Varome 5
5
Iirikyo efo kwa Iruva
1Kwakooya lwammaa ilyimmyo usumanu kimaruma kya iirikyo, luve vafoo sau yoo kwa Iruva, kyeendwa ni Nndumi weeru Yesu Kristo. 2Mashika mmbwe yeto aleluniinga ifikya isarya elyi na iirikyo elyi lukee nalyo neefura nalyo lwiivikye nsia yaakana itumbe lya Iruva. 3Nta nshi indo-da-fo, luvefura na ngatara-da, mashika ngatara mmbo teende usisiryo. 4Na ishora lya ngatara ni yeende ukaari, na ukaari mmbo lweende ivika nsia. 5Na ivika nsia llyivikaa nyinyira-fo. Mashika isarya lya Iruva lyammaa iletywa miriminy yeeru ni Mumuyo Mweele yeto lulensimbwa. 6Mashika llya yese lwekee vafwafwa, fyeeri fikiinana lyo Kristo aleshelufiiya yese valyamari. 7Kimmba kilavaa nndu nafwe kimaruma kya nndu nsumanu, lyo kyishidimikaa nndu ikarya ifwa kimaruma kya nndu nsha. 8Kyaindi Iruva mmbo aora ukundi lwakwe we muni shaasa alukundye. Mashika Kristo mmbo alefwa kimaruma kyeru llya lwekee valyamari. 9Naasa mmwasi ya efyo lukammaa yekennywa usumanu efo samuny yakwe, mmbo lushekiaa unyafi elo kyeendwa mmbwe. 10Shamashika kwakooya llya lwekee vakiduva mmbo lulesandwa na Iruva kyeendwa ni ufu lwa Mwana wakwe; llyo mmwasi lukammaa isandwa indo mmbo lusheekennywaa usumanu kyeendwa mmuu wakwe. 11Nta nshi indo-da-fo, mmbo luvetiri ifura lwikee na Iruva kyeendwa ni Nndumi weeru Yesu Kristo, yeto luleona isandwa na Iruva kimaruma kyakwe.
Adamu na Kristo
12Naasany, ulyamari mmbo luleendwa ulaniny ni nndu umwi, nalo lukaende ufu. Na ulyamari yelo lukasheya vandu woose mashika elyi woose valyamarye. 13Shamashika kulaore uvavaso lwensha ulyamari mmbo lweefo ulaniny, lyo ulyamari llulollywa kulaiyo ivavaso-fo. 14Kyaindi lyo ufu mmbo lulekaa-u uka Adamu kufike Mose, nalo lukashilya naakwa ni valya valatannyi ulyamari luvakye lulya lwa Adamu. Nalo lukashillya naakwa ni valya valatannyi ulyamari luvakye lulya lwa Adamu, yeto akee kyaaso kya yeto asheshaa. 15Lyo simbo yeyo nyileva sha urekwa elo-fo. Mashika kwakooya kimaruma kya urekwa lwa nndu umwi veengyi mmbo valefwa. Isarya lya Iruva ni mmwasi na wiidimi lwa isarya lya nndu yeto umwi Yesu Kristo mmbo luleilanya kimaruma kya vandu veengyi. 16Nta kyeeso kya nndu yeto umwi nkiinani na wiidimi yelo-fo; shamashika uvingo mmbo luleendwa ni nndu umwi nalo lukaende isisywa, kyaindi simbo ya isarya mmbo ilesha kimaruma kya urekwa wiingyi, ikeende na yeekennywa usumanu. 17Mashika kwakooya llya nndu umwi alelyamara ufu mmbo luleshillya kyeendo ni yeto umwi, ni mmwasiny deny kwa yewo vawaryaa wiingyi lwa isarya, na wiidimi lwa usumanu, nawo mmbo vasheshillyaa efo muuny kyeendwa ni yeto umwi we Yesu Kristo. 18Naasany-da, kwakooya kimaruma kya urekwa lumwi vandu woose mmbo valerumbuywa vasisyo, niindo-da kivekai kimaruma kya usha lumwi luletanwa vandu woose mmbo valekennywa usumanu lurye muu. 19Mashika kwakooya kyeendwa ni uravi lwa nndu umwi vandu veengyi mmbo valeallwa ulyamariny, naa indo-da, kimmba yeto umwi aleva mwiirikya, vandu veengyi mmbo valeekenywa usumanu. 20Kyaindi lyo uvavaso mmbo lulesha naambo urekwa llwa lung'ani deny; na kyeeri ulyamari luleilanya, na isarya mmbo lyileengera mmwasi. 21Naambo, shaasa ulyamari luleshillya na ufu, kisorye indo na kya shia yeyo ya usumanu isarya lyishillye fika muu wa llung'anu kwi Yesu Kristo Nndumi weeru.
Currently Selected:
Varome 5: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.