Luka 18
18
1Kavaia na sumu ya ivafunda, sheeli kyavawara vatereve Iṛuva mikonu yoose nta vatalemwa. 2Kanumbua: Eeifoo nndu nshili mufukya fikwena muṛiń llive ateeṛee Iṛuva ana atataalie nndu. 3Na muṛiń ito eeifoo nka nsikeeti. Nae eellatiaa matika woose eemwiaa: Shifukiya mwaandu wa kituva kyakwa! 4Nae kalleya mikonu miingi. Numa kakurera ifo nrimiń wamwi: Lla ili ntakusurie Iṛuva ana ntataalie nndu, 5kake fulya nka uu nsikeeti akee ishaatara, nimfukiyaa mwaandu wamwi kisumani, kaaṛa atafurumie ishiraa kisangu. 6Nndumi kanumbua: Aranyiń kasa nshili ulya nrekwa arera. 7A Iṛuva araa atafukiya iwo awasaua vakee illilia kio na nsanyiń, nae avatevese tubu? 8Namuia: Avafukiaa kisumani ree. Kake ili Mwana wa nndu ashaa, akooyaa vandu vankusurie kunu isangeń naań?
9Yesu kalolia vandu kiindi vandekumanya wo veni sheeli wasumani vakabiṛa vengi. Kavakabia sumu kanumbua: 10Veeifoo vandu vavili varwe na ule numbeń ya Iṛuva vandeterevia-fo. Ulya umwi ni Mfarisayo na ulya ungi ni nsaṅiṛia kyaalo. 11Mfarisayo ulya kasalala katereva Iṛuva kuri ifo ngooń yamwi: Nakwaana Iṛuva, fulya niń ntakee sha vandu vengi, ntakee sha fisoki ana sha valembi ana sha vaaisi ana sha nsaṅiṛia kyaalo ullya. 12Kari ka mikonu mfungare nkee isinda kuro mikonu ivili ntalya shoonga. Lingi nkee ifukya kyeenga kyoose kya masaa akwa noore naniingia akava maanga a Iṛuva. 13Na nsaṅiṛia kyaalo ulya ye kasalala kulya numa, nta akaṛia iimboo miso amwi na iṛuvewu ndi, kake kanaṛia nnu kutu eekurraa kanumbua: Wui Iṛuva, kushililie niń nkee nndu nrekwa. 14Nań namuia: Nsaṅiṛia kyaalo ulya aende kyeń kwamwi akee nshiise kita Mfarisayo ulya. Fulya ulya woose, akuṅinisaa ye muni, anyiiswaa, na ulya akunyiisaa muni aṅiniswaa.
15Vakamwendee na vana vannya amu avabaane. Vanalosho vakalolia vakavakandara. 16Kake Yesu kavavaanga vashe kwamwi. Kanumbua: Tień vana iva vannya vashe kwakwa, manya mutavaimi. Amu vandu sha iwo umangi lwa Iṛuva llwawo. 17Nkue namuia kya dede: Nndu kwakooya atawariaa umangi lwa Iṛuva sha mwana, aakaa-fo kutu ndi.
18Lingi nndu umwi nnini kamwuṛa eereraa: Llosha nnuru, ntanaa are naań, amu nrwaa diṅu ya muu wa miṛeṛe? 19Yesu kamwia: Nki ili kwashivaanga nnuru? Eefo nnuru kitaare ni umwi tubu ndi, nae yye Iṛuva. 20Kwishi mavavaso a Iṛuva: Kutaaike, kutawaa vandu, kutaive, manya kutafingie nndu ungi kindo atatanie, india ndeo na maa. 21Nae kanumbua: Ifo foose niifiworee kuuka utiń lwakwa. 22Ili Yesu andeita kuro, kamwia: Kukiseere na kindo kimwi. Andekumba foose kuwore kwaavia vakiva. Nawe kuvaa na masaa mafise ifo iṛuvewu. Kwammaa kusheń kushisoṛe. 23Amiita kuro kanaṛia, fulya awore masaa meengi nnu. 24Neeli Yesu andelolia kuro kanumbua: Lleń kasa kikee kyuumu masimba yaka umangiń lwa Iṛuva! 25Kivaa kyaangu ngoye iitwa mbueń ya sindano kita nndu isimba yaka umangiń lwa Iṛuva. 26Na valya vandeita vakanumbua: Kwakooya nkuro, ni iń akooyaa ikiṛwa? 27Kanumbua: Ikyo kitamakii iva kwa vandu, kwa Iṛuva kivaa.
28Petiro kanumbua: Lla te ise tamburuya-wo findo feru foose tikakulatia. 29Nae kavaia: Nkue namuia kya dede: Eefo nndu anderea numba ana nka ana vanavamae ana ndee ana mae ana vana kiimba kya umangi lwa Iṛuva, 30kara ataniingwa eewiiṛio̱o̱ fiingi andu a kilya kimwi na feeriń ifi fa alli. Na ifo isangeń lia lishaa akooye muu wa miṛeṛe.
31Yesu kakurika valya ikumi na vavili kavaia: Manyiń alli tikee irwa na ule Yerusalemu, na ifo mfo fimarisio̱o̱ foose feentisiṛwaa wauya fisuku fa Mwana wa nndu. 32Amu arambikyo̱ maakoń a vandu valya vateeshi Iṛuva. Nae aeetio̱o̱ na iteendwa na imishio̱ manyiiri. 33Nawo vankabaa na ngova na iwwaa. Na nkonu wa kararu aṛukaa. 34Nawo nta yaṛukio̱ mfirero famwi ana nta imanya misendie yayo.
35Kyasia ili andeserikia kufui na Yeriko, eeifoo nndu ndoń akee rembo mbaai ya shia eeombaa vandu findo. 36Kaita vandu veeiraa veengi kavauṛa: Nkiki ikyo muṛe? 37Vakamwia: Ni Yesu ulya wa Nasareti akee iira. 38Kawaanga na ununga unini eenumbuaa: Wui Yesu, Mwana wa Davidi, shililia! 39Na valya vairie mbele vakannaya vakamwia: Sia do! Kake ye kaengeṛia iṛoṛongya eenumbuaa: Wui Mwana wa Davidi, shililia! 40Yesu kasalala kavavasa amwendewa. Ili vandenserisia kufui nae, kamwia: 41Nkiki kufurie nkutanie? Nae kamwia: Nndumi, mfurie llolie. 42Yesu kamwia: Loliań! Ili kwanshikusura, nkyo kyankukiṛa. 43Lia eni kallatia eeṅinisaa Iṛuva. Na vandu valya woose ili vandelolia, vakaitikisa Iṛuva.
Currently Selected:
Luka 18: RWK72
Označeno
Share
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.