Varome 8
8
Iteterwa mfinya ya Mumuyo Mweele
1Naasany ulaalu, nkukyiifo uvingo lwa yoorotwa kwa yewo vakee nnang'ani ya Kristo Yesu-fo. 2Mashika ivavaso lya Mumuyo wa muu ulya wa Kristo Yesu mmbo wanshileka, sharawa kwaasha na ivavaso lya ulyamari na ufu. 3Mashika filya fileeshidimikaa ni mavavaso, mashika a ufwafwa lwa vayo lwa ngata ya mwiili, Iruva ekiruma mwana wakwe muni ekee na mwiili uvakye wa ulyamari, mmbo alevinga ulyamari mwiiliny; 4naambo filya mavavaso avavasye fiinutyo ni yese, luve lulaenda lwilatyaa mbony ta mwiili lyo lulatye ta nrima. 5Mashika valya vakeelatya mwili mmbo vakekusara mbony ta mwiili; kyaindi valya vakeesora mbony ta Mumuyo wo mmbo vakeekusara mbony ta Mumuyo. 6Mashika kirengo kya mwiili ni ufu kyaindi kirengo kya Mumuyo ni muu na ufoo. 7Kimmba kirengo kilya kya mwiili ni ukiduva na Iruva, mashika elyi kilashiindyaa mavavaso a Iruva, nta nkishiidimaa iinndya-fo. 8Valya vasoraa mbony ta mwiili mmbashidimaa isenya Iruva-fo. 9Lyo kwakooya Mumuyo wa Iruva ukee nnang'ani yaany, yeni mmukisoraa mwiili-fo; mmbo musoraa Mumuyo. Na nndu moose yeto nalatiri Mumuyo wa Kristo, yeto nshi wakwe-fo. 10Kristo kankaa nnang'ani yaany, miili yaany mmbo ifiiye efo ulyamariny, mirima yaany ikakaa na muu kyeendwa ni usumanu. 11Kyaindi kwakooya Mumuyo wa yeto aleruta Yesu auka kwa vafu akee efo nnang'ani yaany, we yeto aleruta Yesu Kristo mmbo asheviryaa miili yaany muu yeyo itiri ngata ya ifwa, na Mumuyo wakwe yeto amukaye. 12Kimmba niindo, vanavama, mmbo lutiri sye, nshi sye ya mwiili lusore mwiili-fo. 13Mashika kwakooya mwasora mbony ta mwiili mmbo mwaruuya ufu, lyo Mumuyo kammweekya ilammya mbony ta mwiili mmbo mukaa na muu. 14Mashika valya vakee iteterwa Mmumuyo wa Iruva mmbo vakee vana va Iruva. 15Shamashika mmulewarya ngata ya ushinga yeyo ya weeresi-fo, mmbo mulewarya ngata ya ivikwa vana, yalweengye lukavaanga, “Aba” nkyo kyaamba “Nde weeru.” 16Mumuyo Mweele mmbo akureeka ando amwi na mirima yeeru sheelyi yese mmbo lukee vana va Iruva; 17na kimmba lukee vana va Iruva, mmbo lukee veni ding'u, veni ding'u va Iruva, yewo vashekaa na Kristo, yee, lwiilyiswaa ukiva nawe ulaalu numa lusherumishwaa ando amwi nawe.
Itumbe elyo lyisheshaa
18Mmbo shilollye sheelyi ngatara yeti tiifo ulaalu nshi kindo, elyi shatiinanisa na itumbe elyo lushelyimywa. 19Mashika naakwa mfyuumbe fyoose mmbo fivikye nsia nnum isheorwa paa itumbe lya vana va Iruva. 20Mashika fyuumbe fyoose mmbo fikee fishillye na finya ni yeto alefivika-u fikee fiivereyaa. 21Mashika nafyo mmbo fisheutwaa ushingeny lwa urumato, kutani fyaanga itumbeny lya vana va Iruva. 22Mashika fyuumbe fyoose mmbo fikee ngatareny fika ulaalu. 23Nta nshifyo-da-fo, naakwa ni yese lukee vakaye mumuyo mmbo luvekee ngatareny, lukavika nsia wa yaauwa efo ushingeny na yaaluwa vana. 24Mashika mmbo lulekirwa kwi ivereya; kyaindi kindo kikee ivereyo kwakooya kyallolyo, nkukiifo ivereya-fo. Shamashika ni vi alemmbereya kilya kyammelollyo? 25Indi lukammbereya kindo lulakilollye, mmbo lukivereyaa na usau. 26Ni indo na Mumuyo nawe mmbo alweekyaa ufwafwa lweru, mashika elyi lulaishi itereva shaasa kisumani; kyaindi Mumuyo muni mmbo aluterevya neerosa uuwo kindo kilavaa yaamba. 27Na yeto aishi mirima ya vandu mmbo aishi ngata ya Mumuyo shaasa ikai, mashika mmbwe ava mwiterevya veele shaasa Iruva akundye. 28Neese mmbo lwishi Iruva mmbo arundaa ando amwi na valya vankundye evawonisyaa mesha, mmbo valya vakee vavaange shaasa akunndye. 29Mashika valya avaishi uka mbee, mmbo alevasauwa uka elyo mbee vavakaniswa na Mwana wakwe naambo we nave mwana mmbee nnang'ani ya vandu veengyi. 30Na valya alevasauwa uka elyo mbee, yewo kavavaanga, na valya alevavaanga, wo kaveekennya usumanu; na valya aleveekennya usumanu wo kavang'anisa.
Ikunda lya Iruva kyeendwa ni Yesu Kristo
31A kya efyo fyoose lukaambany inda? Iruva kankaa taari yeeru ni vi ashiidimaa ilukyinga? 32Yeto alelotora aleima mwana wakwe kimaruma kyeru yese loose, mmbo araa inda nalalulyimya findo fyoose ando amwi nawe? 33Ni vi yeto asheringyaa vasauwe va Iruva? Ni Iruva muni aveekennya usumanu. 34Ni vi ashevarumbuyaa mwaandu? Ni Kristo Yesu alefwa, yee, na mmwasi ya efyo mmbo aleruka kooka kwa vafu, nawe mmbo akee woko usha lwa Iruva; na mmbwe yeto akeeluterevya. 35Ni vi ashelurauwaa na ikunda lya Kristo? A ndesa ni ukiva ao ngatara, ao ni fyuure, ao nshaa, ao ni ikuuywa, ao ni nrenga ao ni usu? 36Shaasa kyikee kireiye kyeyaamba,
“Mmbo lukee isisyo nkonu piti kimaruma kyafo,
lukavevaka maanri eeshisha.”
37Kyaindi nnang'ani ya efyo fyoose mmbo lukeevinga na mmwasi yeevinga, kyeendwa mmbwe yeto alukundye. 38Mashika mmbo shammaa imanya na nshushwa sheelyi, nta ufu ao muu, ao vasu, nta yewo vatiri ushilyi, nta yefi fiiyo ao yefyo fishaa numa, nta yewo vatiri wiidimi, 39nta efyo fikee uwe ao yefyo fikee si, ao nta kyuumbe kingyi kyoose nkishiidimaa ilurauwa na ikunda lya Iruva yelyo lyuukye kwa Yesu Kristo Nndumi weeru-fo.
Currently Selected:
Varome 8: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.