ti'al yéetel u yaal le x kooso'.
11Lelo' yaachaj tu yóol Abraham, tumen le ba'axa' j beeta'ab ti' jun túul u paal 12Ba'ale' Kue' tu ya'alaj ti': Ma' a sen tuucul tu yo'olal le j xi'ipalo' mix tu yo'olal a x palitzilo'. Beet tuláacal ba'ax cu ya'alic teech x Sara, tumen a ch'i'ibale' ti' Isaac bíin taalac. 13Tu yo'olal u yaal le x palitzilo', bey xan teen bíin in beet u jóokol ti'e' jun p'éel nojoch caaj tumen leti'e' a paal.
14Tu jach ja'atzcabil u láak kiine', tu dzaj Abraham u cuch Agar waaj yéetel jun p'éel chúuj chuup yéetel ja', ca xan tu kubaj ti', chan j Ismael, ca tu ya'alaj ti' ca xi'ic, leti'e' j bini, x ma' nu'uc xíimbalnajic tu x tocoy lu'umil Berseba. 15Le ca j xu'up le ja' yaan ca'ach te j chúujo', tu p'ataj le chan j xi'ipal yáanal u bo'oy jun cúul caabal che' 16ca j bin cutal chan náach ti' tumen ma' u káat ca'ach u yila'a' u quíimili'. Chéen p'elac culaque' ca jo'op' u yokol le paalo'.
17Kue' tu yu'ubaj u yokol le chan j xi'ipalo'; te j ca'ano' j t'aanaj jun túul u ángel Ku ca tu ya'alaj ti' Agar: ¿Ba'ax cu yúuchul teech Agar? Ma' a ch'a'ic sajaquil, tumen Kue' dzo'oc u yu'ubic u yokol le j xi'ipal tu'ux yano'. 18Xeen, mach u kab, ma' a cha'akabtic, tumen bíin in beet u jóokol ti'e' jun p'éel sen nojoch caaj.
19Bey túuno' Kue' tu beetaj u yilic Agar jun p'éel u sayabil ja'. X leti'e' j bine' ca tu chupaj le chúuwo', tu dzaj xan ja' u yuk Ismael. 20-21Kue' tu yáantaj le j xi'ipalo', leti'e' j nojochchaji, ti' cajlaj xan tu x tocoyil Paran, tu ma'alob canaj j dzoon yéetel p'unche'. J kuch u kiinil u dzo'ocsa'al u beel tumen u maama yéetel jun túul x egipcia.
Abraham yéetel Abimelec tu beetajo'ob jun p'éel nup t'aan
22Óoli' ti' le kiino'obo', Abimeleque' j bin t'aan yéetel Abraham, j láakinta'ab tumen Ficol u nojchil u aj ba'atelo'ob. Abimelec tu ya'alaj ti' Abraham:
C ilic bix u yáantiquech Ku ti' tuláacal ba'ax ca beetic. 23Let o'olale', jalach t'ant teen tu kaaba' Junab Ku, ti'ilie' cúuchila' ma' bíin a beet teen kaas mix xan ti' in paalal, mix ti' in ch'i'ibali'. Jalach t'ant teen bíin a wáant teen yéetel utz je'el bix tin wáantilaquech yéetel utzile', bey xan bíin a beet yéetel in wéet caajalo'ob way ti' le lu'um tu'ux cajacbalecha'.
24Ca tu núucaj Abraham: Quin jalach t'antic teech.
25Ba'ale' Abrahame' tu ka'ajsaj ti' Abimelec le ch'e'en to'oc ti' tumen u palitzilo'obe'. 26Abimeleque' tu núucaj ti' Abraham:
Le ba'ala' ma' in wojel ca'achi', teche' mix jun téen ta wa'alaj teen. Ma' in wojel máax beet lelo'.
27Abraham túune' tu ch'a'aj j tamano'ob yéetel wacaxo'obe', ca tu dzaj ti' Abimelec; ti'ilie' kiino' tu ca'a túulalo'ob tu beetajo'ob jun p'éel nup t'aan. 28Ba'ale' Abrahame' tu jun páaycuntaj siete j tamano'ob ichil u múuch'ul u j tamano'ob, 29tu yo'olal lelo' Abimeleque' tu káat chi'itaj ti':
¿Ba'ax o'olal ta jun páaycuntaj le siete j tamano'obo'?
30Abrahame' tu núucaj ti':
U ti'al ca meyajnac le siete j tamano'oba' bey u chíicul teen tin ja'adzaj le ch'e'ena'.
31Let o'olalo' Berseba#21.31 Berseba, le t'aana' u káat ya'al u ch'e'enil nup t'aan ich hebreo t'aan, bey tu kaaba'intilac jun p'éel ch'e'en jo'ol tumen Abraham. cu kaaba'intic le cúuchilo', tumen te'elo' tu ca'a túulalo'ob tu beetajo'ob jun p'éel nup t'aan.
32Cu dzo'ocol le nup t'aan te Bersebao', Abimelec yéetel Ficole, suunajo'ob tu lu'umil j filisteob. 33Te j Bersebao', Abrahame' tu pakaj jun cúul che' cu kaaba'intic Tamarisco#21.33 Tamarisco, jun cúul caabal che' jach cu piimtal u le'anquil, u yiche' bey u yich saac wayúume'; chéen ba'ale' túudz u yich, bey paj su'udze'. te xano' tu ch'a'a chi'itaj u kaaba' Yuumtzil, le Ku mina'an u xuul u cuxtalo'. 34Ya'ab ja'abo'ob cajlaj Abraham tu lu'umo'ob le j filisteobo'.
Currently Selected:
Génesis 21: MAYABI
Označeno
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992