Varome 11
11
Isarya lya Iruva kwa Vaisraeli
1Naasa, mmbo shikeevesa, Iruva mmbo alevivya vandu vakwe mbai? Oode! Mashika naakwa ni yeny ni Mwisraeli, umwi wa vana va Abrahamu, nndu wa ufyari lwa Benyamini. 2Iruva nnyalevivya vandu vakwe alevamanya uka elyo mbee mbai-fo. Ao ndesa mmbo mulaishi filya fikee firere efo mareiyony kya Elia? Shaasa alekumba Vaisraeli efo kwa Iruva, 3kaamba, “Nndumi mmbo valewaa vakisuku vafo, vakasammbwa na fitara fyafo fyeerasya, neeny mmbo shansaau shimuni, nawo mmbo vakeruuya ishiwaa.” 4A kirouwo kya Iruva mmbo kileamba inda? “Mmbo shikusaarisye-fo vandu fiku mfungare valakeefirya Baali ndi.” 5Naasany ni indo-da kyeeri ekyi, kweiifo nsaaro ukeensauwe kwa isarya lya Iruva. 6Kimmba nkya isarya, nkikivaa ni kya mashora a nndu-fo, mashika kukooye niindo isarya llyekivaa isaryafo. 7A mmbo kyava inda? Kindo kilya Israeli ekeekiruuya nnyalekiwonisa-fo; kuuta valya valesauwa wo vakakiwonisa, na vengyi wo vakaumisywa. 8Nshaasa kyikeekireiye kyeyaamba, “Iruva mmbo alevaniinga ngoo tirengeyaa, miso nare nalalollya, maarwi are nalaita kufike nkonu sha yeu wa inu.” 9Na Davidi nawe aamba,
“Ando awo kwelyiya shoonga ave a nsindara na nreiyo
na kindo kya ivakyinga,
llo weesi lwawo.
10Miso awo avikwa ireema vare valalollya,
na mungo wawo ukwiinyike mikonu myoose.”
11Kyasia shavesaany, A mmbo valerendeya vawe ppu? Oode nta-fo! Lyo kyeendwa ni urekwa lwawo ukiro mmbo lulefikya vandu va masanga, naambo wo vatirwa nkififi. 12Naasany kwakooya urekwa lwawo mmbo luleengye ulana pule indo, na unana lwawo lukaveva pule ya masanga, a nshi kishevaa indo mmwasi ndesa Vaisraeli vasheakaniswaa ukiro?
Ukiro lwa vandu vengyi
13Lyo mmbo shikeerera neeni mukee vandu va masanga. Naasany, kiinani na shaasa shikee llori wa vandu va masanga, mmbo sharumisha urundi lwakwa shimuni? 14Kulakooye nsheengye kififi yewo vakee va samu imwi neeny shikire-u kyenga kyawo. 15Mashika kwakooya ivivyo mbai kyawo mmbo lyileende usandi lwa ulana, a iirikyo lyawo mmbo lyishendee ki kulaore ni muu numa ya ifwa? 16Na lyingyi kwakooya fimu fyeele, niindo-da na imbumba lyoose; na isinde lyikammba yeele, na maramba nang'u nkiwo-da. 17Kyaindi kwankooya maramba engyi ammanywa, neewe nri wa ngoroshony kwalungyau, kwava umwi wa maramba yoo a nri yeto nsha na uredi lwa vayo, 18lola kulashekurumisha mbee ya maramba yoo; awooye kwakooya kushekurumishaa, nshi yewe kurye isinde elyo-fo, ni isinde elyo lyikurye yewe. 19Naasa mmbo kushaambaa, Maramba alya mmbo alemanywa naambo yeny shilungywa-u. 20Kyasia-da, lyo mmbo alemanywa kimaruma kya ira nalakusirya-u, neewe mmbo kwasalala-u kyeendwa ni kikusiryo kyafo. Naasany, kulakushope-fo, iryaa. 21Mashika kwankooya kulaore Iruva alesarya maramba alya a mbee nta yewe nnyashekusaryaa-fo. 22Nkyelolany, usha na unyaasi lwa Iruva kwa valya veewa ni unyafi, indi kwafo yewe ni usha lwa Iruva, lyo kwankaa usheny yelo; lyo kyilammba, neewe-da mmbo kushemanywaa-u. 23Neewo-da, vakara valasinda efo kikusiryony kifu, mmbo vashelungwaa-u, nnyeli Iruva ashidimaa ivalungyau-se. 24Mashika yewe kwakooya kulemanywa yoo nriny yeto ukee wa ngoroshony uka mbee, numa kwalungya-u, kileekee indo uka mbee; nshi mmwasiny deny kwa valya vekee va elyo mbee isheviirwa ando alya awo a mbee ando valemanywa?
Yaaluka lya Vaisraeli
25Shamashika vanavama vakwa, nshikundye mure mulamanya kyama ekyi-fo, naambo mulashekusara mmbo mutiri urango sheelyi Vaisraeli vakee woomu, kutani vandu va masanga vasheumbywa. 26Nkyoony Israeli shoose ishekirwaa. Nshaasa kikee kireiye,
Mwikira asheshaa ooka Sion.
Nasherauwa Yakobo na uravi lwakwe.
27Neekyi nkyo kyaasa kyakwa nawo,
elyi nshevaangataa marekyo awo.
28Naasany kyeendwa ni Nrumi ya Nsia mmbo valeva vakiduva vany; kyaindi kyeendwa ni isauwa vakava vakunde kimaruma kya vande veru. 29Mashika simbo ta Iruva ntitiri yaamba shilamanya ilasongwaa-fo, na uvaango lwakwe niindo da. 30Mashika yeni shaasa mulemina Iruva llya kasha, yeni ulaalu mukawona ilyillyo kyeendwa ni imina lyawo; 31niindo-da nawo ulaalu mmbo vakeemina Iruva, naambo shaasa neeni mulewona ilyillyo nawo vavewona ilyillyo. 32Mashika kwa Iruva woose nkimwi vemminaa vakooye ilyillyo woose.
33Apaa utonga lwa Iruva shaasa lung'ani na waarya lwakwe na urango lwakwe. Shila takwe tilavaa isavaiya, nta shia takwe tilavaa ikutwa.
34Mashika ni vi alemanya makusaro a Nndumi?
Ao ni vi alemfisha kyama nawe?
35Ao ni vi alensongwa inninga kindo
nashekitawa-se?
36Mashika findo fyoose nkwakwe fyuukye, mmbo fiiyoo na wiidimi lwakwe, na mmbo fishewuyaa neefo kwakwe. Nnduma ni wakwe llung'anu. Amen.
Currently Selected:
Varome 11: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.