Matiyu 6
6
Yáa o kákan kɛ bhɔ́ ɲán mín man
1«Áa a yɛ́ɛ myaan! A kɛ́nan á yɛ́ Ala sháa o téenin ŋó kɛ́ tɔ́ɔɲiinnze né yaman o ɲánla. Ní o tɛ, a Fá mín ŋé sá ŋó lɔ, á táa tɔɔn sɔ́ɔ o la. 2Í kɛ́ kɛ́ yáa o bhɔ́la faannda ŋólu la, í kɛ́nan kɛ ké mɔɔn olu ɲán o a lá í ká, óyoo fyáangafo ólu o kɛla tɛ́nmɛn sɛ́ɛbho ŋólu ní yamanywaa olu lɔ. Ii o kɛ́la lé ké mɔɔn ólu a i tando. Tó ní fɔ a yɛ́ tínɲan in ne ngó í wɛɛ wɛɛ í ta tɔɔn ó sɔ́ɔla. 3Wáa ni í kɛ́ kɛ́ yáa ó bhɔ́la faannda ŋo lá í bhóobhɛɛ ó la, í bhóonwaan ŋo mánngan kɛ kósɔɔ o lɔ. 4O ɲán o mán, í yɛ́ yáa ó óo tó loo nɔn, tó Ala mín ŋé í Fá le, o mín ŋé í yɛ́ fé nóonaankɛnin ŋó yéla, o yáa i sála.»
Mɔɔn kákan kɛ í sɛ́ɛ ɲán mín man
Luka 11.2-4
5«Ni í kɛ́ kɛ́ í sɛ́ɛla, a kɛ́nan kɛ óo fyáangafo ólu: Olu kɛ́ kɛ́ í lɔ́la sɔ kɛ í sɛ́ɛ, yɛ́ɛ yáa o lé a dí i yɛ sɛ́ɛbho ŋólu ní sókɔɔnnɔn sháafaa né a ólu ka. Tó ní fɔ a yɛ́ tínɲan in ne ngó í wɛɛ wɛɛ í ta tɔɔn ó sɔ́ɔla. 6Wáa ni íle kɛ́ fáa í sɛ́ɛ, lo í fɛ́ta kɛ lá ó látuun í yɛ́ɛman kɛ í Fá Ala dɛ́li. O ɲán o mán, mɔɔn ɲán tɛ́ í Fá Ala mín ɲela wé, o mín ŋé kó lóonaankɛnin ŋólu bɛ́ yéla, o yáa í sála.
7Ni a kɛ́ kɛ́ í sɛ́ɛla, a kɛ́nan táa kóman kée ŋolu lɔ́kuukuu lé ɲɔ́ɔnnga óyoo káafii olu kɛla tɛ́nmɛnne, aa kɛla olu kɔ́ɔnnɔn kó ni i kɛ́ kóman shɛ́ɛman nvɔ, kó i yɛ sɛ́ɛ o káa myaan o ɲán o lé mán. 8A kɛ́nan kɛ́ óyoo i léelu, kɛ mansɔɔ Ala mín ŋé a Fá le, á mánko é kó óo kó la, o a o bɛ́ lɔ ké álee mán a dɛ́li bhá ɲɛ́ɛ. 9A kákan kɛ í sɛ́ɛ tɛ́nmɛn, o lée nin:
Án Nvá mín ŋé sá ŋó lɔ,
Í tɔ́ɔ ó a sɛ́nnɛnya,
10 Í yɛ́ Mansaya o wáa nan.
Í dhyáaɲɛnngo ó a kɛ́ lúukolo ó ka
óyoo aa tɛ́nmɛnne sá ŋó lɔ.
11Bí bhálo ó dí án man.
12Án yúumu ólu mánkoto,
óyoo mín núu yúumu kɛ́la án nan,
án ni olu mánkotola tɛ́nmɛn.
13Í kɛ́nan án ɲóso o lɔ lɔ́swaannin kɛ sháayoo ŋó la,
án ngísi Sɔtaannan o mán;
[kɛ mansɔɔ, mansaya ó, sébhaaya ó, óni kunnanwee ŋo ó bɛ́ bɛ́ é íle lé tá lé wáati o bɛ́ lɔ. Amiinan!]
14Aa céne, ni a kɛ́ yafa a mɔɔnɲɔɔn ólu mán, tó a Fá mín ŋé sángboo ó lɔ, oo yafa álee mán. 15Wáa ni a mán yafa a mɔɔnɲɔɔn ólu mán, a Fá táa yafa álee lu mán.»
Sún ŋo kákan kɛ ló ɲán mín man
16«A kɛ́ kɛ́ sún nɔn, a kɛ́nan a ɲán lɔkuun óyoo fyáangafo ólu kɛla tɛ́nmɛnne, olu i yɛ́ɛ lábhyaala lé ké bɛ́ a lɔ ŋóo ii sún nɔn. Tó ní fɔ a yɛ́ tínɲan in ne ngó, ilee wɛ́ɛ wɛɛ i ta tɔɔn ó sɔ́ɔla. 17Wáa ni íle kɛ́ kɛ́ sún nɔn, í ɲán o kwó kɛ túu swáandhyaanin ngɛ́ í kúnnɔn, 18ké mɔɔn ólu kɛ́nan lɔ óyoo íi sún nɔn, fɔ́ mɔɔn ɲán tɛ́ í Fá Ala mín ɲela wé, tó í Fá Ala mín ŋé kó lóonaankɛnin ŋólu yéla, o yáa í sála.»
Ala bháa, bháa wɛ́ɛ o: í tá ta
Luka 12.33-36
19«A kɛ́nan nanfoo ládhyɛ dínɲan míin nɔn, kɛ mansɔɔ bháabhaa óni sóo ŋó o cáannan lúukolo ó ka, so ŋólu lónan bhó nú la kɛ soɲan kɛ. 20Áa nanfoo ládhyɛ sángboo o lé lɔ, bháabhaa ni tunmuun ndɛ́ yénɔn kɛ cáanni kɛ, so ndɛ́ yénɔn kɛ lá o kɛɛ tó kɛ soɲan kɛ. 21Kɛ mansɔɔ í yɛ́ nanfoo ó kɛ́ kɛ́ ywáa mínnɔn, í yóso óo kɛ́la yénɔn lé. 22Mɔɔn ɲándhye ŋó lée lúu mɔɔn fási ó laman ŋo le: Ni mɔɔn ɲándhye ŋólu bhɛ́ɛbhɛɛ kɛ́ kɛ́, mɔɔn ywáa bɛ́ é kɛ́ kɛ́ɛngbɛ lɔ, 23wáa ni fyɛn kɛ kɛ́ mɔɔn ɲándhye ŋólu la, mɔɔn fási o bɛ́ é kɛ́la diwi le lɔ. O ɲán o mán, fé mín ngákan kɛ kɛ́ɛnɲan bhyáa mɔɔn ka, ni o kɛ́ kɛ́ diwi lɔ, diwiko o lá ŋó lée wé nɛ!
24Mɔɔn súusuu tɛ́ sé kɛ́la kunndii fyáa yɛ́ yɔ né kéene: Kée ŋó yáa gbéya a yɛ, tó a tɔ kée ŋó o dhyáa a yɛ, wáman a yáa í gbɛ́nnɛn kée ŋó mán kɛ í mánbhɔ a tɔ kée ŋó la. Ala ko o tɛ́ sé dhyáala a yɛ́ ké wɛ́ɛ kó o a dhyáa a yɛ́ o ɲán kée ŋó mán íkwɔ.»
Fɔ́ kɛ lá Ala la
Luka 12.22-31
25O lé kósɔn ní fɔ́la a yɛ́ ngó: A mánko é lɔ́minfe ni mínninfe mínnu la kɛ sé dínɲanlɔtɛɛ kɛ́la, wáman a káa faani mínnu bhyáa a kannan, a kɛ́nan hánmin ŋolu la. Mɔɔn ní o kúu mán ngbɛ́ɛ kɛ tínmin lɔ́min o ka ŋan, tó mɔɔn fási ó kúu mán ngbɛ́ɛ fáanin olu le a, bháa díi? 26Kɔ́ɔn mínnuu sáman, áa í míli olu mán: I tɛ sɛɛn kɛ́la, i lo ndɛ́ sɛɛnmanfe ngɛ́ɛnan, i yɛ́ɛ ló ndɛ́ sɛɛnmanfe ndála kɛ a bhyáalaa bhɔ́ mɔɔnnin nɔn, wáa a Fá mín ŋé sángboo ó lɔ, oo i bhálola! Tɔɔn tɛ́ álee la kɛ tínmin kɔ́ɔn ólu ka ŋan? 27A kée ngéenan ó mínnɛɛn lé wɛ́ɛ tó hánminan háanin kɛ hánmin ŋo a lɔ bhyáa a yɛ dínɲanlɔtɛɛ ó lɔ́bhɛɛya ó ka.
28«Mínnɛɛn le kósɔn áa faaniko o hánmin nzíila a lá? Áa í míliya lá bínnvee olu mán: I tɛ bháalakɛla, i lo ndɛ́ fáanin lálaanan. 29Waa tó ní fɔ a yɛ́ ngó háanin mansacɛ Swɛmannan ní a yɛ nanfoobatiiya ó lɔ, a man fáanin sɔɔ nín mín njɛ́ɛ ndɛ́ɛ bínnvee o lɔ́ le. 30Bínnvee mín ŋé bín nɔn, o cáaɲiin Ala kwɔ, kéni síin, o bínnvee o yáa kɛ́ tá lɔ: Tó Ala táa ále léelu fɛ́ɛya bhɔ́ a? A yɛ́ lánanya ó ŋa lɔ́ɔ! 31A kɛ́nan hánmin kɛ táa fɔ le kó: ‹Án ngáa mínnɛɛn lé lɔɔ, án ngáa mínnɛɛn lé mín, án ngáa mínnɛɛn lé bhyáa án ngánnan?› 32Síya gbɛ́ɛ o léelu kála o fé ŋólu ɲíinnan kúdɛyi. Wáa a Fá mín ŋé sángboo ó lɔ, a mánko é o fé mín nan o a ŋólu lɔ. 33Oo lɔ mínngɛ, áa í lɔ́ja kɛ í mányii Ala yɛ́ Mansayafaan ó lé kɔ́ɔ ótun, a ló ŋan sháa téenin ŋó lé ɲíin ŋótun, o kɛ́ kɛ́ Ala é fé ndɔ́ ólu bɛ́ di a mán. 34O ɲán o mán, a kɛ́nan hánmin síin ŋó la: Síin ŋó yáa hánmin ale gbú la. Bí ta sɛɛ ó lá née bí le.»
Currently Selected:
Matiyu 6: MXX
Označeno
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.