Varome 3
3
1A Myuda nki kya mmwasi atiri? A irinwa mmbo lyisheekyaa-ki? 2Mmbo lyisheekyaa deny taari toose. Mbele kimmba vakee varambikye fyaasa fya Iruva, 3A ni indaany, kwankooya vengyi valakusiryeu? A ira lyawo valakusiryau mmbo lyisheallwa usha lwa Iruva luve ruu? 4Oode! Iruva mbwelollyo mmbwa dede na nndu ni llembi, shaasa kikee kireiye indi:
“Naambo kulolyo yewe ni wa dede elyi kwarera,
kweende ivinga elyi kwaanga ando afo a yaanduya.”
5Kyaindi kwakooya uravi lweru mmbo lwaringisya usumanu lwa Iruva, mmbo lushaambaa-u-ki ndesa? A Iruva mmbo akee nravi elyi aora unyafi? (A shirere kinndu.) 6Nta-fo. Kukooye niindo Iruva mmbo eeshidimaa inda yaanduya ulana? 7Lyo kwakooya dede ya Iruva yeengera yoora paa itumbe lyakwe, kyeendwa ni wongo lwakwa, nkikyi elyi shekeengera yuutyo uvingo sheelyi nkee llyamari? 8Nkyoki kishimaa lulaambe (lulefingyo wongo, na vengyi vakakaarisa sheelyi luleamba indo), Ndeny lutani makasha, naambo mesha asorye, nawo yaanduyo lyawo lyitiri usumanu. 9A ni indaany? Yese Vayuda lukee kyeni ngota vengyi? Oode, nta kinnywa-fo. Mashika lwammaa yuutya Vayuda na Vagriki uvingo sheelyi mmbo vakee valammyi ni ulyamari. 10Shaasa kikee kireiye,
“Nkwiifo atiri usumanu nta umwi-fo.
11Nkwiifo eeshi-fo,
nkwiifo mwiruuya Iruva-fo.
12Woose mmbo vaevekye, vakapwaa woose deny.
Nkwiifo mwitana mesha-fo, oode, nta umwi-fo.
13Uroo lwawo ni kifu kirwe,
na ngyulumi tawo mmbo tilerera fya ntambo.
Uroi lwa shoka mmbo lukee efo kaniny kawo.
14Kana kawo mmbo keeshwe fidengo na kivawo.
15Marende awo mmbo arishyaa indepuswa samu.
16Ikasheesa na nyinyira fikakaa efo shieny tawo.
17Nta shia ya usumanu mbaleimanya-fo.
18Iindya Iruva llyikee efo misony awo-fo.”
19Naasany lwiishi sheelyi findo fyoose firerwaa mmavavaso mmbo fyarerya kwa yewo vakee si ya mavavaso, naambo vamalalyiswa, na ulana loose lukae si ya uvingo lwa Iruva. 20Shamashika nkwiifo nta nndu umwi atiri mwiili asheekenywa usumanu mmashora a mavavaso-fo. Mashika imanya ulyamari mmbo lyeendwaa mmavavaso.
Iruva alwiirikya kyeendwa nkikusiryo
21Lyoony ulaalu, usumanu lwa Iruva lwankoora paa kulaiyo mavavaso, mmbo lukeekureekyo ni mavavaso na vakisuku. 22Ni usumanu lwa Iruva lweendwa nkikusiryo kya Yesu Kristo kwa woose yewo vairikya. Lyo nkwiyoo kilakaniso-fo. 23Shamashika woose mmbo vatannyi ulyamari, na yaanguywa ni itumbe lya Iruva. 24Mmbo vashekenywaa usumanu ruu kyeendwa ni isarya lyakwe, kwa shia ya iwowowa ni Kristo Yesu. 25Mmbwe Iruva alemmbika nave nsandi kyeendwa nkikusiryo efo samuny yakwe, naambo noore usumanu lwakwe, kimaruma kya ilekeya efo usisiryony lwa Iruva ngyulyamari toose tilensongwa itanwa. 26Naambo noore usumanu lwakwe kyeeri eki, naveva mmbwe muni usumanu na mwiekenya usumanu yeto moose airikye Yesu. 27A nkwi ikurosa lyafo lyikai? Akalyo lyanraywa poo. Ni ivavaso lya ngata-ki? Kwa ivavaso lya mitannyi? Oode, nkwa ivavaso lya kikusiryo. 28Naasany mmbo lwalollya sheelyi nndu wa vandu mmbo asheekennywaa usumanu kyuuka na kikusiryo kulaiyo mashora a mavavaso. 29Ao le, Iruva mmbo akee Iruva wa Vayuda veni? Nshi akee Iruva wa Vamasanga woose? Yee ni Iruva wa masanga woose. 30Lyo dede kwankooya Iruva ni umwi, nawe nasheekennya yewo vakee varini usumanu, naakwa ni valya valakee varini mmbo asheveekennyaa usumanu na shia yeyo sheni. 31A le ndesa, mmbo luminaa mavavaso kimaruma kya kikusiryo ekyo? Oode, ando a vayo indo mmbo lwakaarisa mavavaso.
Currently Selected:
Varome 3: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.