Matiye 6
6
Ekkitinol dow wallugo talakaaɓe
1«Kakkilee, to on kollitee gaɗu mooɗon geetu yeeso himɓe gam ji'eɗon. To on gaɗii ɗum, on keɓataa riiba to *Baaba mooɗon gonuɗo dow kammu.
2To non, to aa hokka sadaka, taa fiyu lenŋuru gam himɓe yi'ee. Non non nun munaafitiiɓe waɗata der cuuɗi *baajorɗi, e sera laabi. Ɓee gaɗa ɗum gam himɓe mana ɓe. E gooŋa batanmi on, ɓe keɓii ko riiba maɓɓe. 3Amma, to aa hokka sadaka, taa accu junŋo maa nano anna ko nyaamo waɗata. 4To a waɗii ɗum, sadaka maa laatoto e cuuɗiiɗum. Den *Baaba maa ji'oowo ko woni der cuuɗiiɗum, yoɓete ɗum.»
Ekkitinol dow du'aare
(Luka 11.2-4)
5«To oon du'oo, to on gaɗee hande no munaafitiiɓe waɗata. Kamɓe ɓee jiɗa du'aago e darorii der cuuɗi *baajorɗi, e ate cele, gam himɓe fu yi'a ɓe. E gooŋa batanmi on, ɓe keɓii riiba maɓɓe ko. 6Amma an, to aa du'oo, naatu suudu maa, maɓɓaa dammugal, eelaa *Baaba maa e cuuɗiiɗum. Den, Baaba maa ji'oowo ko woni der cuuɗiiɗum, yoɓete ɗum.
7To oon du'oo, to on ɗuuɗinee haalaaji ɗi galaa nafuwe hande no heeferɓe waɗata. Ɓee miili to ɓe ɗuuɗinii haalaaji, Alla toontoto ɓe. 8Gam majjum to on nandee e maɓɓe, gam Baaba mooɗon e anni ko kaajaɗon diga on eelay ɗum.» 9«Nani ɗo no haani du'oroɗon:
‟Baaba amen tawaaɗo dow kammu,
inne maa e senii.
10*Laamaare maa wara.
Sago maa laatoo dow leydi,
hande no ŋo laatorii dow kammu.
11Hokku men nyaamdu keƴannu men hanne.
12Yaafana men hakke amen,
hande no minon bo men jaaforanto woofananɓe men.
13Taa accu men naata der jarbeeji,
amma hisin men diga e Kalluɗo.
[Gam an nun laamaare, e baawɗe,
e tedduŋal fu woodani faa abada. Aami!]”
14To on jaafanake himɓe boofi mum, Baaba mooɗon gonuɗo dow kammu yaafanto on onon bo. 15Amma to on jaafanaaki himɓe, Baaba mooɗon bo yaafantaako on boofi mooɗon.»
Yeesu e ekkitina dow suumayeere
16«To oon cuumoo, to on jurmikinee hande no munaafitiiɓe waɗata. Ɓee jiɓa geese maɓɓe gam himɓe annita ɓee cuumii. E gooŋa batanmi on, ɓe keɓii ko riiba maɓɓe. 17Amma an, to aa suumii, sulma, bujoɗaa wardi. 18Den himɓe annitintaa naa aa suumii. Amma *Baaba maa mo yi'ataake tan anni. Baaba maa ji'oowo ko gaɗuɗaa der cuuɗiiɗum, kanko yoɓetee.»
Jawdi dow kammu
(Luka 12.32-34)
19«To on kawritanee ko'e mon jawdi der duuniyaaru, to mooƴi e guƴuhon biisata ni, ɗum bo to wuyɓe yulata cuuɗi mon, wujja ni. 20Amma kawritanee ko'e mon jawdi dow kammu, to guƴuhon e mooƴi biisataa ni, wuyɓe bo heɓataa wujja ni. 21Gam to jawdi maa woni, ɗon ɓerne maa bo wonoto.»
Haala jayŋol e niwre
(Luka 11.33-36)
22«Gite woni fitilla ɓannu. To gite maa e yanɗi, ɓannu maa fu, wonoto der jayŋol. 23Amma to gite maa yanɗaa, ɓannu maa ŋol fu, ŋol wonoto der niwre. Den, to jayŋol gonuŋol der maa laatike niwre, a yi'ii ɗon no niwre mawniri!»
Alla e jawdi
(Luka 16.13)
24«Walaa baawoowo ko jagganii joomiraaɓe ɗiɗo, gam o wanyan oo ɗo, o yiɗa oo to, o takkontiran e oo ɗo, o yawoo oo to. On baawataa ko jagganii *Alla, e jawdi.»
Hoolaago Alla
(Luka 12.22-31)
25«Gam majjum bi'anmi on: To on cukulanee yonkiiji mooɗon dow ko nyaamoton e ko jaroton. To on cukulanee ɓalli mooɗon dow ko ɓornotoɗon. Yonki ɓuraa nyaamdu na? Ɓannu ɓuraa koltal na? 26Daaree pooli piirooji: Ɗi aawataa, ɗi duggataa, ɗi galaa rummuure. Amma e non, *Baaba mooɗon gonuɗo dow kammu e nyaanna ɗi. On ɓuraa pooli tedduŋal na? 27Moy e mooɗon der ɓillaaje mum waawata ko ɓeydi balɗe mum, baa maƴƴande woore?
28To non, gam ume ko oon cukulana kolte? Daaree no pinniiji gese mawnirta: Ɗi mottataa, ɗi cannyataa. 29Amma mii bata on, baa Suleymaanu e tedduŋal mum fu, ɓornaaki kolte booɗuɗe hande no pinniiji ɗin gootel mum. 30To Alla e holtina kuɗooji ladde tawaaɗi hanne, jaaŋo ɗi bulee yiite, o holtintaa on ɓura non non na? Onon ɓe goonɗinki paanɗuki! 31To on cukulee bi'on: «Ume nyaameten? Ume jareten? Ume ɓornotoɗen?» 32Gam kujje ɗee, heeferɓe nun daartata ɗe. Amma *Baaba mooɗon gonuɗo dow kammu, e anni oon goodi haaje majje. 33Daartee aran *Laamaare Alla, e foonnitaare makko. Den ko horii fu, on ɓeydante ɗum. 34To on cukulanee gam jaaŋo, jaaŋo sukulanto hoore mum. Nyalaane fu, toora mum heƴii ɗum.»
Currently Selected:
Matiye 6: BFB
Označeno
Share
Copy
Want to have your highlights saved across all your devices? Sign up or sign in
Bible Fulfulde Bénin, New Testament © SIM International, 2011.